މެއި 14 ގައި ކުރިންވެސް ބޭއްވުމަށް ނިންމައިފައި އޮތް ރިޔާސީ އިންތިޚާބު ހަމަ އެތާރީޚުގައި އޮންނާނެ ކަމަށް ތުރްކިޔޭގެ ރައީސް ރަޖަބް ޠައްޔިބް އުރްދުޣާން ވިދާޅުވެއްޖެއެވެ.

"ތުރްކިޔޭގެ ރައްޔިތުން ކުރިއެކޭވެސް އެއްގޮތަށް އެދުވަހު ނިންމުން ނިންމާނެ" އޭކޭ ޕާޓީގެ ޕާލިމެންޓް މީޓިން އެއްގައި ވާހަކަ ދައްކަވަމުން އުރްދުޣާން ވިދާޅުވިއެވެ.

އިދިކޮޅު ޕާޓީ އަށް ބަހުގެ ހަމަލާދެއްވަމުން އުރްދުޣާން ވިދާޅުވީ މިވަގުތު އެމަނިކުފާނުގެ އެންމެ ބޮޑު އަމާޒެއް އޮތީ ބިންހެލުމުގައި ގެއްލުންވި ފަރާތްތައް ޢާންމު ހާލަތަކަށް ގެނައުން ކަމަށެވެ. އިދިކޮޅުން އުރްދުޣާންގެ ސަރުކާރާއި ދެކޮޅަށް، ކާރިސާގެ ވަގުތުގައިވެސް ސަރުކާރުން އެހީ ފޯރުކޮށްދިނުން ލަސްވާކަމަށާއި، ސަރުކާރުން އޮތީ ކުއްލި ހާލަތަކަށް ތައްޔާރުވެގެން ނޫން ކަމަށް ބުނެ ދޮގު ވާހަކަތައް ފެތުރިކަން އުރްދުޣާން ފާހަގަ ކުރެއްވިއެވެ. އަދި އެޤައުމުން ދޮގުވެރިންނަށް އެއްބާރުލުން ނުދޭނެ ކަމަށް އުރްދުޣާން ވިދާޅުވިއެވެ.

Advertisement

ދައުލަތް މިވަގުތު އޮތީ ބިންހެލުމުގައި ގެއްލުންވި މީސްތަކުންނަށް އެހީތެރިވުމުގައި މަޝްޣޫލް ވެފައި ކަމަށާއި، އިދިކޮޅު ފަރާތްތަކުން ދައްކަމުންގެންދާ ދޮގު ވާހަކަތަކަށް ޖަވާބު ނުދެއްވަނީ އެހެންވެ ކަމަށް އުރްދުޣާން ވިދާޅުވިއެވެ. އަދި މިފަދަ ދަނޑިވަޅެއްގައި ވެސް އިދިކޮޅު ފަރާތްތަކުން މަސައްކަތް ކުރަނީ އަމިއްލަ ފައިދާ އަށްޓަކައި ކަމަށް އުރްދުޣާން ވިދާޅުވިއެވެ.

"އަހަރެމެންގެ މިވަގުތުގެ ހަމައެކަނި އެޖެންޑާއަކީ ބިންހެލުން، އެމީހުން ތަހައްމަލް ކުރަމުން އަންނަ ކަންކަން، އެހާލަތުން އެމީހުންނަށް އަރައިގަނެވުން" އުރްދުޣާން ވިދާޅުވިއެވެ.

މެއި 14 ގައި ބޭއްވުމަށް ހަމަޖެހިފައިވާ ޕާލިމެންޓް އަދި ޕްރެޒިޑެންޓަލް އިންތިޚާބު، ބިންހެލުން ތަކާއި ގުޅިގެން ޖޫން 16 އަށް ލަސްކުރާނެ ކަމަށެބުނެ ވަނީ ވާހަކަތަކެއް ދެކެވިފައެވެ. ނަމަވެސް އިދިކޮޅުން އެކަމަށް ތާއީދެއް ނުކުރިއެވެ. އަދި ފަހުން އޭކޭ ޕާޓިއިން ވެސް ވަނީ އިންތިޚާބު ފަސްކުރުމަށް ބޭނުން ނުވާކަން ހާމަކޮށްފައެވެ.

ބިންހެލުން އައުމުގެ ކުރިންވެސް ތުރްކިޔޭ ގައި އުރްދުޣާން އަށް އޮތް ތާއީދު އޮތީ ދަށަށް ގޮއްސައެވެ. ތުރްކިޔޭގެ ދިރިއުޅުމުގެ އަގާއި އެޤައުމުގެ ލިރާގެ އަގަށް އައި ބަދަލުގެ ސަބަބުން އުރްދުޣާން އަށް އޮތް ތާއީދު އޮތީ ވެއްޓިފައެވެ.

ކޮންމެއަކަސް ބިންހެލުން ތަކުގެ ސަބަބުން ޤައުމުގެ 11 ޕްރޮވިންސެއް ހަލާކުވެ ރައްޔިތުން ވަގުތީ ބޯހިޔާ ވަހިކަމުގައި ތިބުމުން މިވަގުތު އިންތިޚާބު ބޭއްވެނެ ކަމާއި މެދު ގިނަ ބަޔަކު ތިބީ ސުވާލު އުފެދިފައެވެ. 14 މިލިއަން އެއްހާ މީހުން ތިބީ ގެދޮރު ގެއްލިފައެވެ. އަދި ބިންހެލުމުގައި ގެއްލުން ލިބުނު 11 ޕްރޮވިންސް ގައި ވަނީ ކުއްލި ހާލަތު އިޢްލާނު ކޮށްފައެވެ.

ތުރްކީގެ ސްޕްރީމް އިލެކްޝަން ބޯޑުގެ އިސްބޭފުޅުން ހިމެނޭ ވަފުދެއް ވަނީ ބިންހެލުމުގެ އަސަރުކޮށް ހަލާކުވި ސަރަހައްދުތަކަށް ހޯމަދުވަހު ޒިޔާރަތްކޮށްފައެވެ. އެތަންތަނުގައި ވޯޓުލާ މަރުކަޒުތައް ގާއިމް ކުރެވޭނެތޯ އެ ވަފުދުން ބަލާނެއެވެ.