މަސްތުވާތަކެތި ޓްރެފިކް ކުރިކަމުގެ ތުހުމަތުގައި ދެ ދިވެހިން ހައްޔަރުކޮށްފި އެވެ.
ހައްޔަރުކޮށްފައިވަނީ އުމުރުން 33 އަހަރުގެ ދިވެހި އަންހެނަކާއި އުމުރުން 21 އަހަރުގެ ފިރިހެނެކެވެ.
އެ ދެމީހުންގެ ބަންދަށް ވެސް ކްރިމިނަލް ކޯޓުން ވަނީ 15 ދުވަސް ދީފަ އެވެ.
އެ މީހުންގެ މައްޗަށް މަސްތުވާތަކެތި ޓްރެފިކް ކުރުމުގެ ތުހުމަތު ކުރެވޭއިރު، ތުހުމަތު ކުރެވޭ މިންވަރަށް ހެކި ހުރި ކަމަށްވެސް ބުނެފައި ވެއެވެ. މަސްތުވާތަކެތި ފެނިފައިވަނީ ހައްޔަރު ކުރި އަންހެން މީހާގެ ކޮޓަރިންނެވެ.
މަސްތުވާ ތަކެތީގެ މައްސަލައިގައި ދެމީހުން ހައްޔަރުކޮށްފައިވާ ކަމަށާއި އެކަން ބަލަމުންދާކަމަށް ފުލުހުންވެސް ވަނީ ކަށަވަރުކޮށްދީފަ އެވެ.
މަސްތުވާތަކެތި ޓްރެފިކް ކުރިކަމުގެ ތުހުމަތުގައި ދިވެހި ޕައިލެޓެއް ހައްޔަރުކޮށްފައިވާއިރު މިފަހުން ރާއްޖެއަށް މަސްތުވާތަކެތި އެތެރެކުރި ބޭރު މީހަކު ވަނީ އަނބުރާ ފޮނުވާލާފަ އެވެ. އެމީހާ ފޮނުވާލާފައި ވަނީ ރާއްޖެއަށް މަސްތުވާތަކެތި އެތެރެކުރާ ބޭރު މީހުން އަނބުރާ ފޮނުވާލެވޭ ގޮތަށް ހަދާފައިވާ ގަވައިދެއްގެ ދަށުންނެވެ.
އެ ގަވައިދު ބަދަލުކުރުމަށް މިހާރު ރައްޔިތުންގެ މަޖިލީހަށް ވަނީ ހުށައަޅާފަ އެވެ.
Advertisement
This content is created and paid for by advertisers and does not involve Voice Journalists
