ތިލަފުށިން ބީލަމުގެ އުސޫލުން ބިން ދޫކުރާއިރު ބޭރު ފަރާތްތަކަށް ބިން ދޫކުރާނީ ކުއްޔަށް ކަމަށާއި، އަދި އެފަދައިން ބިންތައް ދޫކުރާނީ ރާއްޖޭގައި ވިޔަފާރި ކުރުމުގެ ހުއްދަ އޮންނަ ފަރާތްތަކަށް އެކަނި ކަމަށް ހައުސިން ޑިވެލޮޕްމަންޓު ކޯޕަރޭޝަން(އެޗްޑީސީ) އިން ބުނެފިއެވެ.
އެޗްޑީސީއިން ކޮށްފައިވަނާ އިއުލާނެއްގައި ބުނެފައިވަނީ ތިލަފުށިން 150 ހެކްޓަރުގެ ބިން ހިއްކުމަށް ނިންމާފައިވާކަމަށެވެ. އަދި އެ ބިންތަކުގެ ތެރެއިން 4.3 ހެކްޓަރު (ވަކި 50 ޕްލޮޓެއްގެ ގޮތުގައި) ބީލަމުގެ އުސޫލުން ދޫކުރުމަށް 2023 ފެބުރުއަރީ 7 ވަނަ ދުވަހު އެ ކުންފުނިން އިއުލާނު ކޮށްފައިވާ ކަމަށެވެ.
އެ ބިންތައް ދޫކުރުމުގައި 100 ޕަސެންޓު ދިވެހި ކުންފުނިތަކަށް ބިން ގަތުމުގެ ފުރުސަތު ހުޅުވާލާފައިވާކަމަށް އެޗްޑީސީއިން ވަނީ ބުނެފައެވެ.
އެޗްޑީސީއިން ބުނީ ބޭރުގެ ފަރާތްތަކަށް އެ ބީލަމުގައި ބައިވެރިވެވޭނީ އެ ވިޔަފާރިތަކަކީ ސަރުކާރުގެ ފޮރިން ޑިރެކްޓު އިންވެސްޓުމަންޓު ޕޮލިސީގެ ދަށުން އެފަރާތްތަކުން ކުރަން ގަސްދުކުރާ ވިޔަފާރިއަކަށް ހުއްދަ އޮތް އަދި ރާއްޖޭގައި ރަޖިސްޓްރީކޮށްފައިވާ ކުންފުނިތަކަށް ކަމަށެވެ. އެފަދަ ކުންފުނިތަކަށްވެސް ބިން ދޫކުރާނީ ކުއްޔަކަށް ކަމަށް އެޗްޑީސީން ވަނީ ބުނެފައެވެ.
އޭގެ ތެރޭގައި ޕްރޮޖެކްޓު ބޭސިސްގައި ކޮންސްޓްރަކްޝަން މަޝްރޫއުތައް ހިންގުމަށް ހުއްދަދެވިފައިވާ ކުންފުނިތަކަށް އެ ބީލަމުގައި ބައިވެރިއެއް ނުވެވޭނެކަމަށް އެޗްޑީސީއިން ވަނީ ބުނެފައެވެ.
އޭގެ އިތުރުން އެޗްޑީސީން ބުނީ ބިން ކުއްޔަށް ނެގުމަށް ހުށައަޅާ ބޭރުގެ ކުންފުނިތަކުން ބިން ބޭނުންކުރުމަށް ހުށައަޅާފައިވާ އިންޑަސްޓްރިއަލް ބޭނުންތަކަކީ އެފަރާތްތަކަށް އެފް.ޑީ.އައި ޕޮލިސީގެ ދަށުން ހުއްދަދެވިފައިވާ ވިޔަފާރި ބޭނުންތަކެއްތޯ އެ ކުންފުނިން މިނިސްޓްރީ އޮފް އެކޮނޮމިކް ޑިވެލޮޕްމަންޓާއެކު މަސައްކަތްކޮށްގެން ބީލަމުގެ ޕްރޮސެސްގެ ބައެއްގެ ގޮތުގައި ވެރިފައި ކުރާނެކަށެވެ.
ތިލަފުށިން ބިން ދޫކުރުމަށް އެޗްޑީސީން ކުރަމުންދާ މަސައްކަތަކީ ރާއްޖޭގައި ސިނާއީ މަސައްކަތްތައް ކުރުމަށް ހުރި ދަތިތަކަށް ހައްލެއް ހޯދާދިނުމުގެ ގޮތުންނާއި، އެފަދަ ފުރުސަތުތަކުގެ ތެރެއިން އިޤްތިޞާދީ އާ މަސައްކަތްތަކަށް ޖާގަ ހޯދައިދިނުމުގެ މަޤްސަދުގައި ކުރިއަށް ގެންދާ މަސައްކަތެއްކަމަށް އެ ކުންފުން ވަނީ ބުނެފައެވެ.
އެފަދަ ވިޔަފާރިތަކުން ރައްޔިތުންނަށް ފޯރުކޮށްދެވޭ އެކިއެކި ޚިދުމަތްތަކަށްވެސް ރަނގަޅު ބަދަލުތަކެއް އަންނާނެކަމަށް ގަބޫލުކުރެވޭކަމަށް އެޗްޑީސީން ބުނެފައިވެ އެވެ.
Advertisement
This content is created and paid for by advertisers and does not involve Voice Journalists
