ފަލަސްޠީނުގެ ހުޅަނގު އައްސޭރީގެ ނާބުލްސް ގައި އިޒްރާއިލްގެ ހައްދު ފަހަނަ އެޅި ޔަހޫދީ ސިފައިން ހިންގި މިލިޓަރީ ރެއިޑްގައި ޝަހީދުވި މީހުންގެ ޢަދަދު 10 އަކަށް އަރައިފިއެވެ.

ފަލަސްޠީނުގެ ހެލްތް މިނިސްޓްރީ އިން ހާމަކޮށްފައިވާ ގޮތުގައި ރޭގެ ރެއިޑުގައި ބަޑިން ހަމަލާ ދިނުމުގެ ސަބަބުން ޝަހީދުވި މީހުންގެ ޢަދަދު މިހާރު ވަނީ 10 އަކަށް އަރައިފިއެވެ. 102 މީހަކު ޒަހަމް ވެފައިވާ ކަމަށްވެސް އެމިނިސްޓްރީ އިން ވަނީ ވިދާޅުވެފައެވެ. 82 މީހަކަށް ސީދާ އަމާޒުކޮށް ބަޑިޖަހައި ޒަހަމް ވެފައި ވާކަމަށާއި 6 މީހެއްގެ ހާލަތު ވަރަށް ދެރަ ކަމަށް ހެލްތް މިނިސްޓްރީ އިން ބުނެފައިވެއެވެ.

އިޒްރާއިލްގެ ސިފައިން ހަތިޔާރާއި އެކު ހުރި ވެހިކަލްތަކާއި އެކު ރެއިޑުގެ ނަމުގައި ނާބުލްސް އަށް ވަދެގަތުމާއި އެކު ހަމަލާބަދަލުކުރުންތައް ފެށިގެންދިޔައެވެ.

Advertisement

އިޒްރާއިލްގެ ސިފައިން ވެހިކަލްތައް ބޭނުންކޮށް ނާބުލްސް އަށް ވެދެ ނުކުމެވެން އޮތް މަގުތައް ބަންދުކޮށް ހަނގުރާމަވެރިއެއްކަމަށް އެމީހުން ބުނާ ހޮސާމް އިސްލީމް  އާއި މުހައްމަދް އަބްދުލްޣަނީ ހޯދުމަށް ކަމަށް ބުނެ އެހިސާބުގެ ގެއެއް ގެ ވަށައިލައިފައިވެއެވެ.

ނާބުލްސްގައި ހުރެ ރިޕޯޓް ކުރި ނިދާ އިބްރާހިމް ބުނެފައިވަނީ އިޒްރާއިލް ސިފައިން އެއެއް މިއެއް ބެލުމެއް ނެތި ބަޑީގެ ހަމަލާތައް ދެމުންދިޔަ ކަމަށް މަންޒަރުދުށް މީހަކު ބުނިކަމަށެވެ.

"އިޒްރާއިލް ސިފައިން އެގޭގެ އަވައްޓެރިންގެ ގަޔަށް ބަޑިޖެހި ވާހަކަ، ގޭގޭގެ ތެރެއަށް ވަދެ ގޭގެ އެތެރޭގައި ތިބި މީހުންގެ ގަޔަށް ބަޑިޖެހި ވާހަކަ، ބައެއް މީހުން މަސައްކަތު ދަނިކޮށް ބަޑިޖެހި ވާހަކަ އަހަރެމެންނަށް އެބަ އިވޭ، ފަލަސްޠީނުގެ ރައްޔިތުން ބުނަނީ އިޒްރާއިލް ސިފައިން އެހެން ކަންތައްކުރަނީ އެމީހުންނަށް އެކަން މަނާ ކުރާނެ ބަޔަކު ނެތީމަ ކަމަށް، އެމީހުންގެ އަތްތައް ފަލަސްތީނުގެ ރައްޔިތުން މެރުމަށް މިނިވަން ކަމާއި އެކު ދޫކޮށްލެވިފައިވާކަމަށް" ނިދާ ބުނެފައިވެއެވެ.