ގަދަ ފިނީގައި ބެހެއްޓުމަކީ އިންސާނިއްޔަތާއި ޚިލާފު ޢަމަލެއްކަން ދިފާއީ ވަޒީރަށް ނޭނގުމަކީ ދެރަކަމެއް ކަމަށް ކުރީގެ ބަންޑާރަ ނައިބް ދިޔާނާ ސަޢީދު ވިދާޅުވެއްޖެއެވެ.

ދިޔާނާ މިފަދައިން ވިދާޅުވެ ޓްވީޓް ކުރައްވާފައި މިވަނީ ރައީސް އިބްރާހިމް މުޙައްމަދް ޞާލިޙަށް އެމްޑީޕީގެ ރިޔާސީ ޓީކެޓް ހަވާލު ކުރުމަށް ބޭއްވި ޖަލްސާގައި، ދާދި ފަހަކުން އިންޑިޔާ އަށް ބޭސް ފަރުވާ އަށް ގޮސް ހުއްޓައި ހައްޔަރު ކޮށް ޑިޕޯޓު ކޮށްލި ޕީޕީއެމް ހުޅުމާލެ ދާއިރާގެ ރއީސް އަދި އިންޑިއާ އައުޓް ހަރަކާތުގައި އެކްޓިވިސްޓް އަބްދުއްޞަމަދުގެ މައްސަލައިގައި ޞަމަދުއަށް ރައްދުވާ ގޮތަށް ވާހަކަ ދެއްކެވެމުގައި ހަޖޫޖެއްސެވުމާއި ގުޅިގެންނެވެ.

މިނިސްޓަރ މާރިޔާގެ ވާހަކަގައި ވިދާޅުވީ ތިޔަބޭފުޅުންނަށް މިދޭތެރެއިން މީޑިއާތަކުގައި އުޅުނު ވަރަށް ބާރަށް ކޮންމެ ރެޔަކު އަޅުގަނޑުމެންގެ އަވައްޓެރި ޤައުމުގެ މިލިޓަރީއާ ދިމާލަށް ގޮންޖައްސަވައި އެކި ގޮތްގޮތަށް ވާހަކަދެއްކެވި ބޭފުޅުންގެ ތެރޭގައިވެސް އެ ފައުޖުގެ ކުރީގައި ދިދަ ހުންނަވާ ބޭފުޅެއް، ތުނބުޅި ބާލައްވައިގެން އާއިލާއާއެކު ވަޑައިގަތީ އިންޑިއާއަށް ކަމަށެވެ. ދެން އެނބުރި ވަޑައިގެންނެވިއިރު ކެމެރާތައް ހުރީ އޭނާއަށް އަމާޒުވެފައި ކަމަށާއި، މޫނުގައި އަތް އަޅުއްވައި ކީރިތިކުރެއްވިހެން ހީވިކަމަށްވެސް މާރިޔާ ވިދާޅުވިއެވެ.

Advertisement

 "ކެމެރާތައް ހުރީ އަޅުވާފައި. [ސަމަދުބެ] ވަޑައިގެން ވާހަކަދައްކަވަމުން އަޅުގަނޑުމެންނަށް ފެނުނީ މިހެން މޫނުގައި އަތް އަޅުއްވައި، އަޅުގަނޑަށް ހީވީ ކުޑަކޮށް ކީރިތިކުރެއްވިހެން،" ސަމަދުއަށް ހަޖޫޖައްސަވަމުން މާރިޔާ ވިދާޅުވިއެވެ.

ދިޔާނާ ވިދާޅުވީ ސަލާމަތީ ޚިދުމަތުގައި އުޅުނު އުޅުނު މީހަކު ފިނި ކޮޓަރިއެއްގައި ބެހެއްޓީމައި ރޮއެފިކަމަށް ބުނެ "ވެޓްރަން" އަކަށް ހަޖޫ ޖެއްސެވިއިރު ގަދަ ފިންޏަކީ ބައެއް ހާލަތުގައި އިންސާނީއްޔަތާއި ޚިލާފު އަދަބެއް ކަން މާރިޔާއަށް އެނގިނުލެއްވުމަކީ ދެރަކަމެއްކަމަށެވެ.

އިތުރަށް ދިޔާނާ ވިދާޅުވީ އޭނާ އަކީ އިންޑިއާ އައުޓް ކެމްޕޭނަށް ތާއީދު ކުރައްވާ ބޭފުޅެއް ނޫން ކަމަށެވެ. އެހެން ނަމަވެސް ދިވެހިރައްޔިތަކު ހުށައެޅުނު ވޭނާއި ތަކުލީފަށް އޭނާޔާމެދު ރަހުމުކުރުން އެއީ އޮތް ކަމެއްކަމަށާއި، އަދި ސިޔާސީ ފިކުރަށް ބަލައި ފަރަގު ނުކޮށް އޭނާގެ އިންސާނީ ކަރާމާތް ނެގެހެއްޓުމަކީ ވަޒީރުންގެ ދުސްތޫރީ ވާޖިބެއް ކަމަށެވެ.