ހުޅުލޭގެ އިރުއުތުރުގައި އަޅައިފައިހުރޮ އޮޑިދޯނިފަހަރު ނެގުމަށް މޯލްޑިވްސް އެއަރޕޯޓް ކޮމްޕެނީ އިން އަންގައިފިއެވެ.

އެމްއޭސީއެލް އިން މިގޮތަށް އަންގައި އިއުލާނު ކޮށްފައިމިވަނީ  ހުޅުލޭގެ އިރު އުތުރު ފަރާތުގައި ޕައިލިން މަސައްކަތް ކުރުމަށްޓަކައި އެސަރަހައްދު ހުސްކުރަން ބޭނުންވާތީއެވެ.

މިކަން އެންގުމަށް އެމްއޭސީއެލް އިން ނެރެފައިވާ އިއުލާނުގައި ބުނެފައިވަނީ ހުޅުލޭގެ އިރުއުތުރު ފަރާތުގައި ހުޅުލެއާއި ހުޅުމާލޭގެ ފަޅު ވަކި ކުރުމަށްޓަކައި، ވޯޓާ ފެންސް ޖެހުމަށް ހަރުކޮށްފައިވާ އޮރެންޖު ބޮއި ސަރަހައްދުގައި ޕައިލިން މަސައްކަތް ކުރުމަށް އެސަރަހައްދުގައި އަޅާފައިވާ ކަނޑު އުޅަނދު ފަހަރުތައް މި މަހުގެ ނުވަ ވަނަ ދުވަހުގެ ކުރިން ނެގުމަށެވެ..

އެހެންކަމުން، އޮރެންޖު ބޮއެ އިން ފެށިގެން އުތުރަށް (ހުޅުމާލެ ފަޅިއަށް) 20 މީޓަރު ނުވަތަ 65 ފޫޓުގެ ދުރުމިނެތް ކަނޑު އުޅަނދު ފަހަރުގެ ރައްކާތެރިކަމަށްޓަކި ބެހެއްޓުމަށް ވެސް އެމްއޭސީއެލް  ވަނީ އެދިފަ އެވެ.

އަދި އެމްއޭސީއެލްއިން ކުރި އިއުލާނުގައި ވަނީ އެ ސަރަހައްދަށް ވަންނަ އެއްވެސް ކަނޑު އުޅަނދު ފަހަރުތަކަށް ލިބޭ ގެއްލުމުގެ ޒިންމާ ނުނަގާނެ ކަމަށް ވެސް ބުނެފައި ވެއެވެ. އެހެންކަމުން މި މަހުގެ 10 ވަނަ ދުވަހުން ފެށިގެން އެ ސަރަހައްދުގައި ބަހައްޓާ ކަނޑު އުޅަނދު ފަހަރު ފުލުހުން ނަގަމުން ދާނެ ކަމަށް އިއުލާނުގައި ބުނެފައި ވެއެވެ.