ވިސްނާނުލައި ގަވާއިދާ ޚިލާފަށް ސައިކަލާއި ކާރު ދުއްވުމުގެ ސަބަބުން އޭގެ ގެއްލުމާއި ހަލާކު ކުރިމަތިވަނީ ހަމައެކަނި އެ ދުއްވާ މީހާއަށް ނޫން ކަމަށް މިއަދުގެ ޚުތުބާގައި ބުނެފިއެވެ.

ނަފްސު ރައްކާތެރިކުރުމުގެ މުހިންމު ކަމުގެ މައްޗަށް އަލިއަޅުވާލާފައިވާ މިއަދުގެ ޚުތުބާގައި ވަނީ އިހްސާން ތެރިއަކަށް ވުމަށް އެންމެނަށް ނަސޭހަތްތެރިވެފައެވެ. އަދި އިހްސާންތެރިކަމުގެ ތެރޭގައި ތިމާގެ އަމިއްލަ ނަފްސާއި އެހެން މީހުންގެ ނަފްސުތައް ރައްކާތެރިކުރުމާއި ނުރައްކަލަށް ހުށަނޭޅުން ހިމެނޭ ކަމަށްވެސް ބުނެފައިވެއެވެ.

"މަގުމަތީގައި ދުއްވަން ކަނޑައެޅިފައިވާ ބާރު މިނާއި ޚިލާފަށް އެއްގަމު އުޅަނދު ދުއްވުމާއި، ކަނޑުމަތީގައި ދުއްވާ އުޅަނދު ދުއްވުމަކީ ނަފްސު ހަލާކަށް އެއްލައިލުމެކެވެ. މަގުމަތީގައި ނުވަތަ ކަނޑުމަތީގައި އެކަކު އަނެކަކާއި ވާދަކޮށް ރޭސް ޖެހުމަކީ ނަފްސު ހަލާކުގެ ތެރެއަށް ހުށަހެޅުމެކެވެ. ވަރުބަލިވެ ނިދިއައިސް ތާއްޔާ ޖެހެމުންދާ ހިނދު، ނުވަތަ ތިމާގެ ނަފްސު ކޮންޓްރޯލް ނުކުރެވޭ ހާލަތުގައި މަގުމަށްޗަށް ނުކުމެ އުޅުމަކީވެސް ނަފްސު ހަލާކުގެ ތެރެއަށް އެއްލައިލުމެކެވެ."

Advertisement

"ފޯނާއި ކުޅެމުން އުޅަނދު ދުއްވަނިކޮށް އެކްސިޑެންޓްވަނީ ކިހާވަރަކަށް ހެއްޔެވެ؟ މަގުމަތި އޮތީ ހުސްކޮށް ކަމަށް ހީކޮށް، ހިސާބަށްވުރެ ބާރަށް ދުއްވަނިކޮށް ނުރައްކާތެރި ހާދިސާތައް ހިނގާފައި ހުރީ ކިތައްފަހަރު ހެއްޔެވެ؟" ޚުތުބާގައި ސުވާލު ކޮށްފައިވެއެވެ.  

މިއާއެކު ޚުތުބާގައި ވަނީ، އެފަދަ ކަންކަމުގެ ނަތީޖާއެއްގެ ގޮތުން އެތައް މަޔަކު ކަރުނަ އަޅައި އެތައް ދަރިން ޔަތީމް ވެ އަނބިން ހުވަފަތް ވެގެންދާކަމަށް ބުނެފައެވެ. އަދި އެފަދަ ހާދިސާ ތަކުގައި އަނިޔާވެ ގެއްލުންވަނީ ގިނައިން ޒުވާނުން ކަމަށްވާއިރު، އޭގެ ސަބަބުން އެ ގެއްލިގެންދަނީ އުފެއްދުންތެރިކަމާއި ހަކަތައަށް ގައުމު އެދިއެދި ތިބި ބައެއް ކަމަށްވެސް ބުނެފައިވެއެވެ. 

އަދި މީގެ އިތުރުން، ގަވާއިދާއި ޚިލާފަށް ސައިކަލާއި ކާރު ދުއްވުމުގެ ސަބަބުން އޭގެ ގެއްލުމާއި ހަލާކު ކުރިމަތިވަނީ ހަމައެކަނި އެ ދުއްވާ މީހާއަށް ނޫން ކަން ފާހަގަކޮށް ޚުތުބާގައި ވަނީ އޭގެ ސަބަބުން، ބައެއް ފަހަރު މުޅި އާއިލާ ނެތި ފަނާވެގެންދާ ކަމަށެވެ. އަދި އޭގެ ސަބަބުން ބައެއް ފަހަރު ގަވާއިދާއި އެއްގޮތަށް މަގު ހުރަސްކުރަމުންދާ، އެއްވެސް ކުށެއް ނެތް މީހާއަށްވެސް ގެއްލުންވާ ކަމަށް ޚުތުބާގައި ފާހަގަކޮށްފައިވެ އެވެ. 

އެހެންކަމުން، އޭގެ ސަބަބުން އެ ގެއްލުން ދެވުނީ އެތައް ބަޔަކަށް ކަމަށާ، މުސްލިމުންނަކީ އެހެން މީހުންނަށް ގެއްލުންދޭ ބައެއް ނޫން ކަމަށްވެސް ޚުތުބާގައި ފާހަގަކޮށްފައިވެ އެވެ.