"އެއްއުންމަތެކޭމީ" ނަމުގައި ތުރްކިޔޭ ސީރިޔާ އަށް އެހީވުމަށް ހުޅުވާލި ކެމްޕެއިންގެ ތެރެއިން ފެބްރުއަރީ 17 ވަނަ ދުވަހު ބެހެއްޓުނު ފަންޑު ފޮށިތަކަށާއި އޮންލައިންކޮށް ލިބުނު ފައިސާގެ ތަފްސީލް ހާމަކޮށްފިއެވެ.

މިޙަރަކާތަކީ ދީނީ ޢިލްމުވެރިންނާއި އަދި އެނޫންވެސް މަދަނީ ޖަމްޢިއްޔާތަކާއި އިތުރު އެހެން ފަރާތްތަކާއިވެސް ގުޅިގެން، އެންމެންގެ ހިއްސާވުމާއިއެކީ ފަތިސް ލީގުން އިސްނަގައިގެން އިންތިޒާމްކޮށްގެން ކުރިޔަށް ގެންދިޔަ ޙަރަކާތެކެވެ. މިޙަރަކާތުގައި ޢަމަލީ ގޮތުން ބައިވެރިވެފައިވަނީ ދީނީ ޢިލްމުވެރިންގެ އިތުރަށް، ފަތިސް ލީގު، މަހަލްދީބް ފައުންޑޭޝަން، އައިއޯސީސީ، ދަރުމަ ފައުންޑޭޝަން، ޒާދުލް ޚައިރް، ޚިދުމަތް، އަލް ހިޖްރަ، ޢަރަބިއްޔާ ޕީޓީއޭ، ހުޅުމާލޭ ކޮމިއުނިޓީ އެލަޔަންސް އަދި ތ.މަޑިފުއްޓާއި ކ.ގުރައިދޫގެ ޒުވާނުންނެވެ.

މިފައިސާ އިންޓަނޭޝަނަލް އެއިޑް ކެމްޕެއިންގ (އައިއޭސީ) އާއި ހަވާލުކުރުމަށް މިދިޔަ ހޯމަ ދުވަހު ބޭއްވި ރަސްމިއްޔާތުގައި މިކަމުގައި އިސްކޮށް ޙަރަކާތްތެރިވި ފަރާތްތަކުންވަނީ މިހުރިހާ ފައިސާއެއް މިހާރު އައިއޭސީއާއި ހަވާލުކުރެވިފައިވާކަމުގެ ޔަޤީންކަން ދެއްވާފައެވެ. އަދި އައިއޭސީގެ ފަރާތުންވެސް އެރަސްމިއްޔާތުގައި މިފައިސާ އެކީގައި ލިބިފައިވާ ކަމަށް ވަނީ ވިދާޅުވެފައެވެ. ޖުމްލަ ލިބުނު ފައިސާކަމަށް އެދުވަހު އިޢުލާނު ކުރެވުނީ 1،147،356.28 ރުފިޔާކަމަށް ވީނަމަވެސް، މިޙަރަކާތަށްވަނީ އެޔަށްވުރެވެސް ގިނައިން ފައިސާ ލިބިފައެވެ.

17 ފެބްރުއަރީ 2023 ގައި ހިންގުނު ފަންޑު ހޯދުމުގެ ހަރަކާތުގައި ލިބިފައިވާ ފައިސާގެ ތަފްސީލް:

ޖުމްލަ ލިބުނު ފައިސާގެ ޢަދަދަކީ: 1،239،287.41 ރުފިޔާ

މާލޭގެ މިސްކިތްތަކުން ލިބުނު ޖުމްލަ: 474،460.50 ރުފިޔާ

ހުޅުމާލޭގެ ފުރަތަމަ ފިޔަވަހީގެ މިސްކިތްތަކުން ލިބުނު ޖުމްލަ: 120،899.21 ރުފިޔާ

ހުޅުމާލޭގެ ދެވަނަ ފިޔަވަހީގެ މިސްކިތްތަކުން ލިބުނު ޖުމްލަ: 24،717.00 ރުފިޔާ

ވިލިމާލޭގެ މިސްކިތްތަކުން ލިބުނު ޖުމްލަ: 30،302.25 ރުފިޔާ

ހުޅުލޭގެ މިސްކިތްތަކުން ލިބުނު ޖުމްލަ: 2،180.00 ރުފިޔާ

އޮންލައިން ޓްރާންސްފަރ: 452،954.83 ރުފިޔާ

ޢަރަބިއްޔާ ސްކޫލްގެ ޕީޓީއޭ: 32،613.00 ރުފިޔާ

މާލޭ ރާޅުގަނޑާއި ހުޅުމާލޭ ރުއްގަނޑު 3 ގައި ބެހެއްޓި 2 ފޮށިން އަދި އެހެނިހެން ޞަދަޤާތުގެ ގޮތުގައި: 36،283.90 ރުފިޔާ .

ތ.މަޑިފުށީ ރައްޔިތުން: 26،500.00 ރުފިޔާ

ކ.ގުރައިދޫ ރައްޔިތުން: 11،000.00 ރުފިޔާ

ބޭރު ފައިސާ (ޑޮލަރ: 1516.00ގެ އިތުރަށް އެހެނިހެން ބޭރު ފައިސާ): 25،376.72 ރުފިޔާ

އެގޮތުން ޖުމްލަ ލިބުނު ފައިސާގެ ޢަދަދަކީ 1،237،287.41 ރުފިޔާއެވެ. ކުރިން 1.1 މިލިއަން ރުފިޔާ ކަމަށް އިޢުލާނު ކުރެވިފައިވަނީ، ހުކުރު ދުވަހު އޮންލައިން ޓްރާންސްފަރގެ ގޮތުގައި ލިބުނުކަމަށް އެހިސާބަށް ފެންނަން ހުރި ޢަދަދުގެ މައްޗަށް ބަލައިގެން ކަމަށް މިކަން އިންތިޒާމު ކޮސް ހިންގާ ފަރާތުން ވިދާޅުވެފައިވެއެވެ.

އޭރު ބޭންކުން ކްލިއަރ ނުވާ ބައެއް ޓްރާންސެކްޝަންތައް ހުރުމުން ހުކުރު ދުވަހު ލިބުނު ހުރިހާ ފައިސާއެއް ހިމެނިފައި ނުވަނީ ކަމަށާއި އެހެންނަމަވެސް ފަހުން ބެލިއިރު ހުކުރު ދުވަހުގެ 23:59 އަކާއި ހިސާބަށް އޮންލައިން ޓްރާންސްފަރއިން ލިބިފައިވާ ފައިސާގެ ޢަދަދު އިތުރުވެފައިވުމުން، ޖުމްލަ ލިބުނު ޢަދަދުވެސް އިތުރުވެފައިވާ ކަމަށްވެސް އެފަރާތުން ވިދާޅުވެފައިވެއެވެ.

މިޙަރަކާތުގައި އިސްކޮށް ޙަރަކާތްތެރިވި ބޭފުޅުން ވިދާޅުވިގޮތުން، އެހާ ކުޑައިރުކޮޅެއްގެ ތެރޭގައި މިހާ ބޮޑު ކާމިޔާބީއެއް ލިބުމުގެ ޙަޤީޤީ ސަބަބަކީ الله ގެ ރަޙްމަތާއި ތައުފީޤަށްފަހު ދިވެހިރާއްޖޭގެ މުސްލިމް އަޚުންނާއި އުޚްތުން ކުރެއްވި ދީލަތި ޞަދަޤާތް ކަމަށެވެ. އަދި ހަމައެހެންމެ ރާއްޖޭގައި މަސައްކަތް ކުރަމުންދާ ބަންގްލަދޭޝްއާއި އެނޫންވެސް ބައެއް ޤައުމުތަކުގެ މުސްލިމުންވެސް މިފަންޑަށް ވަރަށް ބޮޑު ތަރުޙީބެއް ދެއްވިކަމަށް  އެބޭފުޅުން ވިދާޅުވިއެވެ.

އެގޮތުން ވާހަކަ ދައްކަވަމުން ބައެއް ބޭފުޅުން ފާހަގަ ކުރެއްވި ގޮތުގައި ފޮށިތައް ގުނަމުން ދިޔަ އިރު ބައެއް ފޮށިތަކުގައި ފައްސަތޭކައިގެ ނޫޓުން -/10000 އަދި -/15000 ހަމަވާ ވަރަށް އެއް ބޮނޑިއަކަށް ވެސް ފައިސާ ހުރިކަން ވަނީ ފާހަގަވެފައެވެ. މީގެ އިތުރުން ބައެއް މަންމައިން އެކަނބަލުންގެ ދަރިން ގޮވައިގެން މިސްކިތް ކައިރިއަށް އައިސް އެކުދިން ލައްވާ ފަންޑުފޮށިތަކަށް ލާރި ހަދިޔާ ކުރިކަންވެސް ފާހަގަ ކުރެއްވިއެވެ. އަދި މިކަންކަމުން ދޭހަވަނީ ދިވެހިންގެ ދީލަތިކަމާއި އޯގާތެރިކަން ކަމަށާއި، ދިވެހިންނަކީ އަބަދުވެސް އުއްމަތަށް މިހެން ދިމާވާ ހިތާމަވެރި ޙާލަތްތަކުގައި އެހީވުމުގެ ނަމޫނާ ދައްކާ ބައެއް ކަމުގައިވެސް ވަނީ ވިދާޅުވެފައިވެއެވެ.