ޤަޠަރުގައި ވޯލްޑްކަޕް ބޭއްވިއިރު ޓީމްތަކުގެ ފޭނުން ބޭނުންކުރި ޕޯޓަބަލް ގެތައް ތުރްކިޔޭ އަދި ސީރިޔާ އަށް ފެބްރުއަރީ 6 ވަނަ ދުވަހު އައި ބިންހެލުންތަކުގެ ސަބަބުން ގެދޮރުގެއްލިފައިވާ މީހުނަށް އެހީއެއްގެ ގޮތުގައި ފޮނުވައިފިއެވެ.

ޤަޠަރުން މިހާރު ވަނީ އޭގެ 400 ގެ ބޯއްޓަށް ބަރުކޮށް ފޮނުވައިފައެވެ. އޭގެ ތެރެއިން ދެ ބޯއްޓެއް މިހާރު ތުރްކިޔެގެ އިސްކަންދެރުން އަށް ވަނީ ބަނދަރުކޮށްފައެވެ.

ފެބްރުއަރީ  6 ގައި އައި ބިންހެލުމުގެ ސަބަބުން 2 މިލިއަނެއްހާ މީހުން ވަގުތީ ބޯހިޔާވަހިކަމުގައި ދިރިއުޅެމުންއެބަދެއެވެ. ބިންހެލުންތަކުގައި ތުރްކިޔޭ އާއި އަވައްޓެރި ސީރިޔާ އިން 50،000 މީހުން ވަނީ ނިޔާވެފައެވެ.

Advertisement

400 ގެ އާއިއެކު 2 ބޯއްޓެއް އިސްކަންދެރުން އަށް ބަނދަރުކޮށް ފައިވާ ކަމަށް ތުރްކިޔޭ އަށް ޤަޠަރުން ކަނޑައަޅައިފައިހުންނަވާ ސަފީރު ވިދާޅުވިއެވެ. އަދި އިތުރު ގެ ތައް އައުމުގެ މަގުމަތީގައި ވާ ކަމަށްވެސް ޝައިޙް މުހައްމަދު ބިން ނައްސިރް އަލް ޘާނީ ވިދާޅުވިއެވެ.

"އަހަރެމެން އުއްމީދުކުރަން މި ގެތައް ހާލުގައި ޖެހުނު މީހުންނަށް ކަމުދާއެއްޗަކަށް ވާނެކަމަށް" ސަފީރު ވިދާޅުވިއެވެ.

ޔޫއެން އިން ބުނެފައިވަނީ 1.5 މިލިއަނަށް ވުރެ ގިނަ މީހުންގެ ގެދޮރު މި ކާރިސާގައި ގެއްލިފައިވާ ކަމަށެވެ.

"އެމީހުން ދިރިއުޅެމުން އެދަނީ ޓެންޓުތަކާއި، ކޮންޓެއިނަރ ސިޓީ އަދި ރޭލު ތަކުގައި" އަލްޖަޒީރާގެ ނޫސްވެރިޔާ ޓެރީސާ ބޯ ބުނެފައިވެއެވެ.

"ރޭލު ތަކުގައި ދިރިއުޅެމުންދާ އާއިލާ ތަކުން ބުނެފައިވަނީ އެމީހުން ދާނެ އިތުރު އެހެން ތަނެއް ނެތްކަމަށް، ރޭލު ތަކުން ބޯހިޔާވަހިކަން ލިބި ރޭގަނޑުގެ ފިނިން ރައްކާތެރިކޮށްދޭ" ތިން ކުދިންނާއި އެކު ރޭލެއްގައި ދިރިއުޅެމުންދާ އެމީން އަތެސް ބުންޏެވެ.  

"އަހަންނަކަށް ނޭނގެ ކިހާދުވަހެއް ވަންދެންކަމެއް މިތާ ތިބެވޭނީ، ރޭލުތައް ބަންދު ކޮށްފިއްޔާ އަހަރެމެން ދާން ޖެހޭނީ ޓެންޓަކަށް، ﷲ އެފަދަ ރެއެއް އެއްވެސް މީހަކަށް ނުދައްކަވާށި، ބިންހެލުން އައި ވަގުތު ހީވަނީ ނަރަކައިގައި ތިބެވުނުހެން، އަވަސް އަރުވާލާފަ ގޭގެއިން ނުކުތީ އެންމެން" އޭނާ ކިޔައިދީފައިވެއެވެ.

ފެބްރުއަރީ 6 ގެ ބިންހެލުން ތަކަށްފަހު މިފާއިތުވި ހަފްތާގައި 5.6 މެގްނެޓިޔުޓްގެ ބިންހެލުމެއް ތުރްކިޔޭގެ މަލްތްޔާ ޕްރޮވިންސަށް ވަނީ އައިސްފައެވެ. މި ބިންހެލުމުގެ ސަބަބުން އެކަކު މަރުވެ އެތައް ބަޔަކަށް ވަނީ އެކިވަރުގެ ޒަހަމްތައް ލިބިފައިވެއެވެ.