ސެޕްޓެމްބަރ މަހު ބޭއްވުމަށް ހަމަޖެހިފައިވާ އިންތިޚާބުގައި ރައީސް އިބްރާހިމް މުޙައްމަދް ޞާލިޙް އަށް ތާއީދު ކުރުމުގެ ކުރިން މޯލްޑިވްސް ޑިމޮކްރަޓިކް ޕާޓީ (އެމްޑީޕީ) އާއި ޢަދާލަތު ޕާޓީ އާއި ދެޕާޓީއިން މަޝްވަރާ ކުރުމަށް ނިންމައިފިއެވެ.
މިކަމާއި ގުޅިގެން ޢަދާލަތު ޕާޓީ އިން ނެރެފައިވާ ބަޔާނުގައި ބުނެފައިވަނީ ކުރިއަށް އޮތް ރިޔާސީ އިންތިޚާބުގައި ރައީސް އިބްރާހިމް މުޙައްމަދު ޞާލިޙަށް ތާއީދު ކުރުމަށް އެޕާޓީއިން ސިޓީ އަކުން އެދިފައިވާތީ، މިހިނގާ ރިޔާސީ ދައުރުގައި ވޭތުވެދިޔަ ދައުރުތަކާއި އަޅާބަލާއިރު ސަރުކާރުގައި ކުރެވުނު ފަހި ތަޖުރިބާއަށް ރިޢާޔަތްކޮށް އެމްޑީޕީގެ ރިޔާސީ ކެނޑިޑޭޓަށް ޢަދާލަތު ޕާޓީގެ ތާއީދު ދިނުމުގެ ކުރިން އެޕާޓީއާއި މަޝްވަރާ ކުރުމަށް ރޭ ބޭއްވުނު ޢަދާލަތު ޕާޓީގެ ކުއްލި ބައްދަލުވުމަކުން ނިންމައިފައިވާކަމަށެވެ.
ރިޔާސީ ނިޒާމަށް ރާއްޖޭގެ ވެރިކަން ފެށުމަށް އެންމެ ފުރަތަމަ ބޭއްވުނު އިންތިޚާބުގައި ޢަދާލަތުން ފުރަތަމަ ނުކުތީ އެކަންޏެވެ. ނަމަވެސް އިންތިޚާބުގެ ދެވަނަ ބުރުގައި އެމްޑީޕީ، ޖޭޕީ އަދި ޢަދާލަތުން ކޯލިޝަން ހަދައި ވެރިކަން ކާމިޔާބު ކުރީ ކުރީގެ ރައީސް މުހައްމަދު ނަޝީދެވެ.
ވެރިކަމަށް މާގިނަ ދުވަސްތަކެއް ނުވެ ފެނިގެންދިޔައީ ކޯލިޝަން ރޫޅި އެމްޑީޕީ އިން އެކަނި ވެރިކަން ކުރަން ފެށީތަނެވެ. އެއާއި އެކު މާގިނަ ދުވަސްތަކެއް ނުވެ މަގުމަތީގައި ކުރެވުނު ވަރުގަދަ މުޒާހަރާ ތަކަށް ފަހު 2012 ވަނަ އަހަރުގެ ފެބްރުއަރީ 7 ވަނަ ދުވަހު ރައީސް ނަޝީދު ވެރިކަމުން އިސްތިއުފާ ދެއްވިއެވެ.
އެއަށް ފަހު ރާއްޖޭގެ ވެރިކަން ކުރެއްވީ އޭރު އިންތިޚާބު ވެފައި ހުންނެވި ނައިބު ރައީސް ޑރ ވަހީދެވެ.
އެއާއި ޖެހިގެން އައި އިންތިޚާބުގައި ވެސް ޕީޕީއެމް، ޖޭޕީ، ޢަދާލަތު އަދި އެމްޑީއޭ ފަދަ ޕާޓީތައް އެކުވެ ކޯލިޝަން ހަދައިގެން ވެރިކަން ކާމިޔާބު ކުރިއެވެ. އެސަރުކާރަށް ފެށުނުތާ މާގިނަ ދުވަސް ތަކެއް ނުވެ ކޯލިޝަން ރޫޅި ކޯލިޝަންގެ ބައިވެރިން ޖަލަށް ލެވުނުމަންޒަރުވެސް ފެނިގެންދިޔައެވެ. އޭގެ ތެރޭގައި ޢަދާލަތު ޕާޓީގެ ރައީސް އަދި މިހާރުގެ ހޯމް މިނިސްޓަރ ޢިމްރާން ޢަބްދުﷲ ވެސް ހިމެނެއެވެ.
އެންމެ ފަހުން ރާއްޖޭގައި ބޭއްވުނު އިންތިޚާބުވެސް ކާމިޔާބު ކުރީ ކޯލިޝަނާއި އެކު އެވެ. އަދި ފާހަގަ ކޮށްލަން ޖެހޭ ކަމަކީ ދައުރު ނިމުމާއި ހަމައަށް އައިރު އެތެރެއިން ކޮންމެ ގޮތަކަށް އޮތަސް ކެބިނެޓް އަދިވެސް އޮތީ ކޯލިޝަންގެ މަތީގައި ކަމެވެ.
Advertisement
This content is created and paid for by advertisers and does not involve Voice Journalists
