ބަންގްލަދޭޝްގައި ރޮހިންޔާ ރެފިޔުޖީން ދިރިއުޅެމުންދާ ކޭމްޕެއްގައި ބޮޑު އަލިފާން ގަނޑެއް ރޯވެއްޖެއެވެ.

އަލިފާން ގަނޑު ރޯވެފައި ވަނީ ކޮޒް ބާޒާރުގެ 11 ވަނަ ކޭމްޕުގައެވެ. މިސަރަހައްދުގައި މިލިއަނެއްހާ ރޮހިންގްޔާ މުސްލިމް ރެފިޔުޖީން ދިރިއުޅެވެ. އަދި އަލިފާން ގަނޑުގެ ސަބަބުން އެތައް ހާސް މީހަކު ވަނީ ބޯހިޔާވަހިކަން ގެއްލިފައެވެ.

"އަދި އަންދާޒާ ކޮށްލަން ވެސް ނޭނގެ ލިބުނު ގެއްލުން، އަދި މިހާތަނަކަށް މީހަކުމަރުވި ކަމަކަށް މައުލޫމާތު ލިބިފައެއް ނުވޭ" ކޮޒް ބާޒާރު ބަލަހައްޓާ ޕޮލިސް ސްޕްރިޓެންޑެންޓް ރަފީޤުލް އިސްލާމް ވިދާޅުވިއެވެ.

Advertisement

ރަފީޤުލް އިސްލާމް ވިދާޅުވީ އަލިފާން ގަނޑު ކޮންޓްރޯލް ކުރެވިފައިވާ ކަމަށެވެ. އަދި ފުލުހުންނާއި ފަޔާރ ޑިޕާޓްމެންޓުގެ އޮފިޝަލުން ވެސް ހާދިސާ ހިގަނގެން އުޅޭ ސަރަހައްދުގައި ތިބިކަމަށެވެ.

ބަންގްލަދޭޝްގެ ޑާކާގައި ހުރެގެން މައުލޫމާތު ދެމުން ތަންވީރް ޗައުދަރީ ބުނެފައިވަނީ އަލިފާން ރޯވި ބަލޫޚާލީ ކޭމްޕަކީ ކޯޒް ބާޒާރުގައި އޮންނަ 32 ކޭމްޕް ގެ ތެރެއިން ކޭމްޕެއް ކަމަށާއި އެކޭމްޕުތަކުގައި 1.2 މިލިއަން މީހުން ދިރިއުޅޭ ކަމަށެވެ.

"އަލިފާންގަނޑު އަދި އެއްކޮށް ނުނިވޭ، ލަފާ ކުރެވެނީ ކައްކާ ގޭސް ފުޅިއެއްގައި ރޯވެގެންކަމަށް އަލިފާންގަނޑު ރޯވީ، މިތަން ހަދައިފައި ހުންނަނީ އޮނުން، އެހެންވެ ވަރަށް ފަސޭހަކޮށް އަލިފާން ގަނޑު ފެތުރިގެންދާނެ" ތަންވީރް ޗައުދަރީ ބުނެފައިވެއެވެ.

"މިސަރަހައްދުގެ ސިއްޚީ ޚިދްމަތްދޭ ތަންތަނަކީ ވަރަށް ތަކެތީގެ ދަތިކަން ހުރި ތަންތަން، މި ހިސާބުގައި ފީލްޑް ހޮސްޕިޓަލްތައް ވަރަށް ގިނަ، އެކަމަކު 1.2 މިލިއަން މީހުންގެ އާބާދީއަކަށް އެމަޖެންސީ އެއްގައި ޚިދްމަތް ދެވޭނެ ވަރުގެ ޤާބިލިއްޔަތުކަމެއް ނެތް" ތަންވީރް އިތުރަށް ބުނެފައިވެއެވެ.

 2017 އިން ފެށިގެން މިހާތަނަށް މިލިއަނަކަށް ވުރެ ގިނަ ރޮހިންގްޔާ މީހުން މިޔަންމާ ދޫކޮށް ބަންގްލަދޭޝް އަށް ހިޖުރަ ކޮށްފައިވެއެވެ. މިޔަންމާގައި ދިރިއުޅެމުންދިޔަ ރޮހިންގްޔާ މުސްލިމުން ޤައުމު ދޫކޮށް ބަންގްލަދޭޝްއަށް ހިޖުރަކޮށްފައިވަނީ މިޔަންމާގެ ސަރުކާރުން މުސްލިމުންނާއި މެދު އިންސާނިއްޔަތާއި ޚިލާފު ޢަމަލު ތައް ހިންގަން ފެށުމުންނެވެ.