އިއްޔެ ތުރްކިޔޭގެ މަލަތްޔާ ޕްރޮވިންސްއަށް އައި 5.6 މެގްނެޓިޔުޓް ބާރުމިނުގައި އައި ބިންހެލުމުގައި ދެ މީހަކު ނިޔާވެފައި ވާކަމަށް ތުރްކިޔޭގެ ޑެއިލީ ޞަބާހް ނޫހުން ބުނެފިއެވެ.

އެ ނޫހުގައި ބުނެފައިވަނީ އިއްޔެގެ ބިންހެލުމުގައި 2 މީހަކު ނިޔާވެ 140 މީހަކަށް ވަނީ އެކިވަރުގެ އަނިޔާތައް ލިބިފައެވެ.

"އިއްޔެ އައި އާފްޓަރޝޮކްގެ ފަހުން މަލަތްޔާ ގެ 32 މީހަކު ވަނީ ވެއްޓުނު އިމާރާތް ތަކުގެ ދަށުން ނެގިފައި، އަދި ދެ މީހަކު ނިޔާވެފައިވެސް ވޭ، 140 މީހަކު ޒަހަމްވެފައިވޭ، އޭގެތެރެއިން 12 މީހެއްގެ ހާލު ދެރަ، 40 މީހެއްގެ ފަރުވާ އަދިވެސް ދަނީ ކުރިއަށް" އޭއެފްޑީއޭ އިން ބުނެފައިވެއެވެ.

Advertisement

ބިންހެލުމާއި ގުޅިގެން މަލްތްޔާ ޕްރޮވިންގެ 29 ޢިމާރާތެއް ވަނީ ބޭނުން ނުކުރެވޭވަރަށް ހަލާކުވެފައެވެ.

ބިންހެލުމުގެ އިހްސާސް ކުރެވުމާއި އެކު އިމާރާތް ތަކުން ބޭރަށް ނުކުތް ރައްޔިތުންނަށް އޭއެފްޑީއޭ އިން އެންގީ އިމާރާތްތަކަށް އެނބުރި ނުވަނުމަށެވެ. ހަލާކުވެ ގެއްލުން ލިބިފައި ހުރި އިމާރާތްތައް ވަދެ ނުކުމެ އުޅުމަށް ރައްކާތެރި ނުވާނެތީ މިއެންގުން އެންގީ ކަމަށް އެ ޑިޕާޓްމެންޓުން ބުނެފައިވެއެވެ. މަލަތްޔާ އަށް އައި ބިންހެލުމުގެ އިހްސާސް ކަހްރަމަންމަރާސް، ގަޒިއަންޓިޕް، އަދިޔަމަން އަދި ސަންލިރުފާ އިން ވެސް ކޮށްފައިވެއެވެ.

އޭއެފްޑީއޭގެ ހެޑް ޔޫނުސް ސެޒަރް އާއި އެޑިޕާޓްމެންޓުގެ ޖެނެރަލް މެނޭޖަރ އޮރްހަން ތަތަރް ބައިވެރިވި ނިއުން ކޮންފަރެންސެއްގައި ބުނެފައިވަނީ މިހާތަނަށް 10،282 އާފްޓަރޝޮކް، ބިންހެލުމުގެ ފަހުން ތުރްކިޔޭގެ އެކި ހިސާބުތަކަށް އައިސްފައިވާކަމަށެވެ.

ފެބްރުއަރީ 6 ގައި އައި ބާރުގަދަ ދެ ބިންހެލުމަށް ފަހު ތުރްކިޔޭ ގެ އެކި ހިސާބުތަކަށް ބާރުގަދަ އާފްޓަރޝޮކްތައް ދަނީ އަންނަމުންނެވެ. ފެބްރުއަރީ 6 ވަނަ ދުވަހު އައި ބިންހެލުމުގައި ތުރްކިޔޭ އިން 44،000 މީހުން ވަނީ ނިޔާވެފައެވެ.