އިދިކޮޅު އިއްތިހާދުގެ ލީޑަރުން ޖަމްއިއްޔަތުއް ސަލަފުގެ އިލްމުވެރިންނާއި ބައްދަލުކުރެއްވުމުން އެ ޖަމްއިއްޔާއަށް ފިޔަވަޅުއެޅުމަށް ސަރުކާރު ހިންގާ ކޯލިޝަންގައި ހިމެނޭ ޢަދާލަތު ޕާޓީން ގޮވައިލައިފިއެވެ.
އިދިކޮޅު ޕްރޮގްރެސިވް ކޮންގުރެސް ކޯލިޝަންގެ އެދުމަށް ޖަމްއިއްޔަތުއް ސަލަފުން އިއްޔެ ވަނީ އެ ކޯލިޝަންގެ ލީޑަރުންނާއި ބައްދަލު ކުރައްވާފައެވެ.
މި ކަމާއި ގުޅިގެން އަދާލަތު ޕާޓީގެ ތަރުޖަމާން އަދި ހޯމް މިނިސްޓްރީ ގެ ސްޓޭޓް މިނިސްޓަރު އަލީ ނަޒީރު ކުރެއްވި ސިލްސިލާ ޓުވީޓުތަކެއްގައި އޭނާ ވަނީ ޖަމްއިއްޔަތުއް ސަލަފަށް ވަރަށް ބޮޑަށް ފާޑުވިދާޅުވެފައިވެއެވެ.
އަލީ ނަޒީރު ވިދާޅުވީ އޭނާ އަބަދުވެސް ދެކެމުން އަންނަނީ ސަލަފަކީ ކުރިއަށް ނުކުމެ ފާޅުގައި ސިޔާސީ މަސައްކަތް ކުރަން ނުކެރުނު ބަޔަކު ފިލައިތިބެ ސިޔާސީ މަސައްކަތް ކުރަން ހެދި ޖަމާއަތެއްގެ ގޮތުގައި ކަމަށެވެ. އަދި ރާއްޖޭގެ ފުންނާބު އުސް ދީނީ އިލްމުވެރިންގެ ބައިވެރިވުމާއެކު މިފަދަ ކަންކަން ހިނގުމަކީ ހިތާމައެއް ކަމަށްވެސް އޭނާ ވިދާޅުވި އެވެ.
ސިޔާސީ ޕާޓީތަކާއެކު އިންތިހާބުތަކާ ގުޅޭ މަޝްވަރާކޮށް ސިޔާސީ ވާދަވެރިކަމުގެ ތެރެއަށް ވަންނަން ވާނީ އިލެކްޝަން ގައި ރަޖިސްޓްރީކޮށްގެން ހިންގާ ސިޔާސީ ޕާޓީއެއް އުފައްދައިގެން. އިސްލާމް ދީނުގެ ދަޢުވަތަށް ޚާލިސްވެ މަދަނީ ޖަމްޢިއްޔާ ހިންގަންވާނީ ޤާނޫނުގެ ތަރަހައިގެ ތެރޭގައި.
ޢަދާލަތުގެ ތަރުޖަމާނު އަލީ ނަޒީރު
މީގެ އިތުރުން ނަޒީރުވަނީ ޤާނޫނުގެ އިމުން ބޭރުވާ ޖަމްއިއްޔާތަކަށް ޖަމްއިއްޔާތަކުގެ ރަޖިސްޓަރާ ނަސޭހަތްތެރިވެ އެކަން ހުއްޓުވަންޖެހޭ ކަމަށް ވިދާޅުވެ ޖަމްއިއްޔަތުއް ސަލަފަށް ފިޔަވަޅުއަޅަން ގޮވައިލައްވާފައެވެ.
މިއާއެކު އޭނާ ވަނީ ސިޔާސީ ޕާޓީއެއްގެ ގޮތުގައި ރަޖިސްޓަރީވުމަށް ނޫނީ ރަނގަޅު މަދަނީ ޖަމްއިއްޔާއެއްގެ ގޮތުގައި ދީނީ ދައުވަތު ކުރިއެރުވުމަށް ހުސްވުމަށް ސަލަފުގެ ކިބައިން އެދިފައެވެ.
ނަޒީރު މިފަދައިން ވިދާޅުވެ ސަލަފަށް ބަހުގެ ހަމަލާތަކެއް ރައްދު ކުރައްވާފައިވާއިރު، ޢަދާލަތު ޕާޓީގެ ރައީސް އިމްރާން އަބްދުالله ވެސް ވަނީ ދާދި ފަހުން ސަލަފަށް ފާޑުވިދާޅުވެ ޓުވީޓްތަކެއް ކުރައްވާފައެވެ. އަދި ރާއްޖޭގައި ދީން ކުރިއަރުވަން މަސައްކަތް ކުރަމުންދާ، އެންމެ ގިނަ، އެންމެ ފުންނާބު އުސް ޢިލްމުވެރިން ހިމެނޭ ޖަމިއްޔާ އާއި ގުޅިގެން އެފަދަ ޒާތީ ޓުވީޓް ތަކެއް ކުރެއްވުމުން ގިނަ ބަޔަކު ވަނީ އޭނާ އަށް ފާޑުކިޔާފައެވެ.
އަދި ޢަދާލަތު ޕާޓީ އަކީ ސިޔާސީ މަންފާއަށާއި މަގާމް ތަކަށްޓަކައި ގޮތަކަށް ދީން ބޭނުން ކުރާ، ދީނާއި ޚިލާފް ކަންކަމަށް ހިތްވަރުދޭ ޕާޓީ އެއް ކަމަށް ވާއިރު، ޖަމިއްޔަތުއް ސަލަފަކީ އަބަދުވެސް ހައްގުބަސް ބުނުމުގައި ސާބިތުވާ، ވަކި ސަރުކާރަކަށް ބެލުމެއް ނެތި މުންކަރާތްތައް ހުއްޓުވުމަށް މަސައްކަތް ކުރާ ޖަމިއްޔާއެއް ކަން ވެސް ގިނަ ބަޔަކު ދެކެއެވެ.
Advertisement
This content is created and paid for by advertisers and does not involve Voice Journalists
