ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމަށް ޙުކުމްކުރާ ކޮންމެ ފަނޑިޔާރަކު ޕްރޮމޯޓްވާނަމަ އެއީ އިއްތިފާގެއް ނޫން ކަމަށާ، އެއީ ކޮރަޕްޝަން ކަމަށް އެމަނިކުފާނުގެ އިސް ވަކީލް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ. 

ކްރިމިނަލް ކޯޓުގެ އިސް ޤާޟީ، އަދި ވ. އާރަށު މައްސަލާގައި ރައީސް ޔާމީން 11 އަހަރަށް ޖަލަށް ލާން ހުކުމް ކުރި ގަޒީ، އަހުމަދު ޝަކީލު، ހައި ކޯޓުގެ ފަނޑިޔާރުކަމަށް އައްޔަންކުރުމަށް ޖުޑީޝަލް ސާރވިސް ކޮމިޝަން، ޖޭއެސްސީން ނިންމާފައިވާ ކަމަށް އެ ކޮމިޝަނުން މިއަދު ވަނީ އިއުލާން ކޮށްފަ އެވެ. 

އެކަމާއި ގުޅިގެން ކަންބޮޑުވުން ފާޅުކުރައްވައި ޑރ ޖަމީލް ކުރެއްވި ޓްވީޓެއްގައި ވިދާޅުވީ، ޖޭއެސްސީން ޝަކީލް އަށް ދިން މި ޕްރޮމޯޝަނަކީ އިއްތިފާގެއް ކަމަށް އެ ކޮމިޝަނުން ބުނާނެ ކަމަށެވެ.

Advertisement

އެހެން ނަމަވެސް، ރައީސް ޔާމީނަށް ޙުކުމްކުރާ ކޮންމެ ފަނޑިޔާރަކު ޕްރޮމޯޓްވާނަމަ އެއީ އިއްތިފާގެއް ނޫންްކަމަށާ، އެހެނެއް ކަމަކު އެއީ ކޮރަޕްޝަން ކަމަށްވެސް ޑރ. ޖަމީލް ވިދާޅުވި އެވެ. 

"ޢިލްމީ ފެންވަރާއި ހުނަރަކޮބައިތޯ؟ އިންސާފަކީ ސަމާސާކަމެއް ނޫން." ޑރ. ޖަމީލް ވިދާޅުވި އެވެ. 

ޖޭއެސްސީން ބުނެފައިވާ ގޮތުގައި، ޝަކީލް އެ މަގާމަށް އައްޔަނު ކުރީ، ހައިކޯޓަށް ފަނޑިޔާރުން ހޯދުމަށް ޖެނުއަރީ 14ގައި ކުރި އިޢުލާނުގެ ދަށުން ދިވެހިރާއްޖޭގެ ހައި ކޯޓަށް ކުރިމަތިލާފައިވާ ފަރާތްތަކާ "ފަނޑިޔާރުން ޢައްޔަންކުރުމުގައި ކޮމިޝަނަށް ލަފާދޭ ކޮމިޓީ"އިން އިންޓަރވިއު ކުރުމަށްފަހުގައި ކަމަށެވެ. 

އެހެން ނަމަވެސް ޔާމީން ޖަލަށް ލާން ޙުކުމް ކުރި ޤާޒީއަށް މަޤާމުގެ ކުރިއެރުން ދިނުމަކީ މި ސަރުކާރުން އެމަނިކުފާނުގެ މައްޗަށް އަނިޔާވެރިވެ، ސަރުކާރުން ބޭނުންވާ ޙުކުމެއް ކުރުމަށް ހިތްވަރު ދިނުން ކަމަށް އިދިކޮޅުން ބުނެފައިއެވެ. 

އަދި ރައީސް ޔާމީންގެ ފަރާތްޕުޅުން ކްރިމިނަލް ކޯޓުގެ ޙުކުމް ހައިކޯޓުގައި އިސްތިޢުނާފް ކޮށްފައިވަނިކޮށް، ދަށު ކޯޓުން ޙުކުމް ޖެހި ޤާޒީއަށް މަޤާމުމެ ކުރިއެރުން ދިނުމަކީ، ސަރުކާރުގެ ނުފޫޒު ސިއްރާއި ފާޅުގައި ޖުޑިޝަރީއަށް ފޯރުވާ، ސަރުކާރު ބޭނުންވާ ޙުކުމެއް ކުރުމަށް ހިތްވަރު ދިނުންކަމުގައިވެސް އިދިކޮޅުން ބުނެއެވެ. 

މީގެ ކުރިން ރައީސް ޔާމީނަށް ޙުކުމް ކުރި ޤާޒީ ޢަލީ ރަޝީދަށްވެސް އެތައް މަންފާއަކާއެކު ވަޒީފާގެ ކުރިއެރުން ޖޭއެސްސީން ވަނީ ދީފައެވެ.