މިދިޔަ މަހު އެންމެ ގިނަ މީހުން ޖަލަށްލީ މަސްތުވާތަކެތީގެ މައްސަލަތަކުގައިކަމަށް މޯލްޑިވްސް ކަރެކްޝަނަލް ސާވިސްގެ ތަފާސް ހިސާބުތަކުން ހާމަވެއްޖެ އެވެ. 

ސަރެކްޝަންގެ ތަފާސް ހިސާބުތައް ދައްކާގޮތުން މިދިޔަ މަހު އެކި މައްސަލަތަކުގައި 53 ޖަލަށް ގެންގޮސްފައިވާއިރު، އޭގެ ތެރެއިން 43 މީހުންނަށް ވަނީ ހުކުންކޮށްފަ އެވެ. އަދި 19 މީހެއްގެ ޝަރީއަތް ކުރިއަށް ދާކަން ހާމަކޮށްފައި ވެއެވެ. 

ކަރެކްޝަނުގެ ހިސާބުތައް ދައްކާގޮތުން މިދިޔަ މަހު މަސްތުވާތަކެތީގެ މައްސަލަތަކުގައި 55.8 އިންސައްތަ މީހުން ވަނީ ހައްޔަރުކޮށްފަ އެވެ. އެއީ އެންމެ ގިނައިން މީހުން ހައްޔަރު ކުރި މައްސަލަތަކެވެ. 

Advertisement

ދެވަނައަށް އެންމެ ގިނައިން މީހުން ޖަލަށް ލާފައިވަނީ ވައްކަމާއި ފޭރުމުގެ މައްސަލަތަކުގައެވެ. އަދި ތިންވަނައަށް އެންމެ ގިނަ މީހުން ޖަލަށްލާފައި ވަނީ ހުއްދަ ނެތި ތަންތަނަށް ވަނުމުގެ މައްސަލަތަކުގަ އެވެ. 

މީގެ އިތުރުން ކުޑަކުދިންނަށް ޖިންސީ ގޯނާކުރި މައްސަލަތަކުގައި ޖަލަށްލީ މީހުންގެ އަދަދަކީ %4.7އެވެ. މާރާމާރީގެ މައްސަލަތަކުގައި ޖަލަށްލީ މީހުންގެ އަދަދަކީ %4.7 އެވެ. އަދި ވައްކަން ކުރިކަމުގެ ތުހުމަތުގައި %7 މީހުންވެސް އަލަށް ޖަލަށް ގެންދިޔަ މީހުންގެ ތެރޭގައި ހިމެނެއެވެ.

ކަރެކްޝަންގެ ތަފާސް ހިސާބުތައް ދައްކާގޮތުން މިދިޔަ މަހު 59 މީހެއް ވަނީ ޖަލުން ދޫކޮށްލާފަ އެވެ. އެއީ ޖަލު ހުކުން ތަންފީޒުކުރުމަށްފަހު ދޫކޮށްލި 24 މީހުންނާއި، ޝަރުތު ކުރުމަށްފަހު ދޫކޮށްލި 16 މީހުންނެވެ. 

މަސްތުވާތަކެތީގެ މައްސަލަތަކުގައި ހައްޔަރުކުރާ މީހުން އިތުރުވެފައިވާއިރު، ނުރައްކާތެރި މިންވަރަކަށް މަސްތުވާތަކެތި ރާއްޖޭގައި އާންމުވަމުން އަންނަކަން ފާހަގަކޮށްލެވެ އެވެ. 

އެގޮތުން ފުރަމާލޭގައިވެސް ޑްރަގުގެ އުނގުވިޔަރާފި މަގުމަތީގައި ކުރާ މަންޒަރުތަކާއި، މަގުމަތީގައި މަސްތުވާތަކެތި ބޭނުންކުރާ މައްސަލަތައް ވަނީ އާންމުވެފަ އެވެ. 

މަސްތުވާތަކެތި އާންމުވަމުންދާ މައްސަލައާއި ގުޅިގެން ސަރުކާރަށް ބޮޑެތި ފާޑުކިޔުންތަކެއްވެސް ވަނީ އަމާޒުވެގެން ގޮސްފައެވެ. އެގޮތުން ސަރުކާރު ހިންގާ މައި ޕާޓީގެ އެމްޑީޕީގެ ބައެއް މެމްބަރުންނާއި އިދިކޮޅުންވެސް ދަނީ މަސްތުވާތަކެތި އާންމުވަމުންދާ މައްސަލައިގައި ސަރުކާރަށް ތުހުމަތުގެ އިނގިލި އަމާޒުކުރަމުން ނެވެ.

އަދި މަސްތުވާތަކެތީގެ މައްސަލަތައް ހުއްޓުވުމަށް ސަރުކާރުން އެކަށީގެންވާ ފިޔަވޅުތަކެއް އަޅަމުން ނުދާކަމަށް އެ ފަރާތްތައް ގެންދަނީ ވިދާޅުވަމުން ނެވެ.