ތ ބުރުނީގައި މިއަދު ހަވީރު ރުކެއް ދަށުވެ އެކަކު ނިޔާވެ ތިން މީހަކަށް އަނިޔާވެއްޖެއެވެ. 

ފުލުހުން ވިދާޅުވީ ރުކެއް ދަށުވެގެން 4 މީހަކަށް އަނިޔާވެގެން އުޅޭ ކަމުގެ ރިޕޯޓު މިއަދު 16:44 ހާއިރު ލިބިފައި ވާކަމަށެވެ. 

ފުލުހުން ވިދާޅުވީ މި ހާދިސާގައި އަނިޔާވި ހަތަރު މީހުން ބުރުނީ ސިއްޙީ މަރުކަޒަށް ގެންގޮސް ފަރުވާ ދެވުނު ކަމަށެވެ. އަދި އެއަށް ފަހު އިތުރު ފަރުވާ އަށް ދ ކުޑަހުވަދޫގައި ހުންނަ ދ އަތޮޅު ހޮސްޕިޓަލަށް ގެންދެވިފައިވާ ކަމަށެވެ. އަދި އަނިޔާވި 4 މީހުންގެ ތެރެއިން އެކަކު ނިޔާވެފައި ވާ ކަމަށްވެސް ފުލުހުން ވިދާޅުވިއެވެ. އަދި އަނެއް ތިން މީހުންނަށް ދަނީ ފަރުވާ ދެމުން ކަމަށްވެސް ފުލުހުން ވިދާޅުވިއެވެ. 

Advertisement

ފަރުވާދެމުންދާ މީހުންގެ ތެރެއިން 2 މީހުންގެ ހާލު ސީރިއަސް ކަމަށްވެސް ފުލުހުން ވިދާޅުވިއެވެ. 

އަނިޔާލިބުނު 4 މީހުންގެ ތެރެއިން މަރުވި މީހާގެ ހަށިގަނޑާއި އަނެއް ތިން މީހުން އިތިރު ފަރުވާ އަށް މާލެ އަށް ގެނައުމަށް މަސައްކަތް ކުރަމުންދާ ކަމަށް ފުލުހުން ވިދާޅުވިއެވެ. 

މި ކަމާއި ގުޅިގެން ބަލަން ޖެހޭ އިތުރު ބެލުންތައް ބަލަމުން ދާކަމަށްވެސް ފުލުހުން ވިދާޅުވިއެވެ. 

މިކަމާއި ގުޅޭ އިތުރު މައުލޫމާތު ހޯދާލުމަށް ބުރުނީ ކައުންސިލްގެ ރައީސް އާދަމް މުހައްމަދު އަށް 10:56 ހާއިރު ގުޅާލުމުން ވިދާޅުވީ މިވަގުތު އެމީހުން ފަރުވާ އަށް މާލެ އަށް ފޮނުވާލުމުގެ މަސައްކަތް ކުރަމުންދަނީ ކަމަށެވެ.