ވެލާނާ އިންޓަރ ނޭޝަނަލް އެއަރޕޯޓް ހިންގާ މޯލްޑިވްސް އެއަރޕޯޓްސް ކޮމްޕެނީ އިން އެ ކުންފުނީގެ މުވައްޒަފުންގެ ސަލާމަތާއި ދުޅަހެޔޮ ސިއްޙަތާއި ރައްކާތެރިކަމާއި ގުޅިގެން ހިންގާ "ބިނާރު" ޕްރޮގްރާމް ފަށައިފިއެވެ.
ވެލާނާ އިންޓަރ ނޭޝަނަލް އެއަރޕޯޓުގައި މިކަމަށް ޚާއްސަ ކޮށްގެން ބޭއްވުނު ރަސްމިއްޔާތުގައި މި ޕްރޮގްރާމް ފައްޓަވައި ދެއްވީ ޑިފެންސް މިނިސްޓަރ މާރިޔާ އަޙްމަދު ދީދީއެވެ.
މި ޕްރޮގްރާމަކީ އެމްއޭސީއެލްގެ ސޭފްޓީ، ސެކިޔުރިޓީ އަދި ކޮމްޕްލަޔަންސް ޑިޕާޓްމަންޓުގެ އިސްނެގުމުގެ ދަށުން ކުރިއަށް ގެންދާ ޕްރޮގްރާމެކެވެ.
މި ފެށުނު "ބިނާރު" ޕްރޮގްރާމްގެ ދަށުން ކުރިއަށް ގެންދާ ހަރަކާތް ތަކުގެ ތެރޭގައި އެކުންފުނީގެ މުވައްޒަފުންގެ ހެލްތް ސްކްރީން ކުރުން، ސަލާމަތާއި ސިއްޙަތާއި އަދި ރައްކާތެރިކަމާއި ގުޅޭ ހޭލުންތެރިކުރުމުގެ ޕްރޮގްރާމްތައް، ސްކޫލް ކުދިންނަށް ދޭ އެއަރޕޯޓް ބަސް ޓުއަރ، ބިނާރު އޮންލައިން ކުއިޒް އަދި އަތިރިމަތި ސާފުކުރުން ހިމެނެއެވެ.
އެމްއޭސީއެލް އިން ބުނެފައިވަނީ މި ޕްރޮގްރާމް ހިންގުމުގެ މަޤްސަދަކީ އެއާޕޯޓުގެ ހުރިހާ ދާއިރާއެއް ހިމެނޭހެން މުވައްޒަފުންގެ ސަލާމަތާއި ރައްކާތެރިކަމުގެ ސަގާފަތެއް ބިނާކޮށް ދެމެހެއްޓުމަށް މަސައްކަތް ކުރުމާއި އެކު އޮކިއުޕޭޝަނަލް ހެލްތު އެންޑް ސޭފްޓީ އާއި ސެކިއުރިޓީގެ މައްސަލަތައް ފަސޭހައިން ރިޕޯޓްކުރެވޭނެ ގޮތް ހަމަޖެއްސުމުގެ އިތުރުން އެ މައްސަލަތަކަށް އަވަހަށް، ފަސޭހައިން އެޑްރެސްކުރެވޭނެ ގޮތްތައް ތައާރަފުކުރުން ކަމަށެވެ.
Advertisement
This content is created and paid for by advertisers and does not involve Voice Journalists
