ކުރިއަށް އޮތް ރިޔާސީ އިންތިޚާބުގައި ސަރުކާރު ހިންގާ މައި ޕާޓީ، އެމްޑީޕީން، އެމްޑީއޭ އާއި އެކު ކޯލިޝަން ހަދަން މަޝްވަރާ ކޮށްފިއެވެ. 

އެމްޑީޕީ އާއި އެކު ބޭއްވުނު މަޝްވަރާ ބައްދަލުވުމުގެ ފޮޓޯ އާއްމު ކުރައްވައި އެމްޑީއޭއިން މިއަދު ކުރި ޓުވީޓެއްގައި ބުނީ، ރިޔާސީ އިންތިހާބުގައި އެމްޑީޕީ އާއި އެކު ކޯލިޝަން ހެދުމާއި މެދު މަޝްވަރާތަށް ކުރެވިފައިވާ ކަމަށާ، އެ ބައްދަލުވުމުގެ ތެރެއިން އެ ޕާޓީން ހުށަހަޅާ ހުށަހެޅުންތަކާއި، އެމްޑީޕީން ހުށަހަޅާފައިވާ ހުށަހެޅުންތަކާއި ގުޅޭގޮތުން ވެސް ވާހަކަ ދެކެވިފައިވާ ކަމަށެވެ. 

މި ބައްދަލުމުގައި އެމްޑީޕީގެ ފަރާތުން އެ ޕާޓީގެ ޗެއާޕާސަން ފައްޔާޟް އިސްމާއިލް އާއި، އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) ވަނީ ބައިވެރިވެ ވަޑައިގެންފަ އެވެ. 

Advertisement

އަދި އެމްޑީއޭގެ ފަރާތުން އެ ޕާޓީގެ ރައީސް އަހުމަދު ސިޔާމް (ސަން ސިޔާމް) އާއި ނާއިބު ރައީސް އަލީ މައުރޫފްގެ އިތުރުން ޕާޓީގެ އެހެނިހެން އިސް ފަރާތްތަކުން ވަނީ ބައިވެރިވެފައެވެ. 

އެމްޑީޕީން އެމްޑީއޭ އާއި ބައްދަލު ކޮށްފައިވާއިރު، އިދިކޮޅު ޕީޕީއެމުން ވެސް ވަނީ އެމްޑީއޭ އާއި އެކު ކޯލިޝަން ހެދުމުގެ ޝައުގުވެރިކަން ފާޅުކޮށްފައެވެ. 

އެކަމާއި ގުޅިގެން ލީޑަރުން، އެމްޑީއޭއާއި އެކު މަޝްވަރާ ބައްދަލުވުމެއް މިއަދު ހަވީރު 5:00 ގައި ބޭއްވުމަށް ހަމަޖެހިފައިވާ ކަމަށްވެސް އިދިކޮޅުން ބުނެފައިވެއެވެ.  

ކޯލިޝަން ހެދުމަށް ޝައުގުވެރިވާ ހުރިހާ ޕާޓީތަކަށް ވެސް މަޝްވަރާ ކުރުމުގެ ފުރުސަތު މިއަދުން ފެށިގެން އޮތް ކަމަށް އެމްޑީއޭއިން ވަނީ ބުނެފައެވެ.