ރާއްޖޭގެ އެކި ކަންކޮޅުކުން ޖުމުލަ 106 ބައިވެރިންނާއިއެކު ސޮނީ ފިޝިންގެ "ކަނޑު ފޯރި" މަސް ރޭސް ފަށައިގެން ވަރަށް ފޯރިއާއެކު ކުރިއަށްދާކަމަށް ރޭސް އިންތިޒާމު ކުރާ ފަރާތުން ބުނެފި އެވެ.  

ޖުމުލަ 106 ބައިވެރިންނާއި، 5 ސްޕޯޓްސް މަސްދޯންޏާއި އެކު މިއަދު ހެނދުނު 6:00 ގައި ފަށާފައިވާއިރު މި މަސް ރޭހުގައި އެކަނި ބައިވެރިވާ ބައިވެރިން ރޭސް ނިންމަން ޖެހެނީ އިރުއޮއްސި 6 ޖަހާއިރު ނިންމާނެއެވެ. ގްރޫޕް ކޮށް ބައިވެރިވާ ޓީމުތައް ނިންމާލުމަށް ހަމަޖެހިފައިވާ އިރުއޮއްސި 7 އަށް ނިންމާލާނެ އެވެ.  

މަސް ރޭހުގެ ބައިވެރިއަކު ނަގާފައިވާ ފޮޓޮއެއް

މަސްރޭހުގައި ބައިވެރިވެފައިވާ ކޮންމެ ބޯޓެއްގައި އޮފިޝަލަކު ހުންނާނެއެވެ. އަދި މަސްރޭހުގެ ބައިވެރިން މުބާރާތުގެ ގަވާއިދު ތަކަށް ބޯލަނބައި، މަސްބޭނުމުގެ ތެރެއިން މަނާ އެއްވެސް ކަމެއް ކުރޭތޯ އޮފިޝަލުން ޗެކުކުރާނެއެވެ. 

ތަފާތު ގޮތަކަށް ކުރިއަށް ގެންދާ މި މަސްރޭހުގައި، ބާނާ ވަކި ވައްތަރެއްގެ މަހަކަށް ޕޮއިންޓު ދިނުމަށް ހަމަޖެހިފައިވާއިރު، ބޭނުމަށްފަހު ދޫކޮށްލަންޖެހޭ ކަހަލަ މަހެއް ދޫކޮށްލައިފިނަމަ ވެސް ޕޮއިންޓް ލިބެއެވެ.  

މަސްރޭހުގެ ބައިވެރިވި ޓީމެއްގެ ދަތުރުގެ މަންޒަރުތައް 

ކަނޑު ފޯރީގެ ނަމުގައި ކުރިއަށް ގެންދާ މަސް ރޭހަކީ ސޮނީ ފިޝިންއާއި ޔުނިކްސް ސްޕޯޓްސް ގުޅިގެން ހަދާފައިވާ "ކަނޑު ފޯރި" ވާޗުއަލް ފިޝިން އެޕް ލޯންޗު ކުރުމުގެ ގޮތުން ބާއްވާ މުބާރާތެކެވެ. މި ރަސްމިއްޔާތު އޮންނާނީ މިރޭ 8:00 ގައި އުސްފަސްގަނޑުގައެވެ.

އެ ރަސްމިއްޔާތުގައި "ކަނޑު ފޯރިި" އެޕް ދައްކާލުން އޮންނާނެއެވެ. މި މަސްރޭހުގައި ބާނާ މަސް ކަނޑު ފޯރި އެޕް ބޭނުންކޮށްގެން ބައިވެރިންގެ އަމިއްލަ ޕްރޮފައިލަށް އަޕްލޯޑުކޮށް ޕޮއިންޓު ހޯދުމުގެ ފުރުސަތު ލިބިގެންދާނެއެވެ. 

"ކަނޑު ފޯރި" މަސް ރޭހުގެ ފުރަހަމަ ރޭހުގައި ބައިވެރިވާ ފަރާތްތަކަށް ފައިސާގެ އިނާމުތައް ވަނީ ހުށައަޅާފައެވެ. މި މުބާރާތުގައި ސްޕޯޓްސް ފިޝިން ކެޓަގަރީއިން އެއްވަނަ ލިބޭ ފަރާތައް 15000 ރުފިޔާގެ ފައިސާގެ އިނާމާއި 10000 ރުފިޔާގެ ގިފްޓު ވައުޗާއެއް  ލިބޭނެއެވެ. 

އޭގެ އިތުރުން އަތުނަނުގެ ކެޓަގަރީއިން އެއްވަނައަށް ދާ ފަރާތަކަށް 10000 ރުފިޔާއާއި 5000 ފުރިޔާގެ ގިފްޓު ވައުޗާއެއް ވަނީ ހުށައަޅާފަ އެވެ.