ޕާކިސްޠާނުގެ ޓީވީ ތަކުން ކުރީގެ ބޮޑުވަޒީރު ޢިމްރާން ޚާންގެ ތަޤުރީރުތަކާއި ނޫސްވެރިންގެ ބައްދަލުވުންތައް ދެއްކުން ޕާކިސްޠާނު ސަރުކާރުން މަނާކޮށްފިއެވެ.
ޕާކިސްޠާނުގެ ސަރުކާރުން ޢިމްރާން ޚާންގެ ތަޤްރީރުތަކާއި ނޫސްވެރިންގެ ބައްދަލުވުންތައް ދެއްކުން މަނާކޮށްފައިވަނީ ދައުލަތުގެ ޤާނޫނާއި ގަވާއިދުތަކަށް ގޮންޖަހާކަމަށާއި ނަފްރަތު އުފެއްދުމަށް މަސައްކަތް ކުރާ ކަމަށް ބުނެއެވެ.
ޕާކިސްޠާނުގެ އިލެކްޓްރޯނިކް މީޑިއާ ރެގިޔުލޭޓަރ އިން ވަނީ ޢިމްރާން ޚާން ގެ ތަޤުރީރުތަކާއި ނޫސް ކޮންފަރެންސް ތައް ދެއްކުން މަނާކޮށްފައިވަނީ އާދީއްތަ ދުވަހު ލާހޯރުގައ ޢިމްރާން ދިން ތަޤުރީރެއްގައި އޭނާ ބޮޑުވަޒީރު ކަމުން ވަކިކުރުމުގެ ފަހަތުގައި ވަނީ ކުރީގެ ސިފައިންގެ ޗީފް ޖެނެރަލް
ޤަމަރް ޖާވިދް ބަޖްވާ ކަމަށް ބުނުމުން ކަމަށް އަލްޖަޒީރާގައި ބުނެފައިވެއެވެ.
ޢިމްރާން ޚާން މިގޮތަށް ވާހަކަ ދައްކައިފައި މިވަނީ ޕާކިސްޠާނު ފުލުހުން ކޮރަޕްޝަންގެ ތުހުމަތެއްގައި އޭނާ ހައްޔަރު ކުރުމަށް މަސައްކަތް ކޮށްފައިވާ ދަނޑިވަޅެއްގައެވެ. ޢިމްރާން ޚާން ވަނީ އެތުހުމަތުތަކަށް އިންކާރު ކޮށްފައެވެ.
ޢިމްރާން ޚާން މަޤާމުން ވަކިކުރުމަށް ފަހު ޢިމްރާންގެ ތަޤުރީރްތައް ދެއްކުން މަނާކުރި މިއީ ތިންވަނަ ފަހަރެވެ. މަޤާމު ގެއްލުނު ފަހުން ޢިމްރާން ޚާން ދަނީ ބޮޑެތި ރެލީ ތައް ބާއްވަމުންނެވެ. އަދި އަލުން އިންތިޚާބު ބޭއްވުމަށް ވެސް ދަނީ ގޮވާލަމުންނެވެ.
ޢިމްރާންގެ ތަޤުރީރުތައް ދެއްކުން މަނާކުރިތާ ދެގަޑިއިރު ފަހުން ޢިމްރާން ޚާން ލާހޯރުގައި ދިން ސްޕީޗް ދެއްކި ޕާކިސްޠާނުގެ އަމިއްލަ ޗެނަލެއް ކަމަށްވާ އޭއާރްވައި ޗެނަލް ވަނީ ސަސްޕެންޑް ކޮށްފައެވެ.
ޕާކިސްޠާނުގެ މީޑިއާ ރެގިޔުލޭޓަރީ ބޯޑުން ބުނެފައިވަނީ އޭއާރްވައި ޗެނަލުން ޢިމްރާން ޚާން އަށް ވާގިވެރިވެ ސަރުކާރުން ކަނޑައަޅައިފައިވާ މިންތަކާއި ޚިލާފު ވެފައިވާ ކަމަށެވެ.
އޭއާރްވައިގެ އޮފިޝަލަކު ވިދާޅުވެފައިވަނީ ރެގިޔުލޭޓަރީ ބޯޑުގެ ސްޓޭޓްމަންޓު ނެރެފައިވަނީ 8 ޖެހިއިރުކަމަށެވެ. އަދި ގާތްގަނޑަކަށް ހުރިހާ ނިއުސް ޗެނަލް ތަކަކުން ވެސް 9 ގެ ޚަބަރުގައި ޢިމްރާން ޚާންގެ ތަޤްރީރު ދެއްކި ކަމަށާއި ނަމަވެސް ބޯޑުން ސަސްޕެންޑް ކުރީ އެޗެނަލް އެކަނި ކަމަށް ބުނެ ކަންބޮޑުވުން ފާޅުކޮށްފައިވެއެވެ.
Advertisement
This content is created and paid for by advertisers and does not involve Voice Journalists
