ދިވެހިރާއްޖޭގެ ފަތުރުވެރިކަން ސިންދަފާތުކޮށް، ލޯކަލް ޓުއަރިޒަމް ޕްރޮމޯޓު ކުރުމަށް ކުރިއަށް ގެންދާ "ސަވާދީއްތަ ދަތުރު" މިއަހަރުވެސް ކުރިއަށް ގެންދިއުމަށް ނިންމާފައިވާ ކަމަށާއި، އެ ދަތުރުގެ ތެރެއިން ރަށްތައް ވިދާލާ ބޮޑު އީދާށް ބައެއް ރަށްތަކަށް ބާރު ބޮޑުވާނެކަމަށް ޓުއަރިޒަމް މިނިސްޓަރު ޑރ. އަބްދުالله މައުސޫމު ވިދާޅުވެއްޖެ އެވެ. 

ސަވާދީއްތަ ދަތުރާއި ގުޅޭގޮތުން ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަދައްކަވަމުން ޑރ މައުސޫމު ވިދާޅުވީ ސަވާދީއްތަ ދަތުރަށް ރަށްރަށުން މިހާރު ތައްޔާރުވާން ފަށާފައިވާކަމަށެވެ.

އެގޮތުން ކޮންމެ ރަށަކަށް ޚާއްސަ ގުދުރަތީ ކަންކަމާއި، އެރަށްރަށުގެ އާދަކާދައާއި ޘަގާފަތް ދައްކުވައިދޭ ކަންކަން ކެއިން ބުއިމާއި، ދެންވެސް އެ ރަށަކަށް ޚާއްސަ ކަންކަން ދައްކާލުމަށް ތައްޔާރުވަމުންދާ ކަމަށް މިނިސްޓަރު ވިދާޅުވި އެވެ. 

މިނިސްޓަރު ވިދާޅުވީ މިފަހަރުގެ ސަވާދީއްތަ ދަތުރު ވެގެންދާނީ ރަށްރަށް ޕްރޮމޯޓުކުރުމަށް ދުޅަހެޔޮ ވާދަވެރިކަމެއް އުފެދިގެންދާނެ ދަތުރަކަށް ކަމަށެވެ. އަދި ދަތުރުގެ ތެރެއިން ލޯކަލް ޓުއަރިޒަމް ފުޅާކުރުމަށް މަސައްކަތްކުރާ ބައެއް ރަށްތައް ވިދާލާނެ ކަމަށާއި، އަދި އެއާއެކު ބޮޑު ޢީދާއި ދިމާކޮށް އެ ރަށްތަކަށް އޮންނަ ޑިމާންޑު އިތުރުވެގެންދާނެކަމަށް މިނިސްޓަރު މައުސޫމު ވިދާޅުވި އެވެ. 

މިނިސްޓަރު ވިދާޅުވީ ސަވާއްދީއްތަ ދަތުރު ވެގެންދާނީ ރަށްތައް ޕްރޮމޯޓުކޮށްލުމަށް ލިބޭ ވަރަށް އަގުހުރި ފުރުސަތަކަށް ކަމަށެވެ. 

ސަވާދީއްތަ ދަތުރަކީ މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމެންޓް ކޯޕަރޭޝަން (އެމްއައިޓީޑީސީ)އިން އިންތިޒާމުކޮށްގެން ކުރިއަށް ގެންދާ ޔޮޓު ފެސްޓިވަލް ދަތުރެކެވެ. މި ދަތުރު އެންމެ ފުރަތަމަ ފަހަރަށް ބޭއްވީ ދިވެހިރާއްޖޭގެ ފަތުރުވެރިކަމަށް 50 އަހަރު ފުރުމުގެ މުނާސަަބާއާއި ގުޅިގެންނެވެ. 

އެގޮތުން އެންމެ ފުރަތަމަ ދަތުރުގައި ރާއްޖޭގެ 11 ރަށަކަށް ޒިޔާރާތްކޮށްފައި ވެއެވެ. ހއ އަތޮޅުން ފެށި އެ ދަތުރު 2022 ވަނަ އަހަރު ނިންމާލާފައިވަނީ ބ އަތޮޅަށެވެ. 

މިއަހަރުވެސް "ސަވާދީއްތަ ދަތުރު" ކުރިއަށް ގެންދާނެކަމަށް މިނިސްޓްރީއިން އިއުލާނުކޮށްފައިވާއިރު، މިއަހަރުގެ ދަތުރު ކުރިއަށް ވުރެ ކާމިޔާބު ދަތުރަކަށް ވާނެކަމުގެ ޔަގީންކަން ޓުއަރިޒަމް މިނިސްޓްރީން ދެއްވައެވެ.