ކޮވިޑް 19 ގެ ތެރޭގައި ވެންޓިލޭޓަރަށް ބޭނުންވެ ދިވެހި ސަރުކާރުން އޯޑަރު ދިން ވެންޓިލޭޓަރތައް ނުލިބުނު މައްސަލައިގައި ދުބާއީގެ ކުންފުންޏަކާއި ދެކޮޅަށް މައްސަލަ ހުށައަޅައިފިއެވެ.

މިމައްސަލަ ހުށައަޅައިފައިވަނީ ދިވެހި ސަރުކާރުގެ ފަރާތުން އެކްޒެކިއުޓަރސް ޖެނެރަލް ޓްރޭޑިންގ އާއި ދެކޮޅަށް، މޯލްޑިވްސް އިންޓަރނޭޝަނަލް އާބިޓްރޭޝަން ސެންޓަރަށެވެ.

މިކަމާއި ގުޅޭ ގޮތުން އެޓާނީ ޖެނެރަލްގެ އޮފީހުން ނެރެފައިވާ ބަޔާނެއްގައި ވިދާޅުވެފައި ވަނީ ކޮވިޑް 19 އާއި ގުޅިގެން ދިވެހިރާއްޖެއަށް ބޭނުންވަ ވެންޓިލޭޓަރު ފޯރުކޮށްދިނުމާއި ގުޅޭގޮތުން 2020 ވަނައަހަރުގެ އޭޕްރީލް 2 ގައި ރާއްޖޭގެ ހެލްތް މިނިސްޓްރީ އާއި ދުބާއީގެ އެކްޒެކިއުޓަރސް ޖެނެރަލް ޓްރޭޑިންގ ސޮއިކުރެވުނު އެއްބަސް ވުމާއި އެކުންފުނިން ޚިލާފު ވެފައިވާތީ އެމައްސަލަ 16 ފެބްރުއަރީ 2023 ވަނަ ދުވަހު މޯލްޑިވްސް އިންޓަރނޭޝަނަލް އާބިޓްރޭޝަން އަށް ހުށައެޅިފައިވާ ކަމަށެވެ.

Advertisement

އަދި ދިވެހި ސަރުކާރުގެ ފަރާތުން ހުށައެޅި މިމައްސަލަގައި އެކްޒެކިއުޓަރސް ޖެނެރަލް ޓްރޭޑިންގ އާއި އެކު ސޮއިކޮށްފައިވާ އެއްބަސްވުމާއި އެއްގޮތަށް އެފަރާތުން ފޯރުކޮށްދީފައިނުވާ ވެންޓިލޭޓަރުތަކުގެ އަގަށްވާ ފައިސާއާއި، ވެންޓިލޭޓަރުތައް ފޯރުކޮށްދީފައިނުވާތީ، އެއްބަސްވުމުގައި ކަނޑއަޅައިފައިވާ ގޮތުގެ މަތިން ދިވެހި ސަރުކާރަށް ލިބިފައިވާ ގެއްލުމުގެ ބަދަލާއިއެކު ޖުމްލަ 32،574،750 ދިވެހި ރުފިޔާއަށްވާ 2،112،500 ޔޫއެސް ޑޮލަރުގެ އިތުރުން އިންޓްރެސްޓާއި އާބިޓްރޭޝަންގެ އަގު ހޯދުމަށް ވަނީ ހުށައަޅައިފައެވެ.

އިތުރަށް މި ބަޔާނުގައި ބުނެފައިވަނީ އާބިޓްރޭޝަނަށް ހުށައަޅާއިފައިވާ މިމައްސަލައިގެ ސިއްރުތައް ހިފެހެއްޓުމަކީ ސަރުކާރުގެ މައްޗަށް ލާޒިމް ކަމެއް ކަމަށެވެ.