ރިޔާސީ އިންތިޚާބު 2023ގައި، ލޯފަން މީހުންނަށް، އެމީހަކު އިޚްތިޔާރުކުރާ ކެންޑިޑޭޓެއްގެ ނަމާ ދިމާގައި، އަމިއްލައަށް، ފާހަގަ ޖެހުމުގެ ފުރުސަތު ލިބިގެންދާނެ ކަމަށް އިލެކްޝަންސް ކޮމިޝަނުން ބުނެފިއެވެ. 

ރާއްޖޭގައި ބާއްވާ އިންތިހާބުތަކުގައި ވޯޓުގެ ސިއްރުކަން ހިފެހެއްޓުމަށް ލޮލުގެ ފެނުމުން މަހްރޫމްވެފައިވާ މީހުންނަށް ވޯޓުލެވޭނެ މަގުފަހި ކޮށްދިނުމަށް، ލޯފަން މީހުންގެ ހައްގުގައި މަސައްކަތް ކުރާ ޖަމިއްޔާއެއް ކަމަށްވާ ބްލައިންޑް އެސޯސިއޭޝަނުން އަންނަނީ ގިނަ މަސައްކަތް ތަކެއް ކުރަމުންނެވެ. 

އެގޮތުން، އިލެކްޝަންސް ކޮމިޝަނާ، ސިޔާސީ ޕާޓީތަކާއި، ހިޔުމަންރައިޓްސް ކޮމިޝަނާއި މީޑިއާ ތަކާއި ގުޅިގެންވެސް ގިނަ މަޝްވަރާތަކެއް އެ އެސޯސިއޭޝަނުން ވަނީ ކޮށްފައެވެ. 

އެންމެހައި ފަރާތްތަކާއި ކުރެވުނު މަޝްވަރާތަކުން އެފަދަ މީހުންނަށް ވަކި ވައްތަރެއްގެ ކަރުދާސް ތައްޔާރު ކުރުމަކީ ޚަރަދު ބޮޑު ކަމެއް ކަމުގައި ފެނުމުން، އެ ޖަމިއްޔާ އިން ވަނީ ޚަރަދުކުޑަ ގޮތެއް ހޯދާފައެވެ. 

"އަޅުގަނޑުމެން މި ފަހަރު ހައްލަކާއި އެކު މިއައީ. ވޯޓު ކަރުދާ ބަދަލު ގެންނަށް ހަރަދުތަކެއް ގެންނާނެ ކަމެއް ނެތް. އެކަމު ހާޑް މެޓީރިއަލްއަކުން ހަދާފައިވާ ކަރުދާސް ކޮޅެއް ވޯޓު ކަރުދާހާ އެއްވަރަށް ބައްޓަން ކޮށްލާނީ. ފާހަގަޖަހަންޖެހޭ ގޮޅިތަކާއި ދިމާވާ ގޮތަށް މި ހުންނަނީ ހެޔޮ ފާހަގަ ޖަހާލާ ގޮތަށް ކަނޑާފަ. އެހެންވީމަ ލޮލަށް ނުފެންނަ ކުދިންނަށް އަތްލައިގެން ވެސް އެނގޭނެ. 600 ވޯޓު ފޮއްޓަށް އޭގެ ސާމްޕަލްއެއް ހަދާލެވޭނެ." ބްލައިންޑް އެސޯސިއޭޝަންގެ ފަރާތުން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ އެސޯސިއޭޝަންގެ ނައިބު ރައީސް ހުސެއިން ޝަރީފް  ވިދާޅުވިއެވެ.

މިނިވަންކަމާއި އެކު ވޯޓުލުމަށް ލޯފަން މީހުން ހޯދާފައިވާ ހައްލު ދައްކުވައިދޭ ސާމްޕަލް އަކާއި އެކު ބްލައިންޑް އެސޯސިއޭޝަންގެ ނައިބު ރައީސް ހުސެއިން ޝަރީފް: ފޮޓޯ/ ވޮއިސް

ލޯފަން މީހުންގެ މި ކަންބޮޑުވުންތަކާއި ގުޅިގެން އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ކުރެއްވި ޓްވީޓެއްގައި ވިދާޅުވީ، ރިޔާސީ އިންތިޚާބު 2023ގައި، ލޯފަން ބޭފުޅުންނަށް، އެ ބޭފުޅަކު އިޚްތިޔާރުކުރާ ކެންޑިޑޭޓެއްގެ ނަމާ ދިމާގައި، އެބޭފުޅަކު އަމިއްލަފުޅަށް، ފާހަގަ ޖެހުމުގެ ފުުރސަތު ލިބިގެންދާނެ ކަމަށެވެ. 

މީގެ ކުރިން ބާއްވާފައިވާ އިންތިހާބު ތަކުގައި ލޯފަން މީހުން ވޯޓު ލާފައިވަނީ އެހީތެރިއަކާއި އެކު ގޮހެވެ. އޭގެ ސަބަބުން އެމީހުންގެ ވޯޓަކީ ސިއްރު ވޯޓަކަށް ނުވާ ކަމަށްވެސް ބްލައިންޑް އެސޯސިއޭޝަނުން ފާހަގަކުރެއެވެ. އެހެންކަމުން މި ހައްގު ލިބިގެންދިޔުމަކީ އެފަދަ އެންމެހައި ފަރާތްތަކަށް ލިބޭނެ ވަރަށް ބޮޑު ހިތްހަމަޖެހުމަކަށް ވެގެންދާނެ އެވެ.