ތުރްކިޔޭ އާއި ސީރިޔާ އަށް އައި ބިންހެލުން ތަކުގައި ބޯހިޔަވަހިކަން ގެއްލި އެހީތެރިކަމަށް ބޭނުންޖެހިފައި ތިބި 120 އާއިލާއަކަށް ދިވެހިންގެ އެހީ ތެރިކަމާއި އެކު ކާބޯތަކެތި ފޯރު ކޮށްދެވިފައިވާ ކަމަށް އިންޓަނޭޝަނަލް އެއިޑް ކެމްޕެއިން އިން ބުނެފިއެވެ.
ބިންހެލުން ތަކުގެ ސަބަބުން ބޯހިޔާވަހިކަން ގެއްލިފައިވާ ފަރާތްތަކަށް ކާބޯތަކެތީގެ ޕެކޭޖްތައް ފޯރުކޮށްދިނުމުގެ މަސައްކަތް މާދަމާވެސް ކުރިއަށް ދާނެ ކަމަށް އައިއޭސީ އިން ވަނީ ބުނެފަ އެވެ. ބިންހެލުން ތަކުގެ ސަބަބުން މިހާތަނަށް 7.1 މިލިއަން ކުޑަކުދިން ހާލުގައި ޖެހިފައިވާކަމަށްވެސް އެ ކެމްޕޭނުން ވަނީ ބުނެފައެވެ.
ތުރްކިޔޭ އާއި ސީރިޔާ އަށް އައި ބިންހެލުން ތަކުގައި ހާލުގައި ޖެހުނު ފަރާތްތަކަށް އެހީވުމަށް ފަންޑު ހޯދުމަށް "އެއްއުންމަތެކޭމީ" މިނަމުގައި މިހާރުވެސް ރާއްޖޭގައި ކެމްޕޭނެއް ދަނީ ހިންގަމުންނެވެ.
މިދިޔަ ހުކުރު ދުވަހު މިކެމްޕޭނުގެ ދަށުން ބެހެއްޓި ފަންޑު ފޮށިތަކާއި ބޭންކް ޓްރާންސްފަރ އިން އެއް މިލިއަން ރުފިޔަ އެދުވަހު އެކަނި ވަނީ ޖަމާކޮށްފައެވެ.
މި ކެމްޕޭނަކީ ރާއްޖޭގެ ދީނީ ޢިލްމުވެރިންނާއި ބައެއް މަދަނީ ޖަމިއްޔާތައް ގުޅިގެން ކުރިއަށްގެންދާ ކެމްޕޭނެކެވެ. މިކަމުގައި ބައިވެރިވަނީ ދީނީ ޢިލްމުވެރިން، އައިއީސީސީ، މަހަލްދީބް ފައުންޑޭޝަން، އައިއޭސީ، ފަތިސް ލީގް، ޚިދްމަތް ޖަމިއްޔާ، ނަސީހާ، އަލް ޤަލަމް، ޔޫއައިއެސް، ދަރުމަ ފައުންޑޭޝަން، ޒާދުލް ޚައިރް، މަރސިފުލް ސޮސައިޓީ އަދި އެސްއެމްޑީ މާފަރު ޖަމިއްޔާ އެވެ.
Advertisement
This content is created and paid for by advertisers and does not involve Voice Journalists
