މީގެ 21 އަހަރު ކުރިން ވިޔަފާރިވެރިންގެ ޖަމިއްޔާގެ އޮފީސް ތެރޭގައި މަރާލި އަޒްލީނާ ނަފީސްގެ ގާތިލް އަބްދުالله ޒުހައިރް މަރުވެފައި އޮއްވައި ފެނިއްޖެއެވެ.

އޭނާ މަރުވެފައި އޮއްވާ ފެނުނުނީ އޭނާ މިހާރު ދިރިއުޅޭ ކ ދިއްފުށީ އަތިރިމަތީ ޖޯއްޔެއްގައެވެ.

މި ކަމާ ބެހޭގޮތުން ކަމާއި ބެހޭ ފުލުހުން މީޑިއާތަކަށް ފޮނުވި މެސެޖެއްގައި ވިދާޅުވީ ދިއްފުށީ އުތުރު ފަރާތު ބީޗްގައި ހުރި ޖޯއްޔެއްގައި ޚަބަރު ހުސްވެފައި އޮތް މީހަކު ފެނިގެން އެރަށު ހެލްތު ސެންޓަރަށް ގެންގޮސްފައިވާ ކަމަށް މިއަދު 12:20 ކަންހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.

އަދި އޭނާ ހެލްތު ސެންޓަރަށް އޭނާ ގެންދިޔަ އިރުވެސް ވަނީ މަރުވެފައި ކަމަށް ފުލުހުންނަށް މައުލޫމާތު ލިބިފައިވާ ކަމަށާއި މިކަމާއި ގުޅިގެން ބަލަން ޖެހޭ ކަންކަން ބަލަމުންދާ ކަމަށް ފުލުހުން ވިދާޅުވިއެވެ.

ވިޔަފާރިވެރިންގެ ޖަމިއްޔާގެ ސެކްރެޓަރީއެއްގެ ގޮތުގައި މަސައްކަތް ކުރި އަޒްލީނާ އަނިޔާވެރިކަމާ އެކު އޮފީހުގެ ފާހާނާ ތެރޭގައި މަރާލާފައި އޮއްވައި ފެނުނީ އޭޕްރީލް 5، 2001 ގަ އެވެ. މި މައްސަލާގައި ކުށް ސާބިތުވެ ޒުހައިރު އުމުރަށް ޖަލަށް ލާން ހުކުމްކުރީ 2002 ވަނަ އަހަރު އެވެ. ނަމަވެސް 11 އަހަރު ފަހުން، 2013 ވަނަ އަހަރު ވަނީ މިނިވަންކޮށްފަ އެވެ. އޭގެ ފަހުން އޭނާ ދިރިއުޅެމުން އަންނަނީ ދިއްފުށީގައެވެ. އަދި އޭނާ ވަނީ އެރަށު މީހަކާއި ކައިވެނިވެސް ކޮށްފައެވެ. މިހާރު އޭނާގެ އުމުރަކީ 48 އަހަރެވެ.

މީހުން މެރުން ފަދަ އަނިޔާވެރި ޢަމަލުތައް ރަޢްޖޭގައި މަދު ދުވަސްވަރެއްގައި ހިނގި މިހާދިސާއަކީ މުޅި ރާއްޖެ ސިއްސުވައިލި ހާދިސާއެކެވެ. އަޒްލީނާ މަރާލުމުގައި ޒުހައިރު އާއި ބައިވެރިވި އިތުރު ދެމީހަކުވެސް ހުކުމް ކޮށް ޖަލަށްލައިފައި ވެއެވެ.