ނާކާމިޔާބު ވުމަކީ ގޮތް ބަދަލުކުރަން ޖެހޭ ކަމެއް ނޫންކަމަށް ވިދާޅުވެ ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާނު އަބްދުﷲ ކުރެއްވި ޓްވީޓާއި ގުޅިގެން ދީނީ ކަންތައްތަކަށް މީހުން ހޭލުންތެރިކުރަމުން އަންނަ ޢަލީ ރަމީޒު ހޫނު ރައްދެއް ދެއްވައިފި އެވެ. 

ނާކާމިޔާބީއާއި ކުރިމަތިލާން ޖެހުމަކީ އެމީހާ ހުރި ގޮތެއްގެ މަތީގައި ދެމި ނުހުރެވެންވީ ސަބަބެއް ނޫން ކަމަށް އަދާލަތު ޕާޓީގެ ރައީސް އަދި ސަރުކާރުގެ ހޯމް މިނިސްޓަރު އިމްރާނު އަބްދުﷲ ވަނީ ކުރެއްވި ޓްވީޓެއްގައި ވިދާޅުވެފަ އެވެ. 

އިމްރާނު އެހެން ވިދާޅުވުމާއި ގުޅިގެން އޭނާއަށް ބޮޑެތި ފާޑުކިޔުންތަކެއް ދަނީ އަމާޒުވަމުން ނެވެ. 

އެގޮތުން އިމްރާނު ރިޔާސީ އިންތިޚާބުތަކާއި ދިމާކޮށް އެކިފަހަރު އެކިކޮޅަށް ހުންނެވިކަން، ސޯޝަލް މީޑިއާގައި އޭނާއަށް ފާޑުކިޔަމުންދާ ފަރާތްތައް ގެންދަނީ ހަނދާންކޮށްދެމުން ނެވެ. 

އިމްރާނުގެ އެ ވާހަކަތަކަށް ރައްދުދެއްވަމުން އަލީ ރަމީޒު ކުރެއްވި ޓްވީޓެއްގައި ވިދާޅުވީ އެއްގޮތެއްގައި ހުންނަވާ ވާހަކަ މިއަދު އިމްރާނު ދައްވަނީ އިތުރު ގޮތެއް ނެތުމުން ކަމަށެވެ. 

ނިމިދިޔަ ރިޔާސީ އިންތިޚާބުގައި އެމްޑީޕީއާއެކު އަދާލަތުން ކޯލިޝަން ހަދާފައިވާއިރު، އަންނަ އިންތިޚާބުގައިވެސް އެމްޑީޕީއާއި ބައިޔަތު ހިފާ ރައީސް ޞާލިހަށް ތާއީދުކުރައްވަން ނިންމާފައިވާކަން އަދާލަތުން ވަނީ އިއުލާނުކޮށްފަ އެވެ. 

އެފަހުން އެއްގޮތެއްގައި ހުންނަވާ ވާހަކަ އިމްރާނު ދެއްކެވުމާއި ގުޅިގެން އަލީ ރަމީޒު ވިދާޅުވީ (އަދާލަތަކީ) ސިޔާސީ ގޮތުން ތިންފަށް ވެފައިވާ ޕާޓީއެއް ކަމަށެވެ. އަދި ތިންފަށްވެ ފައްކަނޑާނެ އިތުރު ޕާޓީއެއް ނެތުމުން ގޮތުގައި ހުރުން ނޫން "ޗޮއިސް" އެއް (އަދާލަތަށް) ނެތްކަމަށް އަލީ ރަމީޒު ވިދާޅުވި އެވެ. 

ކުރިއަށް އޮތް ރިޔާސީ އިންތިޚާބުގައި އަދާލަތުން އެމްޑީޕީއާއެކު ކޯލިޝަން ހަދަން ނިންމުމުން ގިނަ ފާޑުކިޔުންތަކެއް ވަނީ އަމާޒުވެގެން ގޮސްފަ އެވެ. 

އެގޮތުން އެ ނިންމުމަކީ ރަނގަޅު ނިންމުމެއް ނޫންކަމަށް އިލްމުވެރިންގެ ޖަމުއިއްޔާގެ އަގުލަބިއްޔަތު އިލްމުވެރިން އިއްތިފާގުވެ އެވެ.