ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢު އިންޑިއާގެ ރެނާޓަސް ކުންފުންޏާ ޙަވާލުކޮށްފިއެވެ.

މީރުމާގެ ކޮންފަރެންސް ހޯލްގައި ބޭއްވި ރަސްމިއްޔާތެއްގައި މި މަޝްރޫޢުގެ އެއްބަސްވުމުގައި ސަރުކާރުގެ ފަރާތުން ސޮއި ކުރެއްވީ އައްޑޫ އިންޓަނޭޝަނަލް އެއާޕޯޓް ކޮމްޕެނީގެ މެނޭޖިން ޑިރެކްޓަރު ގައިސް ނަސީރެވެ. ރެނާޓަސްގެ ފަރާތުން ސޮއިކުރެއްވީ އެކުންފުނީގެ ޗެއާރމަން ސިލްވަސުންދަރަމްއެވެ.

މި އެއްބަސްވުމުގެ ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ގައިސް ނަސީރު ވިދާޅުވީި އައްޑޫގައި މިހާރު ކުރިއަށްދާ ތަރައްޤީގެ މަޝްރޫޢުތަކަކީ އެއަރޕޯޓް މަޝްރޫޢާ ގުޅި ލާމެހިފައިވާ މަޝްރޫޢުތަކެއްކަމަށެވެ.

Advertisement

"މިޕްރޮޖެކްޓާއެކު އައްޑޫ އެއަރޕޯޓުން އިތުރު ކަންތައްތަކެއް ކުރުމަށްވެސް ހަމަޖެހިފައި އެބަވޭ. އެގޮތުން ގަމުގައި 130 ކޮޓަރީގެ ދޫގަސް ހޮޓަލާއި 50 ކޮޓަރީގެ ބުޓީ ކޮޓަރީގެ މަސައްކަތްތައް ފެށިގެންދާނެ. މި ހުރިހާ މަޝްރޫޢުތަކަކީވެސް އައްޑޫ ސިޓީއާއި ދެކުނުގެ އިޤްތިޞާދަށް ބޮޑެތި ކުރިއެރުންތަކެއް ލިބިގެންދާނެ މަސައްކަތްތަކެއް. އެއަރލައިންތަކާއި ޕަސިންޖަރުންނާއި ވިޔަފާރިވެރިންނާއި ރިސޯޓް، ގެސްޓްހައުސް ހިންގާ މީހުންނަށާއި ރައްޔިތުންނަށް މަންފާ ކުރާނެ." ގައިސް  ވިދާޅުވިއެވެ.

ގައިސް އިތުރަށް ވިދާޅުވީ އެއަރޕޯޓުގެ މަސައްކަތް ނިމިގެންދާއިރު ގަން އިންޓަރނޭޝަނަލް އެއަރޕޯޓް ވެގެންދާނީ އިންޓަރނޭޝަނަލް އެއަރޕޯޓެއްގައި ހުންނަންޖެހޭ ހުރިހާ ވަޞީލަތްތައް ޤާއިމްކޮށްފައިވާ ތަނަކަށްކަމަށެވެ.

ގަން އެއާޕޯޓު ތަރައްގީކުރަނީ އިންޑިއާގެ އެގްޒިމް ބޭންކުން ރާއްޖެއަށް ދޫކޮށްފައިވާ ލައިން އޮފް ކްރެޑިޓްގެ ދަށުން، 17 މިލިއަން ޑޮލަރު (272.2 މިލިއަން ރުފިޔާ) ހަރަދުކޮށްގެންނެވެ.

މި މަޝްރޫއުގެ ދަށުން އަހަރަކު 1.5 މިލިއަން ފަސިންޖަރުންނަށް ހިދުމަތް ދެވޭ ވަރުގެ ޒަމާނީ ވަސީލަތްތަކާ އެކުގައި ޕެސެންޖާ ޓާމިނަލް ތަރައްޤީ ކުރަން ވަނީ ނިންމާފައެވެ. 
ހަމައެއާއެކު އާ ކޮންޓްރޯލް ޓަވަރަކާއި ފަޔާ ސްޓޭޝަން އިމާރާތް ކުރުމަށް ވަނީ ހަމަޖެހިފައެވެ. އަދި އެއާޕޯޓަށް ބޭނުންވާ ކޯލްޑް ސްޓޯރޭޖާއެކު ކާގޯ ވަސީލަތްތައް ތަރައްގީ ކުރުމުގެ އިތުރުން އެއާޕޯޓުގެ މަގުތައް ތަރައްގީކޮށް ޕާކިން ސަރަހައްދެއް ވެސް ތަރައްގީ ކުރުމަށް ވަނީ ހަމަޖެހިފައެވެ.

އަދި މީގެ އިތުރުން ފިހާރަތަކާއި ރެސްޓޯރެންޓުތަކާއި ލައުންޖު އަދި އެ ނޫން ވެސް އެއާޕޯޓް ތަރައްގީ ކުރުމާ ގުޅޭ އެހެނިހެން ގިނަ ކަންތައްތަކެއް މި މަޝްރޫއުގެ ތެރެއިން ކުރުމަށް ވަނީ ހަމަޖހެިފައެވެ.