ރައީސް އިބްރާހިމް މުހައްމަދް ޞާލިޙްގެ މަކަރުވެރި ދޮގުތަކަށް ސަމާލުވުމަށް ކުރީގެ ނައިބްރައީސް ޑރ މުހައްމަދު ޖަމީލް އަހްމަދު ގޮވާލައިފި އެވެ.

ޑރ ޖަމީލް މިހެންވިދާޅުވީ އެމަނިކުފާނު ކުރައްވާފައިވާ ޓްވީޓެއްގައެވެ.

ކެމްޕޭންތެރޭގައި ވައިގެދަތުރުފަތުރު ގެ އަގުތަކާއި މެދު ރައީސް ޞާލިޙް ދެއްކެވި ވާހަކަކޮޅެއް ހިއްސާކޮށް އާންމުމީހަކު ކޮށްފައިވާ ޓްވީޓެއް ރީޓްވީޓް ކުރައްވަމުން ޑރ ޖަމީލް ވިދާޅުވެފައިވަނީ ދެވަނަ ދައުރެއް ހޯދުމަށް ކޮންމެފަދަ ކަމެއްވެސް ކޮށްފާނެ ކަމަށެވެ. އަދި ވޯޓު ހޯދުމަށް ދޮގުހެދުމަށް ވުރެ ބޮޑު ވައްކަމެއް ނޯންނާނެ ކަމަށްވެސް ޖަމީލް ވިދާޅުވިއެވެ.

"މިފަދަ ވެރިއެއްގެ ވެރިކަން ނިންމަން މަސައްކަތްކުރުމީއީ އިޖްތިމާޢީ ވާޖިބެއް! ދެވަނަ ދައުރެއް ހޯދަންވެސް ކޮންމެފަދަ ދޮގެއް ހަދާފާނެ. ވޯޓް ހޯދަން މިގޮތަށް ދޮގު ހެދުމަށްވުރެ ބޮޑު ވައްކަމެއް ނޯންނާނެ. ރައީސް ޞާލިހް ގެ މަކަރުވެރި ދޮގުވައުދުތަކަށް ސަމާލުވަމާ!" ޑރ ޖަމީލް ވިދާޅުވެފައިވެއެވެ.

ޖަމީލްގެ މިފަދަ ޓްވީޓެއް ކުރައްވާފައި މިވަނީ ވެރިކަމުގެ ކުރިން ވައިގެދަތުރުތަކުގެ އަގު ދައްކުރުމާއި ބެހޭ ގޮތުން ވާހަކަ ދެއްކެވި ރައީސް ޞާލިޙްގެ ވެރިކަމުގައި މިހަފްތާގެ ތެރޭގައިވެސް މޯލްޑިވިއަން އިން ޓިކެޓްގެ އަގު ބޮޑުކުރުމާއި ގުޅިގެންނެވެ. 

ޑރ ޖަމީލް އަކީ ރައީސް ޞާލިޙްގެ ވެރިކަން ގެނައުމަށް ބޭރުގައި ހުންނަވައިގެން ގިނަ މަސައްކަތް ތަކެއް ކުރެއްވި ބޭފުޅެކެވެ. ނަމަވެސް މިހާރު ފެންނަނީ ރައީސް ޞާލިޙާއި ދެކޮޅަށް ވާހަކަދައްކަވާ މަންޒަރެވެ.