މަސައްކަތްތެރިންނާއި، މަސައްކަތްތެރިންގެ އާއިލާތަކުގެ ހާލަތު ރަނގަޅު ކޮށް، އާމްދަނީ އިތުރުކޮށްދިނުމަށް މިސަރުކާރުން ކުރެވުނު އެންމެ މުހިންމު ކަމަކީ މިނިމަމް ވޭޖް ތަޢާރަފްކުރުން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

މޯލްޑިވްސް ޓްރޭޑް ޔޫނިއަންގެ މަސައްކަތްތެރިންގެ ކޮންގްރެސް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ މިނިމަމްވޭޖަކީ ޤާނޫނުގައި ހިމެނިފައި އޮތަސް އެކަން ތަންފީޒު ކުރުމަށް ކުރީގެ ސަރުކާރުތަކުން މާބޮޑު ސަމާލުކަމެއް ދީފައި އޮތް ކަމެއް ނޫންކަމަށެވެ.  އެ ޤާނޫނުގައި ވަކި މުއްދަތެއްގެ ތެރޭގައި އެކަން ކުރަން ނެތީމަ، ބަލަހައްޓައިގެން ތިބެންވީ ކަމެއްގެ ގޮތުގައި ބެލިފައި އޮތީ ކަމަށްވެދާނެ ކަމަށެވެ.

މިނިމަމްވޭޖްގެ ސަބަބުން ހުރިހާ ދާއިރާއެއްގެ މަސައްކަތްތެރިންނަށް މިއަދު އަންނަނީ އޭގެ މަންފާ ލިބެމުން ކަމަށް ރައީސް ވިދާޅުވިއެވެ. ޚާއްޞަކޮށް، މިނިމަމްވޭޖަށް ގެނައި ބަދަލުގެ ސަބަބުން ފަތުރުވެރިކަމުގެ ޞިނާޢަތުގައި މަސައްކަތްކުރާ 13000 އަށްވުރެ ގިނަ މުވައްޒަފުންނަށް އޭގެ ފައިދާ ލިބޭނެ ކަމަށާއި، ނުވަތަ ރަނގަޅު ގޮތްތަކެއް މިހާރު ލިބޭ ކަމަށް އުންމީދު ކުރައްވާ ކަމަށްވެސް ރައީސް ވިދާޅުވިއެވެ.

އަދި ސަރުކާރުގައި ވަޒީފާ އަދާކުރާ 15000 އަށްވުރެ ގިނަ މުވައްޒަފުންގެ އާމްދަނީއަށް ހެޔޮ ބަދަލެއް މިހާރުވަނީ ގެނެވިފައި ކަން ރައީސް ޞާލިޙްގެ ވާހަކަފުޅުގައި ފާހަގަ ކުރެއްވިއެވެ.

މިނިމަމް ވޭޖުގެ ގޮތުގައި ކަނޑައަޅާފައިވާ 5،700 ރުފިޔާއަކީ ކުދި ވިޔާފާރިތަކުގައި ދުވާލަކު 8 ގަޑިއިރު މުވައްޒަފަކު މަސައްކަތް ކުރުމުން މަހެއްގެމައްޗަށް ދޭންޖެހޭނެ މިންވަރެވެ. މިނިމަމް ވޭޖް އެޑްވައިޒަރީ ބޯޑުން ފާސްކޮށްފައިވާ ގޮތުން މެދު ފަންތީގެ ވިޔަފާރިތަކުގައި ދުވާލަކު 8 ގަޑިއިރު މަސައްކަތްކުރުމުން މަހެއްގެ މައްޗަށް މުވައްޒަފުންނަށް 7،000 ރުފިޔާ މުސާރައިގެ ގޮތުގައި ދޭންޖެހެއެވެ.

މަސައްކަތްތެރިންގެ ޙައްޤުގައި ކުރެވުނު މުހިންމު އަނެއް ކަމަކީ، ފަތުރުވެރިކަމުގެ ޞިނާޢަތުގައި މަސައްކަތްކުރާ މީހުންނަށް ސަރވިސް ޗާޖްގެ ފައިދާ ހަމަހަމައަށް ލިބިދިނުމަށް ޤާނޫނަށް ގެނައި ބަދަލުތައްކަން ފާހަގަ ކުރައްވާ ރައީސް ވިދާޅިވީ  އެ ބަދަލުތަކާއެކު، ފަތުރުވެރިކަމުގެ ޞިނާޢަތުގައި ހިންގާ ވިޔަފާރިތަކުން 10 ޕަސެންޓްގެ ސަރވިސް ޗާޖް ނެގުން ޤާނޫނުން މިހާރު ވާނީ ލާޒިމްކޮށްފައި ކަމަށެވެ. އަދި ސަރވިސް ޗާޖުގެ ގޮތުގައި ލިބޭ އެއްޗެއްގެ 99 އިންސައްތަ، އެ ތަނެއްގައި މަސައްކަތްކުރާ މުވައްޒަފުންނަށް ހަމަހަމަގޮތެއްގައި ދިނުމަށްވެސް އެ ޤާނޫނު ލާޒިމްކުރާ ކަމަށް ރައީސް ވިދާޅުވިއެވެ.

2021 ވަނަ އަހަރުގެ ޖަނަވަރީ 1 ފެށިގެން  ފަތުރުވެރިކަމުގެ ސިނާއަތުގައި ހިންގާ ވިޔަފާރިތަކުން ފޯރުކޮށްދޭ ކޮންމެ ހިދުމަތަކުން 10 ޕަސެންޓަށް ވުރެ މަދު ނޫން އަދަދަކުން ސާވިސް ޗާޖު ނެގުން ވަނީ ލާޒިމް ކޮށްފައެވެ.