އަފްޣާނިސްޠާނާއި ޕާކިސްޠާން އަދި އިރާނުން ތުރްކިޔޭ އަށް ހިޖުރަކުރި ރެފިޔުޖީން ތަކެއް ދަތުރު ކުރަމުންދިޔަ ބޯއްޓެއް އިޓަލީ ކައިރިން ދަތުރު ކުރަމުން ދަނިކޮށް ފެތި ގިނަ ބަޔަކު މަރުވެއްޖެއެވެ.

މި ބޯޓުން ދަތުރު ކުރަމުންދިޔާ މީހުންގެ ތެރެއިން 59 މީހުން ވަނީ މަރުވެފައެވެ. އޭގެ ތެރޭގައި 12 ކުޑަކުއްޖަކު ވެސް ހިމެނެއެވެ. މި ބޯޓު ފެތިފައިވަނީ އިޓަލީގެ ކޯސްޓަލް ސިޓީ ކައިރިއަށެވެ.

އަފްޣާނިސްޠާނާއި ޕާކިސްޠާން އަދި އިރާންގެ ރެފިޔުޖީން ދަތުރު ކުރަމުންދިޔަ މި ބޯޓު ފެތިފައިވަނީ އާދީއްތަ ދުވަހު އައި ވަރުގަދަ ތޫފާނުގައި ޖެހިގެން ކަމަށް އަލްޖަޒީރާގައި ބުނެފައިވެއެވެ.

Advertisement

މި ބޯޓުން ދަތުރު ކުރި މީހުންގެ ތެރެއިން ސަލާމަތް ވެފައިވަނީ 81 މީހެއް ކަމަށާއި އޭގެ ތެރެއިން 20 މީހަކު ވަނީ ހޮސްޕިޓަލުގައި އެޑްމިޓަ ކޮށްގެން ފަރުވާ ދެމުން ދާކަމަށާއި އޭގެ ތެރެއިން އެކަކު އޮތީ އައިސީޔޫގައި ކަމަށްވެސް އަލްޖަޒީރާގައި ބުނެފައިވެއެވެ.

ސަލާމަތް ކުރެވުނު މީހުންގެ ތެރެއިން ހިޖުރަކުރި މީހުން ޓްރެފިކް ކުރިކަމުގެ ތުހުމަތުގައި ހައްޔަރުކޮށްފައެވެ. އިޓަލީގެ ކުޓްރޯގެ މޭޔަރ އަންތޯނިއޯ ކަރޯސޭ ބުނެފައިވަނީ މަރުވިމީހުންގެ ތެރޭގައި ގިނައީ އަންހެނުންނާއި ކުޑަކުދިން ކަމަށެވެ. އަދި ކުޑަކުދިން މަރުވިވަރު ޔަޤީންކުރެވިފައި ނުވާކަމަށް ވެސް އޭނާ ބުނެފައިވެއެވެ.

އިތުރަށް އޭނާ ބުނެފައިވަނީ އެބޯޓު ފުރާފައިވަނީ ތުރްކިޔޭގެ އިޒްމިރުން މީގެ ތިނެއް ނުވަތަ ހަތަރު ދުވަސް ކުރިން ކަމަށެވެ. ސަލާމަތް ވި މީހުންގެ ތެރެއިން އެކަކު ބުނެފައިވަނީ އެ ބޯޓަށް 140 ނުވަތަ 150 މީހުން އެރިކަމަށެވެ.

ސަލާމަތްވި މީހުންގެ ތެރޭގައި ގިނައީ އަފްޣާނިސްޠާންގެ ރެފިޔުޖީން ކަމަށާއި މަދު މަދުން ޕާކިސްޠާނު މީހުން ނާއި ސޯމާލީއާގެ ދެމީހެއް ކަމަށް އަލްޖަޒީރާގައި ބުނެފައިވެއެވެ.