މިއަހަރުގެ ސެޕްޓެމްބަރ މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ޢަދާލަތު ޕާޓީ އިން ރައީސް އިބްރާހިމް މުޙައްމަދް ޞާލިޙަށް ތާއީދު ކުރަން ނިންމި ނިންމުމަށް އެމަނިކުފާނު މަރުޙަބާ ދަންނަވައިފިއެވެ.

ރައީސް ޞާލިޙް ޢަދާލަތަށް މަރުޙަބާ ދަންނަވައި ކުރައްވާފައިވާ ޓްވީޓުގައި ވަނީ 2023 ގެ ރިޔާސީ އިންތިޚާބުގައި ޢަދާލަތު ޕާޓީން އެމްޑީޕީއާ ގުޅިގެން ކުރިޔަށްދިއުމަށް ނިންމި ނިންމުމަށް މަރުޚަބާއާއި ޝުކުރުދަންނަވާ ކަމަށެވެ.

2018 ގައި ބޭއްވުނު ރިޔާސީ އިންތިޚާބު އެމްޑީޕީ އިން ކާމިޔާބު ކުރީވެސް ޢަދާލަތު ޕާޓީ ހިމެނޭގޮތަށް އޮތް ކޯލިޝަނަކުންނެވެ. އަދި ކޯލިޝަނުން ވަކިނުވެ އަދިވެސް ޢަދާލަތުން ރައީސް ޞާލިޙާއި އެކު ދަނީ މަސައްކަތް ކުރަމުންނެވެ.

ޢަދާލަތުން ރައީސް ޞާލިޙަށް ތާއީދު ކުރާކަން އިޢްލާނުކޮށް ވަނީ ޤަރާރެއް ނެރެފައެވެ. އެޤަރާރުގައި ވަނީ އެމްޑީޕީގެ ރިޔާސީ ކެނޑިޑޭޓު، ރައީސުލްޖުމްހޫރިއްޔާ އަލްފާޟިލް އިބްރާހީމް މުޙައްމަދު ޞާލިޙު، 2023 ވަނަ އަހަރުގެ ރިޔާސީ އިންތިޚާބުގައި ޢަދާލަތު ޕާޓީއިން އެމަނިކުފާނަށް ތާއީދުކޮށް ގުޅިފައިވާ ސަރުކާރެއް އެކުލަވާލުމުގެ މަޝްވަރާއަށް ދައުވަތު އަރުވާފައިވާ ކަމަށެވެ.

އަދި އެގޮތަށް ނިންމީ ފެބްރުއަރީ ގައި ބޭއްވުނު ބައްދަލުވުމުގައި މަޝްވަރާ ކުރެވުނު ކަންތައްތަކަށް ފަހުގައި ކަމަށް ބުނެފައިވެއެވެ.

އެކަންތައްތަކުގެ ތެރޭގައި މާތްވެގެންވާ އިސްލާމް ދީނުގެ ސައްޙަ އަޤީދާ ކުރިއަރުވާ ދެމެހެއްޓުމަށާއި، ދިވެހިރާއްޖޭގެ އިސްލާމީ ޝަޚްސިއްޔަތު ހަރުދަނާކޮށް، ދިވެހި ރައްޔިތުންގެ ދީނީ އެއްބައިވަންތަކަން ނެގެހެއްޓުން ހިމެނެއެވެ.

މީގެ އިތުރުން މާތްވެގެންވާ އިސްލާމް ދީނުގެ ސައްޙަ އަޤީދާ ކުރިއަރުވާ ދެމެހެއްޓުމަށާއި، ދިވެހިރާއްޖޭގެ އިސްލާމީ ޝަޚްސިއްޔަތު ހަރުދަނާކޮށް، ދިވެހި ރައްޔިތުންގެ ދީނީ އެއްބައިވަންތަކަން ނެގެހެއްޓުމަށާއި، ދިވެހިރާއްޖޭގެ މިނިވަންކަމާއި އިސްތިޤުލާލު ރައްކާތެރިކޮށް ދިވެހި ދައުލަތުގެ ސިޔާދަތީ ބާރު ދަމަހައްޓާ، ދިވެހިރާއްޖޭގެ ސުލްޙަމަސަލަސްކަން ދަމަހައްޓާ، ދިވެހިންގެ މެދުގައި އެކުވެރިކަމާއި އެއްބައިވަންތަކަން ޤާއިމުކުރުން ހިމެނެއެވެ.

ޢަދާލަތުން ބުނެފައިވަނީ ރިޔާސީ އިންތިޚާބުގައި ވާދަކުރުމަށް ހުށަހަޅާ މެނިފެސްޓޯ އެކުލަވާލުމުގައި އިސްލާމީ އުސޫލުތަކާއި ހަމަތަކުގެ އިތުރުން ދެފުށްފެންނަ ފުރިހަމަ ލާމަރުކަޒީ އުސޫލުތަކަށާއި އާއިލާތަކުގެ ދުޅަހެޔޮކަމާއި އިޖުތިމާއީ ޢަދާލަތު ޤާއިމުކުރުމަށް އިސްކަން ދިނުމަށާއި، މެނިފެސްޓޯ އެކުލަވާލުމުގައި ޢަދާލަތު ޕާޓީގެ ބައިވެރިވުން ފުރިހަމަޔަށް ހޯދުމަށް ރައީސް ޞާލިހު އާއި އެކު އެއްބަސްވެފައިވާ ކަމަށެވެ. 

އަދި އެ މަސްލަޙަތު ޙިމާޔަތްކުރުމަށްޓަކައި އެންމެ ފަހިކޮށް ޢަދާލަތު ޕާޓީ އަށް މަސައްކަތްކުރެވެން އޮތީވެސް 2023 ވަނަ އަހަރުގެ ރިޔާސީ އިންތިޚާބުގައި އެމް.ޑީ.ޕީގެ ރިޔާސީ ކެނޑިޑޭޓު، ރައީސުލްޖުމްހޫރިއްޔާ އަލްފާޟިލް އިބްރާހީމް މުހައްމަދު ޞާލިޙު އިންތިޚާބު ކޮށްގެން ކަމަށް ޢަދާލަތު ޕާޓީގެ މަޝްވަރާ މަޖިލީހަށް ފެންނަ ކަމަށްވެސް ބުނެފައިވެއެވެ.  ވުމާއެކު، ޢަދާލަތު ޕާޓީގެ ދުސްތޫރުގެ 49.3 ވަނަ މާއްދާގައި ބަޔާންކުރާ އެއްބަސްވުން އެކުލަވާލުމަށްފަހު 2023 ވަނަ އަހަރުގެ ރިޔާސީ އިންތިޚާބުގައި އެމް.ޑީ.ޕީގެ ރިޔާސީ ކެނޑިޑޭޓު، ރައީސުލްޖުމްހޫރިއްޔާ އަލްފާޟިލް އިބްރާހީމް މުހައްމަދު ޞާލިޙަށް ތާއީދުކުރުމަށް ޢަދާލަތު ޕާޓީގެ މަޝްވަރާ މަޖިލީހުން އިޤުރާރުވާ ކަމަށްވެސް އޭގައި ބުނެފައި ވެއެވެ. 

އަދާލަތުން ރައީސް ޞާލިހަށް ތާއީދު ކުރަން ނިންމާފައިވާއިރު، ވިޔަފާރިވެރިޔާ އަހުމަދު ސިޔާމް (ސަން ސިޔާމް)  ވެރިކަމަށް ކުރިމަތި ލެއްވުމަށް ގެންގުޅުއްވި ފިކުރު ދޫކުރައްވައި ރައީސް ޞާލިޙަށް ތާއީދު ކުރުމަށް، ސިޔާމް ރައީސް އެއްގެ މަގާމު އަދާކުރައްވާ އެމްޑީއޭގެ ތެރޭގައި ވެސް ވަނީ މަޝްވަރާ ކުރެވެން ފަށައިފައެވެ.