އިސްލާމިކް ޔުނިވަރސިޓީ އޮފް މޯލްޑިވްސް އިން "ފާޅުވަމުންދާ ޤިޔާމަތުގެ ޢަލާމާތްތައް" މި ނަމުގައި ފޯރަމް އެއް ބާއްވަން ހަމަޖައްސައިފިއެވެ.

މި ފޯރަމް އަކީ އައިޔޫއެމްގެ ފެކަލްޓީ އޮފް ޤުރްއާން އެންޑް ސުންނާ އިން އިންތިޒާމް ކޮށްގެން ބާއްވާ ޢިލްމީ ފޯރަމެކެވެ. މި ފޯރަމް އޮންނާނީ މާރޗް 1 ވާ ބުދަދުވަހުގެ ރޭ 20:30 ގައި އައިޔޫއެމްގެ ހޯލްގައެވެ. މި ފޯރަމް ވަނީ ޢާންމުނަށް ހުޅުވާލައިފައެވެ.

މި ފޯރަމްގައި ބައިވެރިވެ ވަޑައިގެން މަޢުލޫމާތު ދެއްވާނީ އައްޝައިޙް މުޙައްމަދު ނަޝީދު އާދަމް، އައްޝައިޙް އަހްމަދު ސަމީރު، އައްޝައިޙް ޢަބްދުﷲ ބިން މުޙައްމަދު އިބްރާހިމް އަދި އަލްއުސްތާޒް އާދަމް ނަސީރު ހުސެއިންނެވެ. ފޯރަމް ހުށައަޅައި ދެއްވާނީ ރާއްޖޭގެ  މަޝްހޫރު ދީނީ ޢިލްމު ވެރިޔާ އައްޝައިޙް އަބްދުލްޢަޒީޒް ހުސެއިންނެވެ.

Advertisement

ފޯރަމްގައި މައުލޫމާތު ދެއްވާ އައްޝައިޙް މުޙައްމަދު ނަޝީދަކީ  މިޞްރުގެ ޖާމިޢަތުލް އަޒްހަރުންނާއި މެލޭޝިޔާގެ އިސްލާމިކް ޔުނިވާސިޓީ އިން ދީނީ ޢިލްމު ހާސިލް ކުރައްވައިގެން ހުންނެވި ބޭފުޅެކެވެ. އައްޝައިޙް އަހްމަދު ސަމީރަކީ މަދީނާގެ އިސްލާމިކް ޔުނިވާސިޓީ އާއި ރާއްޖޭގެ ނޭޝަނަލް ޔުނިވަރސިޓީ އިން ދީނީ ޢިލްމު ހާސިލް ކުރައްވައިގެން ހުންނެވި ބޭފުޅެކެވެ. އަދި ޝެއިޙް އަކީ ޤައުމީ ޔުނިވާސިޓީގެ ފެކަލްޓީ އޮފް ޝަރީޢާ އެންޑް ލޯ ގައި އުގަނައިދެއްވާ ލެކްޗަރަރ އެކެވެ.

ޝެއިޙް ޢަބްދުﷲ ބިން މުޙައްމަދް އިބްރާހިމް އަކީ ވެސް މަދީނާގެ އިސްލާމިކް ޔުނިވަރސިޓީ އިން ދީނީ ޢިލްމު ހާސިލް ކުރައްވައިގެން ހުންނެވި ބޭފުޅެކެވެ. އަދި ޤައުމީ ޔުނިވަރސިޓީގެ ފެކަލްޓީ އޮފް ޝަރީޢާ އެންޑް ލޯގެ ލެކްޗަރަރ އެއްވެސް މެއެވެ.

އުސްތާޒް އާދަމް ނަސީރު ހުސެއިނަކީ މޯލްޑިވްސް އެއަރޕޯޓްސް ކޮމްޕެނީގެ ޖެނެރަލް މެނޭޖަރ އެވެ.