ރާއްޖޭގައި ބޭއްވުމަށް ހަމަޖެހިފައިވާ "ރަންތާޖު" މުބާރާތުގެ  ޚާއްސަ އެއް މެހެމާނަކަށް ޤަޠަރުގެ ޤާރީ ޝައިޙް މިޝާރީ ރާޝިދް އަލް ޢަފާސީ ވާނެ ކަމަށް ޔޫތް މިނިސްޓަރ އަހްމަދް މްހްލޫފް ވިދާޅުވެއްޖެއެވެ.

މިނިސްޓަރު މަހްލޫފް މިކަން އިއުލާނުކުރައްވާފައިވަނީ އޭނާ މިހާރު ކުވައިތަށް ކުރައްވަމުންދާ ދަތުރުފުޅުގައި ޝައިޙް މިޝާރީއާ ބައްދަލުކުރެއްވުމަށް ފަހު ފޭސްބުކްގައި ހިއްސާކުރެއްވި ޕޯސްޓެއްގައެވެ. މިނިސްޓަރ މަހްލޫފް މިކަން އިއްލާނު ކުރައްވައިފައި ވީނަމަވެސް މިކަމާއި ގުޅޭ އިތުރު ތަފްސީލެއް ހާމަކުރައްވާފައެއް ނުވެއެވެ.   .

"ރަންތާޖު" މުބާރާތަކީ ރާއްޖޭގެ ހުރިހާ ސަރަހައްދުތަކުން ވެސް ބޮޑެތި މީހުންނަށް ބައިވެރިވެވޭ ގޮތަށް، ސަރުކާރުން އިސްނަގައިގެން އަންނަ ރޯދަ މަހަކު ބާއްވަން އިއުލާންކޮށްފައިވާ ބޮޑު ޤުރުއާން މުބާރާތެކެވެ..

ޔޫތު މިނިސްޓްރީން ބުނެފައިވަނީ އުމުރުން 16-45 އަހަރާ ދެމެދުގެ ކޮންމެ ދިވެއްސަކަށް ވެސް އެ މުބާރާތުގައި ބައިވެރި ވެވޭނެކަމަށެވެ.

އިސްލާމިކް މިނިސްޓްރީ އާއި ޔޫތު މިނިސްޓްރީ ގުޅިގެން ބާއްވާ މި މުބާރާތް ލައިވްކޮށް ދެއްކުމަށް ހަމަޖެހިފައިވަނީ ރާއްޖެ ޓީވީ އިންނެވެ. މުބާރާތުގެ އެއްވަނަ ހޯދާ ފަރާތަކަށް އިނާމުގެ ގޮތުގައި 300،000ރ. ވަނީ ހުށަހަޅާފައިވާއިރު މިމުބާރާތުގައި ބައިވެރިވާން ބޭނުން ފަރާތްތަކުން އެސްއެމްއެސް ކުރުމުގެ ފުރުސަތު މިއަހަރު ފެށުނުއިރު ވަނީ ހުޅުވާލާފައެވެ. އެ ފުރުސަތު ހަމަވެފައިވަނީ މިދިޔަ ޖެނުއަރީ މަހުގެ 10 ވަނަ ދުވަހަށެވެ.