ރޯދަމަހާއި ގުޅުވައިގެން ކުރިއަށް އޮތް ހަތަރު މަހަށް ލޯކަލް މާރުކޭޓާއި ދަތުރުވެރިންގެ މާރުކޭޓުގެ ކުލި %30 ޕަސެންޓު ކުޑަކޮށްފައިވާ ކަމަށް މާލޭ ސީޓި މޭޔަރ ޑރ މުހައްމަދް މުޢިއްޒު ވިދާޅުވެއްޖެއެވެ.

ރޭ ބޭއްވުނު މާލޭ ސިޓީ ކައުންސިލްގެ ރައްޔިތުންގެ ބައްދަލުވުމުގައި ވާހަކަދައްކަވަމުން ޑރ މުޢިއްޒު ވިދާޅުވީ އެންމެ ފަހުން ބޭއްވުނު އެކައުންސިލްގެ ޖަލްސާގައި، މިމަހުން ފެށިގެން ކުރިއަށް އޮތް ހަތަރު މަހު، ރޯދަމަހާއި ގުޅުވައިގެން އަދި ހަމަ އެހެންމެ ތަކެތީގެ އަގުވެސް ބޮޑު ވަމުންދާތީ މާރުކޭޓުގެ ފީ %30 ޕަސެންޓު ކުޑަ ކޮށްދެއްވުމަށް ނިންމަވާފައި ވާކަމަށެވެ.

ޑރ މުޢިއްޒުގެ ވާހަކަ ފުޅުގައި އިތުރަށް ވިދާޅުވީ މާރުކޭޓު ގޮޅިތަކުގެ މުއްދަތު މި މަހަށް ހަމަވާތީ ކުރިއަށް އޮތް އެއް އަހަރަށް މާރުކޭޓު ގޮޅިތަކުގެ މުއްދަތު އިތުރުކުރުމަށް ވެސް ނިންމާފައިވާ ކަމަށެވެ.

ރޭގެ ބައްދަލުވުމުގައި މޭޔަރ ޑރ މުޢިއްޒު ދެއްވި ތަޤްރީރް ގައި ވިދާޅުވީ މިހާރުހުރި ލޯކަލް މާރުކޭޓު ޢީދަށް ފަހު ބަންދުކޮށް އެ ޚިދްމަތް އެހެން ތަނަކަށް ބަދަލު ކުރެވޭނެ ކަމަށެވެ. އަދި މިހާރު ލޯކަލް މާރުކޭޓު ހުރި ބިމުގައި ހަތަރު ބުރީގެ އެންމެ ޒަމާނީ އިމާރާތެއް އެޅޭނެކަމަށެވެ.

"މި ޢިމާރާތުގެ ޖާގަ ތަނަވަސްވާނެ، ޚިދްމަތްތައް ފަސޭހަވެފައި އަވަސްވާނެ، އެ ޢިމާރާތުގައި ތިން މާރުކޭޓެއް ހުންނާނެ، އެއީ އެންމެ ޒަމާނީފެންވަރުގެ މަސްމާރުކޭޓަކާއި، ލޯކަލް މާރުކޭޓަކާއި ދަތުރުވެރިންގެ މާރުކޭޓެއް، އޭރުން ތިޔަ ބޭފުޅުންނަށް ކުޑަ ވަގުތުކޮޅެއްގައި ހުރިހާ ބާވަތެއްގެ ބާޒާރެއް އެއްތާކުން ކޮށްލެވުނީ، ސަރުކާރުން ހުރަސް ނާޅައިފިނަމަ 2023 ވަނަ އަހަރުގެ ޑިސެމްބަރ މަހު މި މާރުކޭޓު ވެސް ނިމޭނެ" މޭޔަރު މުޢިއްޒު ވިދާޅުވިއެވެ.

ރައްޔިތުންގެ ހިޔާލާއި ސުވާލު ހުށައަޅަން ހުޅުވާލި ފުރުސަތުގައި ލޯކަލް މާރުކޭޓުގައި ބިދޭސީ ވިޔަފާރި ކުރާ މައްސަލަޔާއި މެދު ބޭފުޅަކު ދެއްކެވި ވާހަކަ އާއި ގުޅުވައިގެން މުޢިއްޒު ވިދާޅުވީ ބިދޭސީންގެ މައްސަލައަކީ ކައުންސިލުން އެކަނި ހައްލު ކުރެވޭ ވަރުގެ މައްސަލައެއް ނޫން ކަމަށެވެ.

އެމައްސަލައަކީ ވަރަށްގިނަ މުއައްސަސާ ތަކުން ޝާމިލްވާ މައްސަލަ އަކަށް ވުމުން އެކަން ކައުންސިލުން އެކަނި އެކަން ހައްލު ނުކުރެވޭނެ ކަމަށާއި ގޮޅިތައް ނަންގަވައިފައި ތިއްބެވި ބޭފުޅުން އެތަންތަނުގައި ވިޔަފާރިކުރުމަށް ބިދޭސީން ނަށް ފުރުސަތު ނުދިނުމަށް މުޢިއްޒު އިލްތިމާސް ކުރެއްވިއެވެ.