ރާއްޖޭގައި ތިބޭ އިންޑިޔާ ސިފައިންގެ ޢަދަދު ހާމަނުކުރުމާއި އެމީހުންގެ މައްޗަށް ދައުލަތުން ކުރާ ޚަރަދު ހާމަނުކޮށް ނުދީގެ ޑިފެންސް މިނިސްޓްރީ އާއި ދެކޮޅަށް ހައިކޯޓަށް ހުށައަޅައިފައިވާ މައްސަލައިން ޑިފެންސް މިނިސްޓްރީ ތަދައްޚުލް ވެއްޖެއެވެ.

ރާއްޖޭގައި ތިބޭ އިންޑިޔާ ސިފައިންގެ ޢަދަދާއި އެ މީހުންގެ މައްޗަށް ދައުލަތުން ކުރާ ޚަރަދުގެ މައުލޫމާތު ސާފު ކުރުމަށް ހުށައެޅީ "ދިޔަރެސް" ނޫހުންނެވެ. ޑިފެންސް މިނިސްޓްރީ އަށް އެ މައުލޫމާތު ހޯދުމަށް ހުށައެޅުމުން އެމިނިސްޓްރީ އިން ވަނީ އެކަމަށް ދެކޮޅުހަދައިފައެވެ. އެކަމާއި ގުޅިގެން އެނޫހުން ދެން އެމައްސަލަ ދެން ހުށައެޅީ އިންފޮމޭޝަން ކޮމިޝަރުގެ އޮފީހަށެވެ. އަދި އެއޮފީހުން ވެސް ނިންމެވީ ޑިފެންސް މިނިސްޓްރީ އިން ނިންމެވި ނިންމެވުން ރަނގަޅުކަމަށެވެ.

އިންފޮމޭޝަން ކޮމިޝަނަރުގެ މިނިންމެވުން ދިޔަރެސް ނޫހުން ވަނީ، އިސްތިއުނާފް ކުރުމަށް ހައިކޯޓަށް ހުށައަޅައިފައެވެ.  

ޑިފެންސް މިނިސްޓްރީ އިން އެ މައުލޫމާތު ހާމަ ނުކުރި ސަބަބެއް ކަމަށް ވިދާޅުވެފައިވަނީ އެ މައުލޫމާތު ހާމަކޮށްފިނަމަ ރާއްޖޭގެ ސަލާމަތަށް ނުރައްކާވުމެވެ.

އެމައްސަލައިގެ އަޑުއެހުންތައް މިހާރު ވަނީ ބާއްވާފައެވެ. ނަމަވެސް މިހާރު ޑިފެންސް މިނިސްޓްރީ އިން ވަނީ އެމައްސަލައިން ތަދައްޚުލް ވުމަށް ހުށައަޅައިފައެވެ. ތަދައްޚުލު ވުމަށް އެދޭ ސަބަބެއް ކަމަށް ޑިފެންސް މިނިސްޓްރީ އިން ވިދާޅުވެފައި ވަނީ ހައިކޯޓުން ހުކުމްކުރާ ގޮތަކުން އެ މައްސަލައިގައި ހޯދަން އެދޭ މައުލޫމާތު ދޫކޮށްފިނަމަ ޤައުމީ ސަލާމަތަށް ނުރައްކާވެދާނެތީ، ދައުލަތުގެ މަސްލަހަތު ހިމާޔަތްކުރުމުގެ ގޮތުން އެ މައްސަލައަށް ތަދައްޚުލުވުމަކީ މުހިންމު ކަމެއްކަމުގައި ދެކޭތީ  ކަމަށެވެ. 

ދައުލަތުން އެދިފައިވަނީ އެ މައްސަލަ ތަދައްޚުލުކޮށްދެއްވައި، މައްސަލައިގައި ދައުލަތުގެ ފަރާތުން ފާހަގަކުރަން ބޭނުންވާ ކަންކަން ފާހަގަކުރުމުގެ ފުރުސަތު ދިނުމަށެވެ. އަދި އިންފޮމޭޝަން ކޮމިޝަނަރުގެ ނިންމުން ބަދަލުކުރަންޖެހޭ ހާލަތެއް ނެތްކަމަށް ކަނޑައަޅުއްވައިދެއްވައި، އެ މޭރުމުން ހުކުމް ކޮށްދެއްވުމަށް އެދިފައިވެ އެވެ.

މިމައްސަލަ ކޯޓަށް ހުށައަޅައިފައިވަނީ 2020 ވަނަ އަހަރުތެރޭގައެވެ. ރާއްޖޭގެ އެކި ހިސާބުތަކުގައި އިންޑިޔާ ސިފައިން އެކި ޢަދަދަށް ތިބި ކަމުން އެކި ފަހަރުމަތިން އަންނަނީ މީޑިއާ އަށް ތިލަވަމުންނެވެ. ރާއްޖޭގައި އިންޑީޔާ ސިފައިންގެ ސީދާ ޢަދަދެއް ސާފުވެފައެއް ނުވެއެވެ.