ގަން އިންޓަނޭޝަނަލް އެއާޕޯޓު ތަރައްގީކުރަން ހަވާލުކުރީ، އެންމެ އަވަހަށް އެ މަސައްކަތް ނިމޭ ގޮތަށް ކަމަށް އިކޮނޮމިކް މިނުސްޓަރު ފައްޔާޒު އިސްމާއީލް ވިދާޅުވެއްޖެއެވެ.

ރާއްޖޭގެ އެންމެ ދުވަސްވީ އެއާޕޯޓު ކަމަށްވާ އައްޑޫ ގަން އިންޓަނޭޝަނަލް އެއާޕޯޓު ބޮޑުކޮށް، ޒަމާނީ ފެންވަރަށް ތަރައްގީ ކުރުމާ ގުޅޭ އެއްބަސްވުމުގައި ސޮއިކޮށްފައި ވަނީ އިއްޔެއެވެ.

އެ މަސައްކަތް ހަވާލު ކޮށްފައި ވަނީ އިންޑިއާގެ ރެނާޓަސް ޕްރޮޖެކްޓްސްއާއެވެ.

Advertisement

އެއްބަސްވުމުގައި ސޮއިކުރަން އިއްޔެ ހ. މީރުމާގައި ބޭއްވި ރަސްމިއްޔާތުގައި ވާހަކަ ދައްކަވަމުން ފައްޔާޒު ވިދާޅުވީ ގަން އެއާޕޯޓު ތަރައްގީކުރުމުގެ މަަޝްރޫއު ރާވާފައިވަނީ އެ އެއާޕޯޓު ހިންގާ ކުންފުނީގެ މަޝްވަރާއާ އެކުގައި، އެމީހުން ބޭނުންވި ގޮތަށް ކަމަށެވެ.

"އަޅުގަނޑުމެން މި ވޭތުވެދިޔަ ދުވަސްތަކުގައި އައްޑޫ އެއާޕޯޓު ތަރައްގީކުރުމުގައި އެއާޕޯޓު ކުންފުނީގެ ހިއްސާދާރުންނާއި ބޯޑު މަޝްވަރާއާ އެއްކޮށް އެ ބޭފުޅުން ބޭނުންވި ގޮތަށް އެއަށް ބޭނުންވާ ފައިސާ ހޯދައިގެން މި ކަން މި ކުރަނީ،" ފައްޔާޒު ވިދާޅުވިއެވެ.

"އަޅުގަނޑު މިހެން މި ފާހަގަކޮށްލީ، މިކަން ވީމަ ބައެއް ބޭފުޅުން ފާހަގަކުރޭ އައްޑޫ ވީމަ ދެން ހާދަހާ އާދައިގެ ޓާމިނަލެކޭ. އަޅުގަނޑުމެން މިކަން މި ކުރީ އެންމެ އަވަހަށް އައްޑޫގެ އިގްތިސާދު ކުރިއަށްގެންދަން. ފަހުން ތަޅާލާފައި އާ އެއްޗެއް ހަދާނީ ލާރި ލިބެން ފެށީމަ. ވަރަށް ޕްރެކްޓިކަލް ވިސްނުމެއްގައި މިކަން ކުރަމުން މިދަނީ." ފައްޔާޒް ވިދާޅުވި އެވެ. 

އައްޑޫ އިންޓަނޭޝަނަލް އެއާޕޯޓު ކުންފުނީގެ ހިއްސާ ބެހިފައިވަނީ ސަރުކާރަށް %70، އަދި ކާސާ ހޯލްޑިންގްސް އަށް %30 ރޭޓުންނެވެ.

ދެ އަހަރުން ނިންމަން ހަވާލު ކުރި ގަން އިންޓަނޭޝަނަލް އެއާޕޯޓު މަޝްރޫއުގެ އަގަކީ 29.7 މިލިއަން ޑޮލަރު (455.9 މިިލިއަން ރުފިޔާ)އެވެ.