ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ދެވަނަ ދައުރެއް ދޭންޖެހޭކަމަށް އެމަނިކުފާނަށް ތާއީދު ކުރައްވާ މެމްބަރުން ދައްކަވަމުންދާ ވާހަކަތަކަށް މަޖިލީހުގެ މާވަށު ދާއިރާގެ މެމްބަރު އަދި ކުރީގެ އިކޮމޮނިކް މިނިސްޓަރު މުހައްމަދު ސައީދު ރައްދުދެއްވައިފި އެވެ.
ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ 11 ވަނަ ޖަލްސާގައި ވާހަކަދައްކަވަމުން ސައީދު ވިދާޅުވީ މި ސަރުކާރުން މިހާތަނަށް 66 ބިލިއަން ރުފިޔާގެ ދަރަނި ނަގާފައިވާކަމަށެވެ. އަދި އޭގެ ތެރެއިން 23 ބިލިއަން ރުފިޔާއަކީ އަވައްޓެރި އިންޑިއާއިން ނަގާފައިވާ ދަރަނިކަން ސައީދު ފާހަގަކުރެއްވި އެވެ.
ސައީދު ވިދާޅުވީ އެއީ އެއްލައްކަ މީހުންނަށް ބޯހިޔާވަހިކަން ފޯރުކޮށްދެވިދާނެ އަދަދެއް ކަމަށެވެ. އެހެން ނަމަވެސް ދަރަނިތައް ނަގައިގެން މިހާތަނަށް ކުރި އެއްވެސް ކަމެއް ފެންނަން ނެތް ކަމަށް އޭނާ ވިދާޅުވިއެވެ.
"ހަމައެކަނި ރައީސް އިބްރާހިމް މުހައްމަދު ޞާލިހު އުފައްދަވާފައި އޮތް ދަރަނި 66 ބިލިއަން ރުފިޔާ. 66 ބިލިއަން ރުފިޔާއިން ހަމައެކަނި މިތާ އަވައްޓެރި ގައުމަކުން ނަގާފައި އޮތް ލޯނު 23 ބިލިއަން ރުފިޔާ ނަގާފައި އެބޮތް އިންޑިއާ ސަރުކާރުން. އޮތް އިރު، އެ 23 ބިލިއަން ރުފިޔާއަށް ކުރިކަމެއް ނެތް އިރުގައި އެއްތަލައްކަ ތިރީސް އައްހާސް އާއިލާގެ ބޯހިޔާވަހިކަން ހުޅުމާލޭގައި ޤާއިމްކުރެވޭނެ، ފްލެޓުތައް 2018 އިން 2023އަށް ޤާއިމްކޮށް ނިންމޭނެ އަދަދަށް މިހިރީ ގެނެސްފަ. ކޮން ކަމެއްތޯ ކުރީ؟"
މެމްބަރު މުހައްމަދު ސައީދު
ސައީދު ވިދާޅުވީ ރައީސް ޞާލިހު ދަރަނި ނަގްގަވައިގެން ކުރައްވާހާވެސް ކަމަކީ ސިޔާސީ މަސައްކަތް ކަމަށެވެ. ގައުމު ބިނާކުރުމުގެ އެއްވެސް މަސައްކަތެއް އެމަނިކުފާނު ކުރައްވާފައި ނުވާކަމަށް ސައީދު ވިދާޅުވި އެވެ.
އެކަން ފާހަގަކުރައްވާ ސައީދު ވަނީ ދެވަނަ ދައުރެއް ހޯއްދަވަން އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އުޅުއްވާ ސަބަބާއި މެދު ސުވާލު ކުރައްވާފަ އެވެ.
ސައީދު ވިދާޅުވީ ގައުމު ހިންގުމަށް އެމްޑީޕީއަށް މި ދައުރުގައި ފަހި ފުރުސަތުތަކެއް ތަނަވަސްވެފައިވާ ކަމަށެވެ. އެގޮތުން ސަރުކާރާއި މަޖިލީހައި، ކައުންސިލްތަކުގެ އަގުލަބިއްޔަތު އެމްޑީޕީއަށް ލިބިފައި އޮތް އިރު ގައުމަށް ކަމެއް ކޮށްނުދީ އަނެއްކާވެސް ދެވަނަ ދައުރެއްގެ ވާހަކަ ދައްކަވަނީ ކޮން ސަބަބަކާތޯ ސައީދު ވަނީ ސުވާލު އުފައްދަވާފަ އެވެ.
"އެމްޑީޕީއަށް ކޮން ބާރެއް ނެތިގެންތޯ މި އުޅެނީ؟ ރައްޔިތުން ގާތަށް ގޮސް ކައުންސިލް ދޭށޭ ބުނީމަ ކައުންސިލްވެސް ދީފި. މި މަޖިލިސް ދޭށޭ ބުނީމަ މަޖިލިސްވެސް ދީފި. ވެރިކަންވެސް ދީފި. ދެން ކޮން ބާރެއްތޯ؟ ކޮން ދެވަނަ ދައުރެއްތޯ ނުލިބިގެން މި އުޅެނީ؟ ކޮން ކަމެއް އިސްލާހު ކުރަންތޯ ނުލިބިގެން މި އުޅެނީ؟ "
މެމްބަރު މުހައްމަދު ސައީދު
ދެވަނަ ދައުރެއް ހޯއްދަވާ ވާހަކަ ރައީސް ޞާލިހު ދައްކަވަމުން ގެންދަވާތީ އެމްޑީޕީގެ ބައެއް މެމްބަރުންވެސް ގެންދަވަނީ ފާޑުވިދާޅުވަމުން ނެވެ.
އެގޮތުން އެމަނިކުފާނަށް އެމްޑީޕީގެ މެނިފެސްޓޯ ތަންފީޒު ނުކުރެވޭކަމަށް އެމްޑީޕީގެ ރައީސް މުހައްމަދު ނަޝީދަށް ތާއީދު ކުރައްވާ މެމްބަރުން ގެންދަނީ ވިދާޅުވަމުންނެވެ. އަދި ރައީސް ޞާލިހަށް ދެވަނަ ދައުރެއް ދޭންޖެހޭ އެއްވެސް ސަބަބެއް ނެތްކަމަށް އެބޭފުޅުން ގެންދަވަނީ ވަކާލާތު ކުރައްވަމުން ނެވެ.
Advertisement
This content is created and paid for by advertisers and does not involve Voice Journalists
