ތުރްކިޔޭ އާއި ސީރިޔާއަށް އައި ބާރުގަދަ ބިންހެލުން ތަކުގައި ތުރްކިޔާއިން  ވެއްޓުނު ޢިމާރާތެއްގެ ދަށުން، ކާރިސާއަށް 12 ދުވަސް ފަހުން ސީރުޔާގެ  އާއިލާއެއް ސަލާމަތްކޮށްފިއެވެ.

ކިރިކިސްތާންގެ ރެސްކިޔު ޓީމަކުން ހޮނިހިރު ދުވަހު ކުރި މަސައްކަތުން ސަލާމަތް ކޮށްފައިވަނީ ތުރްކިޔޭގެ އަންޓާކްޔާގައި ދިރިއުޅުނު ސީރިޔާގެ އާއިލާއެއްގެ ފަސް މެމްބަރެކެވެ.

އެއީ ތިން ކުދިންނާއި މަންމަ އަކާއި ބައްޕައެއް ހިމެނޭ އާއިލާއެކެވެ. މަންމަ އާއި ބައްޕަ އާއި އެކު އެއް ކުއްޖަކު ވަނީ ސަލާމަތް ކުރެވިފައެވެ. އެކުއްޖާގެ އެއްމާބަނޑު ކޮއްކޮ އާއި ދޮއްޓަށް ހުންނަ ދައްތަ ވަނީ އިމާރާތުގެ ދަށުން ނެގި ފަހުން ޑީހައިޑްރޭޝަންގެ ސަބަބުން ނިޔާވެފައެވެ.

Advertisement

"މީގެ ގަޑިއެއްހާއިރު ކުރިން ކޮންނަމުން ދިޔައީ، ދަނިކޮށް ބަޔަކު ގޮވާއަޑު އިވުނީ، ދިރިތިއްބަ މީހުން ފެނުނީމަ ވަރަށް އުފާވޭ އަބަދުވެސް" ރެސްކިޔު ޓީމުގެ މެމްބަރެއް ކަމަށްވާ އަޓޭ އޮސްމާނޮވް ބުނެފައިވެއެވެ.

ރެސްކިޔު ޓީމް އެވަގުތު މަސައްކަތް ކުރަމުންދިޔައިރު ޓްރެފިކް ހުއްޓުވައިގެން 10 އެމްބިޔުލާންސް އޮތީ ތައްޔާރަށް ކަމަށް އަލްޖަޒީރާގައި ބުނެފައިވެއެވެ.

ރެސްކިޔުޓީމުން އެތަނުގައި ތިބި އެންމެންނަށް އެންގީ އަޑުމަޑު ކުރުމަށް ކަމަށާއި އެއްވެސް އަޑެއް ނީއްވުމަށް ކަމަށް އަލްޖަޒީރާގައި ރިޕޯޓު ކޮށްފައިވެއެވެ. ރެސްކިޔު ޓީމުން ހަލާކުވެފައި އޮތް އިމާރާތުގެ މައްޗަށް އެރީ އިލެކްޓްރިކް ޑިޓެކްރަކާއި އެކު ކަމަށާއި އެ އާއިލާ ފެނުނީ އެހެން މަސައްކަތް ކުރަމުން ދަނިކޮށް ކަމަށް އަލްޖަޒީރާގައި ބުނެފައިވެއެވެ.

ޓީމުތަކަށް ދިރިތިބި މީހުން ފެނުނު ނަމަވެސް، ދިރިތިއްބައި ފެންނަ މީހުން ވަނީ މަދުވެފައެވެ. އަންކާރާގައި ހުރި އަލްޖަޒީރާގެ ރިޕޯޓަރު ސިނެމް ކޮސެގުލް ބުނެފައިވަނީ ބިންހެލުމުގެ އަސަރުކޮށް ސަލާމަތް ވެފައި ތިބި މީހުން ތިބީ އަދިވެސް ރެސްކިޔު ޓީމުތަކުން މީހުން ހޯދުމުގެ މަސައްކަތް ކުރިއަށް ގެންދާނެ ކަމުގެ އުންމީދުގައި ކަމަށެވެ.

"ބައެއް މީހުން އެބައުޅޭ އާއިލާ މީހުންގެ ހަބަރެއް ނުލިބިގެން، މަރުވީކަމެއް، ސަލާމަތުން ތިބި ކަމެއް، ހޮސްޕިޓަލުގައި ކަމެއް ވެސް ނޭނގޭ، އެއްވެސް މައުލޫމާތެއް އެމީހުންނަށް ލިބިފައެއް ނުވޭ" ސެނިމް ބުނެފައިވެއެވެ.