ބަންގްލަދޭޝްގެ ވެރިރަށް ޑާކާގައި އިމާރާތެއްގައި ބާރުގަދަ ގޮވުމެއް ގޮވައި ބަޔަކު މަރުވެއްޖެއެވެ.

ބަންގްލަދޭޝްގެ ޑާކާގެ ގުލިސްތާންގައި ހުންނަ 5ބުރީގެ  މި އޮފީސް އިމާރާތުގައި ބާރުގަދަ ގޮވުމެއް ގޮވައި 15 މީހަކު މަރުވެ 140 މީހަކު ވަނީ ޒަހަމްވެފައެވެ. މި ހާދިސާގައި ގޮވިއެއްޗެއްގެ ސަބަބުން އަލިފާން ރޯވެފައިވަނީ އެއިމާރާތުގެ 4ވަނަ ބުރި އާއި 5 ވަނަ ބުރީގައެވެ. އިމާރާތް ހުންނަ ހިސާބަކީ އެ ޤައުމުގެ ހޯލްސޭލް ވިޔަފާރީގެ މައިގަނޑު އެއް ހަބެވެ.

ކަމާބެހޭ ފަރާތްތަކަށް އަދި ބާރުގަދަ ގޮވުން ގޮވި ސަބަބެއް ހޯދިފައެއް ނުވެއެވެ.

Advertisement

"މިހާތަނަށް 15 މީހުން ވަނީ މަރުވެފައި، އޭގެ ތެރޭގައި ދެ އަންހެނަކާއި 13 ފިރިހެނަކު ހިމެނޭ، ޑާކާ މެޑިކަލް ކޮލެޖް ހޮސްޕިޓަލަށް 140 މީހަކު ފަރުވާއަށް ގެންދެވިއްޖެ" އިންސްޕެކްޓަރ ބައްޗޫ މިއާ ބުނެފައިވެއެވެ.

އިމާރާތުން ބޭރުގެ އެއްވެސް ތަނަކަށް އަސަރު ކޮށްފައިނުވާ ކަމަށާއި 150 ފަޔަރފައިޓަރުން އެތަނުގައި އަލިފާން ނިއްވުމަށް މަސައްކަތް ކުރިކަމަށް އަލްޖަޒީރާގައި ބުނެފައިވެއެވެ.

ލެއިން ތަތްތެޅިފައިހުރި މެދު އުމުރުގެ ފިރިހެނެއް އަލްޖަޒީރާ އަށް ބުނެފައިވަނީ އެތަނުގެ ތެރޭގައި ވެއްޓިފައި ތިބި މީހުން ތިބި ކަމަށާއި އޭނާ ސަލާމަތްވީ ކުޑަދޮރުން ފުންމާލައިގެން ކަމަށެވެ. އަދި ލިބިފައި ހުރި ޒަހަމްތަކަކީ ގޮވި ވަގުތު ކުޑަދޮރުގެ ބިއްލޫރި ތައް ބުރާފައި އައިސް ޖެހުނު ޖެހުމުން ލިބުނު ޒަހަމްތަކެއް ކަމަށްވެސް ބުނެފައިވެއެވެ.

ބަންގްލަދޭޝް އަކީ ޢާންމުކޮށްވެސް އިންޑަސްޓްރިއަލް ސަރަހައްދު ތަކުގައި މިކަހަލަ ހާދިސާތައް ހިނގާ ގައުމެކެވެ. 2012 ގައި ހިނގި މިފަދަ ހާދިސާއެއްގައި 117 މަސައްކަތް ތެރިން ވަނީ މަރުވެފައެވެ. އެފަހަރު ހާދިސާ ހިނގީ ބަންގްލަދޭޝްގެ އަންނައުނު އުފައްދާ ފެކްޓްރީ އެއްގައެވެ.

އިންޑަސްޓްރިއަލް ޒޯނުގައި ހިނގި އެންމެ ނުރައްކާތެރި ހާދިސާގައި 1100 މީހުން މަރުވެފައިވެއެވެ. އެވެސް ހަމަ އަންނައުނު އުފައްދާ ފެކްޓްރީއެއްގައި ހިނގި ހާދިސާއެކެވެ.