މާލޭ ބޮޑުތަކުރުފާނު މަގު މަރާމާތު ކޮށްދޭނެ ބަޔަކު ހޯދުމަށް މާލޭ ސިޓީ ކައުންސިލުން އިއްލާނުކޮށްފިއެވެ.

މާލޭ ސިޓީ ކައުންސިލުން ސަރުކާރުގެ ގެޒެޓްގައި ކޮށްފައިވާ އިއްލާނުގައި ބުނެފައިވަނީ މާލޭގެ ބޮޑުތަކުރުފާނުމަގުގައި އަޅާފައިވާ ތާރުފަށަލަ ހަލާކުވެފައިވާތީ، އެ މަގު މަރާމާތު ކޮށްދޭނެ ފަރާތެއް ހޯދުމަށް ބޭނުންވާކަމަށެވެ. ވީމާ އެ މަސައްކަތަށް ޝައުގުވެރިވާ ލޯކަލް އަދި އިންޓަރނޭޝަނަލް ފަރާތްތަކުން (ކުންފުނި އަދި ޕާޓްނަރޝިޕްތައް) މި މަސައްކަތަށް ބީލަން ހުށަހެޅުމުގެ ފުރުސަތު ހުޅުވާލާކަމަށެވެ.

 އެ މަސައްކަތް އެ ކައުންސިލަށް ކޮށްދެއްވުމަށް ޝައުގުވެރިކަން ހުރި ފަރާތްތަކުން މަޢުލޫމާތު  ސާފުކުރެއްވުމަށް މާރޗް 1 ވާދުވަހުގެ 12:00 އަށް މާލެ ސިޓީ ކައުންސިލްގެ އިދާރާ ހ ހުޅަގަލި، ފުރަތަމަ ފަންގިފިލާގައި ހުންނަ އެޑްމިން ސެކްޝަންގެ މީޓިންގ ރޫމް އަށް ވަޑައިގަތުމަށް އެކައުންސިލުން ބުނެފައިވެއެވެ.

އަދި އަގުހުށައެޅުމަށް 8 މާރޗް 2023 ވާ ދުވަހުގެ 11:00 ގެ ކުރިން އެކައުންސިލްގެ އިދާރާއަށް ހުށައެޅުމަށް އެކައުންސިލުން އެދިފައިވެއެވެ.

މާލެ ސިޓީ ކައުންސިލުން ވިދާޅުވެފައިވަނީ އެކަންސިލުން ދަންނަވާފައިވާ ގަޑީގައި މަޢުލޫމާތު ސާފުކުރައްވަން ވަޑައިނުގަންނަވާ ފަރާތްތަކާއި ގަޑިޖެހުމުގެ ފަހުން އަންދާސީ ހިސާބު ހުށަހަޅުއްވަން ހާޒިރުވާ ފަރާތްތަކުގެ އަންދާސީ ހިސާބު ބަލައި ނުގަނެވޭނެކަމަށެވެ.

 އަގު ހުށަހެޅުމުގައި ބައިވެރިވެވޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމަންޓް، ވިޔަފާރި ކުރުމުގެ ހުއްދަ ލިބިފައިވާ ފަރާތްތަކަށް ކަމަށް އެކައުންސިލުން ބުނެފައިވެއެވެ.

އަދި އިތުރު މައުލޫމާތު ހޯދުމަށް  މާލޭ ސިޓީ ކައުންސިލްގެ އިދާރާގެ ޕްރޮކިއުމަންޓް ސެކްޝަން ފޯން  3025487 އަށް ގުޅުއްވުމަށާއި   [email protected] އީމެއިލް ކުރެއްވުމަށް އެކައުންސިލުން ވިދާޅުވެފައިވެއެވެ.