ފެބްރުއަރީ 6 ވަނަ ދުވަހު ތުރްކިޔޭ އާއި ސީރިޔާއަށް އައި ބިންހެލުން ތަކުގެ ސަބަބުން މަރުވި މީހުންގެ ޢަދަދު 50.000 އަށް އަރައިފިއެވެ.

ތުރްކިޔޭއިން ބިންހެލުންތަކުގެ އަސަރުކޮށް އިމާރާތްތައް ވެއްޓުނު ޕްރޮވިންސް ތަކުގައި 24،000 ރެސްކިޔު ވޯކަރުން އަދިވެސް ދަނީ މީހުން ހޯދުމުގެ މަސައްކަތް ކުރަމުންނެވެ، ނަމަވެސް ދިރިހުރި މީހެއްގެ އަސަރެއް ނުފެންނަތާ މިހާރު ވަރަށް ގިނަ ވަގުތު ފާއިތުވެގެން ގޮސްފައިވެއެވެ.

ތުރްކިޔޭގެ ޑިޒާސްޓާސް މެނޭޖްމަންޓުން އެންމެ ފަހުން އިއުލާނު ކޮށްފައިވާގޮތުން އެ ގައުމުން 44،218 މީހުން މަރުވެފައިވެއެވެ. ސީރިޔާއިން އެންމެ ފަހުން ދިން އަދާހަމައިގައި ވާގޮތުން އެޤައުމުން މަރުވެފައިވަނީ 5،914 މީހުންނެވެ.

Advertisement

ފެބްރުއަރީ 6 ވަނަ ދުވަހު 7.6 މެގްނެޓިޔުޑް ގައި އައި ބިންހެލުމުގެ ފަހުން ގާތް ގަނޑަކަށް 9000 އެއްހާ "އާފްޓަރޝޮކް" ބިންހެލުން އައި ސަރަހައްދު ތަކަށް އައިސްފައިވާކަމަށް އަލްޖަޒީރާގައި ބުނެފައިވެއެވެ.

ވޮލެންޓިއަރުން ހިމެނޭހެން 24،000 ރެސްކިޔު ވޯކަރުން 11 ޕްރޮވިންސެއްގައި މީހުން ސަލާމަތްކުރުމުގެ މަސައްކަތް ކުރަމުންދެއެވެ. ފުރަތަމަ މަސައްކަތް ފެށިއިރު ގިނަ ސަރައްދުތަކަށް ވަދެ ނުކުންނަށް އުނދަގޫ ވެފައި ވީނަމަވެސް މިހާރު އިމާރާތް ތަކުގެ ގާތަކާއި ފާރުތައް އެއްފަރާތް ކޮށް ސާފު ކުރެވެމުން ދިޔުމުގެ ސަބަބުން އެކަމަށް ވަނީ ފަސޭހަ ކަމެއް ލިބިފައެވެ.

530،000 މީހުން ވަނީ ހަމައެކަނި ތުރްކިޔޭގެ ބިންހެލުން އައި ސަރަހައްދުތަކުން، އެމީހުން ދިރިއުޅުނު ތަންތަނުން ނިކުންނަން ޖެހިފައިވަކަމަށް ތުރްކިޔެގެ ސަރުކާރުން ވަނީ ބުނެފައެވެ. އަދި މީގެ އިތުރުން 173،000 އިމާރާތެއް ރެނދުލައި އަދި އެހެނިހެން ގެއްލުން ތައް ލިބިފައި އެބަހުރިކަމަށް ވެސް ބުނެފައިވެއެވެ. އަދި މީގެ އިތުރުން 1.9 މިލިއަން މީހުން ވަގުތީ ހިޔާތަކާއި ހޮޓެލް ތަކާއި ބައެއް ޕަބްލިކް ފެސިލިޓީސް ތަކުގައި މިވަގުތު ދިރިއުޅެމުން ދާކަމަށް ވެސް ބުނެފައިވެއެވެ.

ތުރްކިޔޭ އިން 20 މިލިއަން އެއްހާ މީހުންނަށް ބިންހެލުމުގެ އަސަރު އެކި މިންވަރަށް ކޮށްފައިވާއިރު ސީރިޔާގެ 8.8 މިލިއަން މީހުންނަށް މިކާރިސާގެ އަސަރު ކޮށްފައިވާނެ ކަމަށް ޔޫއެން އިން ވަނީ ލަފާކޮށްފައެވެ. އެތައް އަހަރެއްގެ ހަނގުރާމައިގެ ސަބަބުން ހަލާކުވެފައި އޮތް ސީރިޔާއިން މައުލޫމާތު ކަށަވަރުކުރުންވެސް ވަނީ  ދަތިވެފައެވެ.

ބިންހެލުން ތަކުގެ އަސަރުކުރި ތުރްކިޔޭގެ ދެކުނުގައި ދިރިއުޅެމުންދިޔަ ސީރިޔާގެ ރައްޔިތުންގެ ތެރެއިން ގިނަ ބަޔަކު ވަނީ އެތަންދޫކޮށް ގޮސްފައެވެ. އެއްބަޔަކު ޓެންޓު ތަކުގައި، އަނެއް ބަޔަކު ކޮންޓެއިނަރ ހައުސް ތަކުގައި އަދި އަނެއްބަޔަކު ސަރުކާރުން ސްޕޮންސަރ ކޮށްފައި ހުރި އެކަމޮޑޭޝަން ތަކުގައި އުޅެމުން އެބަދެއެވެ. ބިންހެލުމުގެ އަސަރުކޮށް ގެދޮރު ގެއްލުމުން ސީރިޔާގެ ބައެއް މީހުން އެނބުރި ސީރިޔާއަށް ވެސް ގޮސްފައިވެއެވެ.

ތުރްކިޔޭގެ ރައީސް ރަޖަބް ޠޮއްޔިބް އުރްދުޣާން ވިދާޅުވެފައިވަނީ އަހަރެއްހާ ދުވަސް ތެރޭގައި ހަލާކުވި އިމާރާތްތަކުގެ ބަދަލުގައި އައު އިމާރާތް ތަކެއް އަޅުއްވައި ދެއްވާނެ ކަމަށެވެ. އުރްދުޣާން ގެ މި ބަސްފުޅާއު މެދު ކަމުގެ ތަޖުރިބާ ކާރުން ވަނީ ކަންބޮޑުވުން ފާޅު ކޮށްފައެވެ. އަދި އަވަސް އަރުވައި ގަތުމަށްވުރެ އިމާރާތް އަޅާ ބިމަކީ ރައްކާތެރި ތަނެއްތޯ ބެލުމަށް ވަނީ ގޮވާލައިފައެވެ.