ތުރްކިޔޭގެ ދެކުނަށް ބާރުގަދަ އާފްޓަރޝޮކް ތަކެއް އަދިވެސް އައުމަކީ އެކަށީގެންވާ ކަމެއްކަމަށް ކަމާއިބެހޭ އޮފިޝަލުން ވިދާޅުވެއްޖެއެވެ.

6 ފެބްރުއަރީ ގައި ތުރްކިޔޭ އާއި ސީރިޔާއަށް އައި ބިންހެލުން ތަކުގެ ފަހުން 11،500 އެއްހާ އާފްޓަރޝޮކް އައިސްފައިވާ ކަމަށް ރިކޯޑް ކުރެވިފައިވާ ކަމަށް ތުރްކިޔޭގެ ޑިޒާސްޓާސް އެންޑް އެމަޖެންސީ މެނޭޖްމެންޓުގެ އޮފިޝަލް އޮރްހަން ތަތަރް ވިދާޅުވެފައިވެއެވެ.

ތުރްކިޔޭ އިން ހާމަކޮށްފައިވާ އަދާހަމަ ތަކުގައި ވާގޮތުން ތުރްކިޔޭގެ ކަހްރަމަންމަރާސް، ގަޒިއަންޓެޕް، ސަނިލުރްފާ، ދިޔަރްބަކިރް، އަދާނާ، އަދިޔަމަން، އޮސްމައިން، ހަޓާޔާ، ކިލިސް، މަލަތްޔާ އަދި އެލައިޒިގް އިން 45،089 މީހުން ވަނީ ނިޔާވެފައެވެ. ފެބްރުއަރީ 6 ގައި އައި ދެ ބިންހެލުމަކީ މި ޤަރުނުގައި އައި އެންމެ ބޮޑު ކާރިސާ ކަމަށް ބުނެވެއެވެ.

ބިންހެލުންތަކުގެ އަސަރު ކުރި ޕްރޮވިންސްތަކުން ސަލާމަތްވި 1،971،589 މީހަކު ވަނީ ރައްކާތެރި ކަން ހޯދައިދިނުމުގެ ގޮތުން އެހެން ޕްރޮވިންސްތަކަށް ބަދަލުކޮށްފައެވެ.

ތުރްކިޔޭގެ ދެކުނަށް ބިންހެލުންތަކާއި އާފްޓަރޝޮކް ތައް ދަނީ އަންނަމުންވެ. އެގޮތުން އެންމެ ފަހުން ހުކުރުދުވަހު ކަހްރަމަންމަރާސް އަށް ވަނީ 5.0 މެގްނެޓިޔުޓް ގެ ބާރުމިނުގެ އާފްޓަރޝޮކެއް އައިސްފައެވެ.

ފެބްރުއަރީ 6 ވަނަ ދުވަހު އައި ބިންހެލުންތަކުގެ ސަބަބުން ތުރްކިޔޭގެ 11 ޕްރޮވިންސަކަށް ގެއްލުންވެ މީހުން ދިރިއުޅުނު އިމާރާތްތައް ވެއްޓި އެތައްބަޔެއްގެ ބޯހިޔާވަހިކަން ވަނީ ގެއްލިފައެވެ. އެތައް ބަޔަކު ވަގުތީ ހިޔާވަހިތަކުގައި އަންނަނީ ދިރިއުޅެމުންނެވެ. ތުރްކިޔޭގެ ރައީސް ރަޖަބް ޠައްޔިބް އުރްދުޣާން ވިދާޅުވެފައިވަނީ އަހަރެއްހާ ދުވަސް ތެރޭގައި އިމާރާތްތައް އަލުން ބިނާކުރާނެ ކަމަށެވެ.