ތުރްކިޔޭ އާއި ސީރިޔާ އަށް އައި ބާރުގަދަ ބިންހެމުގައި ހާލުގައި ޖެހުނު ކުޑަކުދިންނަށް ހަދިޔާ ކުރަން، ބެސިކްޓަސް ގެ ފޭނުން ފުޓުބޯޅަ ދަނޑަށް ކުޅޭ ސާމާނު އަޅައިފިއެވެ.

އިސްތަންބޫލްގެ ފުޓުބޯޅަ ޓީމެއް ކަމަށްވާ ބެސްކްޓަސް ގެ ފޭނުން އެ ޓީމު މެޗެއް ކުޅެމުންދިޔަ ދަނޑަށް އަޅައިފައިވަނީ ކުޅޭ ސާމާނާ، ސްކާފް އަދި ތޮފިފަދަ ތަކެއްޗެވެ.

ޓާކިޝް ޕްރިމިޔާ ލީގްގެ ސުމެއް ސުމަކުން ނިމުނު މެޗްގެ ފުރަތަމަ 4 މިނިޓަށް ފަހު 17 ސިކުންތައް މެޗް މެދުކަނޑާލީ ބިންހެލުމުގައި ހާލުގައި ޖެހުނު މީހުންނަށް އެހީވުމަށް ހަދިޔާ ކުރަން ބޭނުންވާ ތަކެތި ދަނޑަށް އެޅުމަށެވެ. 17 ސިކުންތު ތެރޭގައި ގާތް ގަނޑަކަށް ދަނޑު ފުރިގެން ދިޔައެވެ.

"އަހަރެމެންގެ ފޭނުން ވޮޑަފޯން ޕާކް ދަނޑުގެ ތެރެއަށް ސްކާފް، ތޮފި އަދި ސޮފްޓް ޓޯއީސް ވަނީއަޅާފަ، މި ތަކެއްޗަކީ ބިންހެލުމުގައި ހާޅުގައި ޖެހުނު ފަރާތްތަކަށް ހަދިޔާ ކުރަން އެއްކުރެވުނު ތަކެތި، މިއީ ހާލުގައި ޖެހިފަ ތިބި ކުޑަކުދިން ހިނިތުން ކުރެވޭތޯ ކުރޭވޭ މަސަކްކަތެއް" ބެސްކްޓަސް ކްލަބްގެ ސްޓޭޓްމަންޓެއްގައި ވެއެވެ.