ކުރިއަށް އޮތް ރިޔާސީ އިންތިޚާބު އެމްޑީޕީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ކާމިޔާބު ކުރެވިދާނެކަމާމެދު އެމްޑީޕީގެ ކުރީގެ ރައީސް އިބްރާހީމް އިސްމާއީލް (އިބްރާ) ސުވާލު އުފެއްދެވުމުން އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއިލް ހޫނު ރައްދެއް ދެއްވައިފި އެވެ.
ކުރިއަށް އޮތް ރިޔާސީ އިންތިޚާބުގެ ފުރަތަމަ ބުރަށް ކޯލިޝަން ހަދަމުން ދާތީ އެކަމަށް ފާޑުވިދާޅުވެ ކުރެއްވި ޓްވީޓެއްގައި އިބުރާ ވިދާޅުވީ ކޯލިޝަނަކާއި ނުލާ ފުރަތަމަ ބުރުވެސް ކާމިޔާބު ނުކުރެވޭނެކަމަށް ޕާޓީގެ އެންމެ އިސް ލީޑަރު ވިދާޅުވަމުންދާ ކަމަށެވެ. އެހެންކަމުން، ދެވަނަ ބުރު ކާމިޔާބު ކުރެވިދާނެ ކަމާމެދު ސުވާލު އުފެދޭކަމަށް އިބުރާ ވިދާޅުވި އެވެ.
"ފުރަތަމަ ބުރެއް ނޫން. ދެވަނަ ބުރުންވެސް ނުވާނެކަމަށް ޕާޓީގެ އިސް ލީޑަރ އެ ވިދާޅުވީ. އެހެންކަމަށް ވާނަމަ ދެވަނަ ބުރުން ކާމިޔާބު ކުރެވޭވަރުގެ އެހެން ޕާޓީއެއް އޮތީ ނޫން ތޯ؟"
އެމްޑީޕީގެ ކުރީގެ ރައީސް އިބްރާހީމް އިސްމާއީލް (އިބްރާ)
އިބުރާގެ އެ ސުވާލަށް ރައްދުދެއްވަމުން އިބުރާއަށްނިސްބަތް ކުރައްވާ ފައްޔާޒު ވިދާޅުވީ އުމުރުން ދުވަސްވެފައި ތިއްބެވި ނަމަވެސް (އިބުރާގެ) ވިސްނުންފުޅު ހަމަ ކޮށީ ކަމަށެވެ. އެހެން ނޫނީ ރައީސް ޞާލިހުއާއި ދޭތެރޭގައި އިބުރާގެ ހިތުގައި އޮތް ނަފްރަތު ބޮޑީކަމަށް ފައްޔާޒު ވިދާޅުވި އެވެ.
ފުރަތަމަ ބުރަށް ކޯލިޝަން ހަދަމުންދާތީ އަމާޒުވި ފާޑުކިޔުންތަކަށް ފައްޔާޒު ރައްދުދެއްވާފައިވާއިރު، އޭނާ އަކީ ރައީސް ޞާލިހުގެ އެންމެ އަރިސް ވަޒީރެވެ.
ރައީސް ޞާލިހަށް ރިޔާސީ ޓިކެޓު ހަވާލުކުރުމުގެ ކުރިން ޕާޓީގެ ކައުންސިލުން ވަނީ އެހެން ސިޔާސީ ޕާޓީތަކާއެކު ކޯލިޝަން ހެދުމުގެ ބާރު ރައީސް ޞާލިހަށް ދެއްވާފަ އެވެ.
އެގޮތުން މިހާތަނަށް އަދާލަތާއި އެމްޑީއޭއިން ވަނީ ރައީށް ޞާލިހައެކު ކޯލިޝަން ހަދަން ނިންމާފަ އެވެ. ޖުމްހޫރީ ޕާޓީގެ ނިންމުމަށް އެންމެންވެސް އިންތިޒާރު ކުރަމުންދާއިރު، ފެންނަ މަންޒަރުތަކަށް ބަލާއިރު ފުރަތަަމަ ބުރުގައި ޖޭޕީން އެމްޑީޕީއާއެކު ކޯލިޝަން ހެދުމަކީ ދުރުގައިވާ ކަމެއްކަމަށް ސިޔާސީ މަޝްރަހު ދިރާސާކުރައްވާ ފަރާތްތައް ދަނީ ވިދާޅުވަމުން ނެވެ.
Advertisement
This content is created and paid for by advertisers and does not involve Voice Journalists
