ރާއްޖެ އާއި އެމެރިކާ ގުޅިގެން ޕްލާސްޓިކް މަދުކުރުމަށް ބޮޑު މަޝްރޫޢެއް ފަށައިފިއެވެ.

މި މަޝްރޫޢު ފަށާފައިވަނީ މިއަދު ހަވީރު އެންވައިރަމެންޓް މިނިސްޓަރ އައިމިނަތު ޝައުނާއެވެ. މިމަޝްވަރާ ފެށުމުގެ ގޮތުން މިއަދު ހަވީރު ވަނީ އާޓިފިޝަލް ބީޗް ސާފުކޮށްފައެވެ.

މިއީ ޔުނައިޓަޑް ސްޓޭޓްސް މިޝަން ޓު މޯލްޑިވްސް، ޔޫ އެސް އެއިޑް ސްރީ ލަންކާ އެންޑް މޯލްޑިވްސް މިޝަން އިން ރާއްޖޭގައި ހުންނަ އެމެރިކަން ސެންޓަރު ގުޅިގެން ކުރިއަށް ގެންދާ މަޝްރޫޢެކެވެ.

މި މަޝްރޫޢުގެ މަޤްސަދުތަކުގެ ތެރޭގައި ޕުލާސްޓިކުގެ އައު އުފެއްދުންތައް ބޭނުންކުރާ މިންވަރު މަދުކޮށް ކުނި މެނޭޖްކުރުން ތަރައްޤީކޮށް އުކާލެވޭ ޕުލާސްޓިކު ކުނި މަދުކުރުމަށް ސަމާލުކަންދިނުން ހިމެނެއެވެ. އަދި ކުނި ނައްތާލުމުގެ މަސައްކަތް ހަރުދަނާކޮށް އަދި ރަށުފެންވަރުގައި ކުނިމެނޭޖްކުރުމަށް އެކަށީގެންވާ ހައްލެއް ހޯދާދިނުމަށާއި އެ މަސައްކަތް ހަރުދަނާކުރުމަށް މުޖުތަމައުގެ ފަރުދުންނަށް އެހީތެރިވެދިނުން ހިމެނެއެވެ.

މި  މަޝްރޫޢު 29 ސެޕްޓެމްބަރު 2027 އާ ހަމައަށް ކުރިއަށް ގެންދާނެއެވެ.

މި މަޝްރޫޢުގެ އަމާޒަކީ އަމިއްލަ ފަރުދުންނާއި ވިޔަފާރި ތަކާއި މުއައްސަސާތައް ހެޔޮގޮތުގައި ކުނި މެނޭޖްކުރުމުގެ އުސޫލުތަކަށް އަހުލުވެރިކުރުވުމެވެ. މީގެ އިތުރުން އުކާލެވޭ ޕްލާސްޓިކްގެ މިންވަރު މަދުކޮށް، ޕްލާސްޓިކުން ތިމާވެށި ރައްކާތެރިކޮށްދިނުން ކަމަށް އެމެރިކަން ސެންޓަރުން ބުނެފައިވެއެވެ..

މި މަޝްރޫޢުގެ ބަޖެޓެއްގެ ގޮތުގައި 5.7 މިލިއަން ޑޮލަރު ކަނޑައަޅާފައި ވެއެވެ.

މި މަޝްރޫޢުގެ ހަރަކާތްތައް ކަނޑައެޅުމުގައި ސަރުކާރާއި، އެހީދޭ ޖަމާއަތްތަކުން ކާމިޔާބުކަމާއެކު ރަށު ފެންވަރުގަ އާއި އަތޮޅު ފެންވަރުގައާއި ޤައުމީ ފެންވަރުގައި ހިންގާފައިވާ ހަރަކާތްތަކާއި އައު އީޖާދީ ކަންކަމަށް ބަލާނެ އެވެ. އަދި މަސައްކަތްތައް ރަށުފެންވަރުގައި ހަރަކާތްތެރިވާ ޖަމާއަތްތަކާ އަމިއްލަ ފަރުދުންގެ ބައިވެރިވުމާއެކު ކުރިއަށް ގެންދާނެ އެވެ.

މިގޮތުން ޤައުމީ ފެންވަރުގަޔާއި ސަރަހައްދީ ފެންވަރުގައި އަދި ރަށުފެންވަރުގައި ބޭނުންކުރެވޭ ކުނި މެނޭޖް ކުރުމުގެ ނިޒާމް ހަރުދަނާ ކުރުމަށް ވެސް ބާރުއަޅާނެ އެވެ.