ބައެއް މީހުން، ދުނިޔެއާއިމެދު ދަހިވެތިވެ، މުދަލާއިގެން މަޝްޣޫލުވުމުގެ ސަބަބުން ނަމާދުކޮށް الله އެންގެވި ކަންކަން ކުރުމަށް ވަގުތު ނުވާކަމަށާ، އެފަދަ މީހުންނަށް އެމީހުން މަރުވާނެ ކަމާއި، اللهގެ ހަޟުރަތުގައި ޖަވާބުދާރީވާންޖެހޭނެ ކަން ހަނދާންނެތުނީތޯ މިއަދުގެ ޚުތުބާގައި ސުވާލުކޮށްފިއެވެ. 

"ހަގީގީ ހަޔާތަކީ އުހުރަވީ ހަޔާތް" މި މައުޟޫއަށް މިއަދު އިއްވާފައިވާ ޚުތުބާގައި ބުނީ، ދުނިޔެއަކީ ނުހަނު ކެހިވެރި ތަނެއް ކަމަށެވެ. އަދި ދުނިޔޭގެ އެދުންތަކާ މެދު ވިސްނުމެއް ނުބަހައްޓައި އުޅެން ފަށައިފިނަމަ އެންމެފަހުން ތިމާ އެ ކެހިވެރިކަމުގައި ޖެހޭނެ ކަންވެސް ވަނީ ހަނދާންކޮށްދީފައެވެ.

މިއާއެކު ޚުތުބާގައި ވަނީ ދުނިޔަވީ އެދުންތަކުގައި އިންސާނާ މަސްއޫލުވުމުގެ ސަބަބުން އުހުރަވީ ހަޔާތް ގެއްލިދާނެ ކަމަށްޓަކައި ކަމަށާއި ހަލާލެއް ހަރާމެއް ބެލުމެއްނެތި، ބައެއް މީހުން ދުނިޔޭގައި ދިރިއުޅެމުންދާއިރު އެމީހުން الله ގެ ހަޟުރަތުގައި ޖަވާބުދާރީވާންޖެހޭނެ ކަން ނުދަންނަނީތޯވެސް ޚުތުބާގައި ވަނީ ސުވާލު ކޮށްފައެވެ. 

"އެބައިމީހުން ދުނިޔެއާ މެދު ދަހިވެތިވެ މުދަލައިގެން މަސްއޫލުވުމުގެ ސަބަބުން ނަމާދު ކުރާކަށް ވަގުތެއް ނުވެއެވެ. މުދާ ހޯދުމުގައި ހަރާމެއް ހަލާލެއް ބެލުމެއް ނެތެވެ. މީހެއްގެ ހައްގަކަށް އަރައިގަތުމަކީ އެއްވެސް ކަމެއް ކަމުގައި އެމީހުން ނުދެކެއެވެ. ތިމާގެ ލާބައާއި މަންފާއަށްޓަކައި އަނެކާއަށް ކިތަންމެ ގެއްލުމެއް ލިބުނަސް އަޅާލުމެއް ނެތެވެ. ދުނިޔަވީ ކަންކަމާހެދި ތިމާގެ މައިންބަފައިންނާއި ގާތްތިމާގެ މީހުންނާއި ގުޅުން ކަނޑާލައެވެ. އެފަދައިން ކަންތައް ކުރާއިރު އެބައިމީހުން މަރުވާނެކަމާއި އެއަށްފަހު الله ގެ ހަޟުރަތުގައި ޖަވާބުދާރީ ވާންޖެހޭނެކަން ހަނދާންނެތުނީބާ.؟" ހުތުބާގައި ބުނެފައިވެއެވެ.

މީގެ އިތުރުން ޚުތުބާގައި ބުނީ، ދުނިޔޭގައި އިންސާނާ ކިތަންމެ މުދަލެއް ހޯދިޔަސް އެއީ، ވަގުތީ އެއްޗެއް ކަމަށެވެ. ނުވަތަ ތިބާ އެތަކެތި ދޫކޮށްފައި ދާންޖެހޭނެ ތަކެތި ކަމަށެވެ.

އަދި އެއަށްފަހު އޮތީ، މާތް الله ގެ ޙަޟްރަތުގައި ޖަވާބުދާރީ ވާންޖެހޭ ދުވަސް ކަމަށާ އެ ދުވަހު އޮތީ ދެގޮތް ކަމަށްވެސް ޚުތުބާގައި ބުނެފައިވެއެވެ.

"އެއްގޮތަކީ ތިމާއަކީ މާތް الله އެންގެވި ގޮތަށް އެމުދާ ހޯދައި، އެގޮތުގައި އެމުދާ ހޭދަކޮށްފައިވާ މީހަކު ކަމުގައި ވުމެވެ. އެފަދަ މީހަކަށް ތިބާ ވެއްޖެނަމަ، އުފަލުގެ ކޮޅެއް ނެތެވެ. އަނެއް ގޮތަކީ މުދާ ހޯދުމުގައްޔާއި، ޚަރަދުކުރުމުގައި މާތް الله ގެ އަމުރުފުޅާ ޚީލާފުވެ، އޭގެ ސަބަބުން މާތް الله ހަނދުމަކުރުމުން ތިބާ އެއްކިބާ ވެފައި ވުމެވެ. އެފަދަ މީހަކަށް ހުރި ހިތާމައިގެ ކޮޅެއްނެތެވެ. އެފަދަ މީހަކަށް ހުރި ހަލާކެއްގެ ބޮޑުކަމާއެވެ!" ޚުތުބާގައި ބުނެފައިވެއެވެ.