ރާއްޖޭގައި ދީނީ ހޭލުންތެރިކަން އިތުރުކުރުމުގެ ހަރަކާތްތައް ފުޅާ ދާއިރާއެއްގައި ކުރަމުން އަންނަ ޖަމިއްޔާއެއް ކަމަށްވާ، ޖަމިއްޔަތުއް ސަލަފާއި، ސަރުކާރުގެ ކޯލިޝަންގައި ހިމެނޭ އަދާލަތު ޕާޓީއާއި ދެމެދު އޮތީ ދީނީ މައްސަލައެއް ނަމަ އެކަން ހައްލުކުރަން ބޭނުންވާ ކަމަށް އަދާލަތު ޕާޓީގެ ރައީސް އިމްރާން އަބްދުالله ވިދާޅުވެއްޖެ އެވެ.
ރައީސް އިބްރާހިމް މުހައްމަދު ޞާލިހު ގެ މިސަރުކާރުގައި ދީނާއި ޚިލާފް އެތައް ކަމެއް އާއްމުވެ، އެކަންކަން ހުއްޓުވުމުގައި ސަރުކާރުގެ ކަމާއިބެހޭ އިދާރާތައް ނުކުޅެދިފައިވީ ނަމަވެސް ކުރިއަަށް އޮތް ދައުރުގައިވެސް ރައީސް ޞާލިހު ގެ ސަރުކާރެއް އޮތުމަށް އަދާލަތުން ވަނީ ތާއީދުކޮށް، އެމަނިކުފާނާއިއެކު ކޯލިޝަން ހަދާފައެވެ.
އެކަމާއި ގުޅިގެން ޖަމިއްޔަތުއް ސަލަފުގެ ޢިލްމުވެރިންނާއި އެނޫންވެސް އެހެން އިލްމުވެރިން އަދާލަތަށް ފާޑު ވިދާޅުވަމުންދާ މި ދަނޑިވަޅުގައި އިމްރާން ކުރެއްވި ޓުވީޓެއްގައި އޭނާ ވަނީ ސަލަފާއި އަދާލަތާއި ދެމެދު ހުރި ތަފާތު ތަކަކީ ދީނީ ކަމެއްތޯ ނުވަތަ ސިޔާސީ މައްސަލަ ތަކެއްތޯ ސުވާލުކުރައްވާފައެވެ.
އަދި އެ ޕާޓީއާއި ސަލަފާއި ދެމެދު އޮތީ ދީނީ މައްސަލައެއް ނަމަ އެކަން ހައްލު ކުރަން އަދާލަތުން ވަރަށް ބޭނުންވާ ކަމަށްވެސް އޭނާ ވިދާޅުވި އެވެ.
"ސިޔާސީ ކަމެއް ނަމަ އެކަން އަންޑަރސްޓޭންޑް ވެއެވެ. ހަމަ ވަރަށް ނެޗުރަލް ކަމެއްތާއެވެ." އިމްރާން ވިދާޅުވިއެވެ.
އަދާލަތު ޕާޓީއަކީ ދީން ކުރިއަރުވަން މަސައްކަތް ކުރާ ދީނީ ޕާޓީއެއް ކަމަށް އެ ޕާޓީން ބުނި ނަމަވެސް، އެއީ ސިޔާސީ މަންފާއަށާއި، ސަރުކާރުގެ މަގާމުތަކުގެ ދަހިވެތިކަމުގައި ހަރަކާތްތެރިވާ ސިޔާސީ ޕާޓީއެއް ކަމަށް ގިނަ ރައްޔިތުން ދެކެއެވެ. އަދި އެކަމާއި ގުޅިގެން، ދީނަށް ލޯބިކުރާ ގިނަ މީހުންގެ ނުރުހުން ވަނީ އެޕާޓީއަށް އަމާޒުވެފައެވެ.
Advertisement
This content is created and paid for by advertisers and does not involve Voice Journalists
