އަފްޣާނިސްތާނާއި ޕާކިސްތާނާއި ދެމެދު އޮންނަ ތޮރްޚަމް ބޯޑަރ ބަންދުކޮށްފިއެވެ.
ތޮރްޚަމް ބޯޑަރަކީ ޕާކިސްތާނުން އަފްޣާނިސްތާނަށް އެތެރެވެން އޮންނަ މައި ބޯޑަރެވެ. ބޯޑަރު ބަންދުކުރުމުގެ ކުރިން އެތަނުން ބަޑީގެ އަޑު އިވުނު ކަމަށް އެހިސާބުގެ ރައްޔިތުން ވަނީ ބުނެފައެވެ.
ބޯޑަރު ބަންދުކުރީ ޕާކިސްތާނުން ކަމެއް ނުވަތަ އަފްޣާނިސްތާނުން ކަމެއް ޔަޤީންކުރެވިފައެއް ނުވެއެވެ. ނަމަވެސް މި ބޯޑަރު ބަންދު ކޮށްފައިމިވަނީ އަފްޣާނިސްޠާނުގައި ވެރިކަން ކުރާ ޠާލިބާނުންނާއި ޕާކިސްތާނުގެ ގުޅުން ވަރަށް ބޮޑަށް ގޯސްވެފައިވާ ހާލަތެއްގައެވެ.
ތޮރްޚަމް އަށް އަފްޣާނިސްޠާނުން ކަނޑައަޅައިފައި ހުރި ކޮމިޝަނަރ މުއްލާ މުހައްމަދް ސިއްދީޤް މީޑިއާ އަށް ބުނެފައިވަނީ ޕާކިސްތާނުން އެމީހުން ވެފައިވާ އެއްބަސްވުމާއި ޚިލާފު ވެފައިވާކަމަށެވެ. އެހެންވެ ބޯޑަރު ބަންދު ވީކަމަށެވެ.
މުއްލާ މުހައްމަދު ވަނީ އަފްޣާނިސްތާނުގެ ރައްޔިތުންނަށް ބޯޑަރު ހުރަސްކުރުން މަނާކޮށްފައެވެ. އަދި ސަރުކާރުން އަންގާއެންގުމެއް އެންގުމުގެ ކުރިން ބޯޑަރު ކައިރިން ދަތުރުކުރުންވެސް ވަނީ މަނާކޮށްފައެވެ.
ޕާކިސްތާނުގެ ޕޮލިސް އޮފިސަރެއް ކަމަށްވާ ޚާލިދް ޚާން ވަނީ ތޮރްޚަމް ބޯޑަރު ބަންދުކުރިކަން ޔަޤީން ކޮށްދީފައެވެ.
އަފްޣާން ޕާކިސްޠާން ގުޅުވައިދޭ މި ބޯޑަރަކީ އެދެޤައުމުގެ ދެމެދުގައި ދަތުރުކުރާ މީހުންނާއި މުދާ އުފުލާ މައި ދޮރާއްޓަށް ވިޔަސް، މި ބޯޑަރަކީ ދެ ގައުމުގެ ކޯޅުމުގައި އަމާންކަން ގެއްލޭ އެންމެ މައި އެއްތަނެވެ.
އެހިސާބުގަނޑުގައި ދިރިއުޅޭ މުހައްމަދު އަލީ ޝިރްވާނީ ބުނެފައިވަނީ ބޯޑަރު ބަންދުކޮށްފައިވަނީ އާދީއްތަ ދުވަހުކަމަށެވެ. އަދި ހޯމަ ދުވަހުގެ ހެނދުނު ބޯޑަރު ކައިރިން ބަޑިޖަހާ އަޑު އިވިފައިވާކަމަށެވެ.
"ބަޑިޖަހާ އަޑު އިވެންފެށީމަ އަހަރެމެން ވަރަށް ކަންބޮޑުވި، އަހަރެމެން ހީކުރީ ދެގައުމުގެ ސިފައިންގެ ދެމެދުގަ ހަނގުރާމަ ފެށީކަމަށް" މުހައްމަދު ބުނެފައިވެއެވެ.
Advertisement
This content is created and paid for by advertisers and does not involve Voice Journalists
