ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުންތަކުގައި ގެދޮރު ގެއްލި ހާލުގައި ޖެހުނު އަޚުންނާއި އުޚްތުންނަށް އެހީވުމަށް "އެއްއުންމަތެކޭ މީ" މިނަމުގައި ފަށައިފައިވާ ކެމްޕޭނުގެ ދަށުން އިއްޔެ ކުރިއަށް ގެންދެވުނު ފަންޑު އެއްކުރުމުގެ ޕްރޮގްރާމްގެ ދަށުން އިއްޔެ އެއްމިލިއަން ރުފިޔާ ވަނީ ޖަމާކޮށްފިއެވެ.

އައިއޭސީއާ ގުޅިގެން ހިންގި މި ހަރަކާތުގައި ކުރީގެ އިސްލާމިކް މިނިސްޓަރު ޑރ.މުޙައްމަދު ޝަހީމު އަލީ ސައީދު ހިންގަވާ އޯގަނައިޒޭޝަން އޮފް އިސްލާމިކް ކޯޕަރޭޝަން (އައިއޯސީ)އާއި އިތުރު ގިނަ މަދަނީ ޖަމްއިއްޔާތަކުން ބައިވެރިވެފައިވެއެވެ..

ސޫރިޔާއާއި ތުރުކީއަށް އައި ބިންހެލުމުގައި ގެއްލުންވީ މީހުންނަށް އެހީވުމަށް ހިންގި މި ހަރަކާތް އިންތިޒާމުކުރުމުގައި އިސްނަގައިގެން މަސައްކަތްކޮށްފައިވަނީ ފަތިސް ލީގުންނެވެ.

Advertisement

ހުކުރުދުވަހު ހުކުރު ނަމާދަށްފަހު މާލެއާއި އަތޮޅު ތެރޭގެ މިސްކިތްތައް ކައިރީ، ފަންޑު ފޮށިތައް ބެހެއްޓިއެވެ. އަދި އާންމުކޮށް މީހުން އެއްވެ އުޅޭ ތަންތަނުގައިވެސް ފަންޑު ފޮށިތައް ބަހައްޓާފައި ހުއްޓެވެ.

މި ހަރަކާތުގައި އިސްކޮށް އުޅުއްވި ކުރީގެ އިސްލާމިކް މިނިސްޓަރު ޑރ.މުޙައްމަދު ޝަހީމް އަލީ ސައީދު ދިޔަރެސް ނޫހަށް  މައުލޫމާތު ދެއްވި ކަމަށް އެނޫހުގައި ރިޕޯޓުކޮށްފައިވަނީ އިއްޔެ ހިންގި ހަރަކާތްތަކުން ޖުމްލަ 1 މިލިއަނެއްހައި ރުފިޔާ ލިބިފައިވާ ކަމަށެވެ.

ވީހާވެސް ގިނަ ބަޔަކަށް ތުރުކިޔޭ އާއި ސޫރިޔާއަށް އެހީތެރިވުމުގެ ފުރުސަތު ހޯދައިދިނުމަށް ރާވައި ހިންގި މި ކެމްޕެއިނުގައި އެއްކުރެވޭ ފައިސާއަކީ ތުރުކިޔޭ އަދި ސޫރިޔާއަށް އައި ބިންހެލުމުގައި ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމަށް ބޭނުންކުރާނެ ފައިސާއެވެ.

މިބިންހެލުމާއި ގުޅިގެން އެތައް މިލިއަން ބަޔަކު ވަނީ ބޯހިޔާވަހިކަން ގެއްލިފައެވެ. އެތައް ބަޔަކު ވަނީ ޒަރޫރީ ބޭނުންތަކުން މަހުރޫމްވެފައެވެ. އެތައް ކުޑަ ކުއްޖަކު ފިނި މޫސުމުގެ ފިންޏާއި ހަނގުރާމަ ކުރަމުންދަނީ ފިނިން ރައްކާތެރިވާނެ ފޭރާން ނެތިއެވެ.

.

.