މި ހިނގާ މާޗް މަހުގެ 20 ވަނަ ދުވަހުން ފެށިގެން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ކުނި އުކައިދޭ އަގުތަކަށް ބަދަލު އަންނާނެ ކަމަށް އެކުންފުނިން އިއްލާނުކޮށްފިއެވެ.

 ވެމްކޯއިން ނެރުނު އިއުލާނެއްގައި ބުނެފައި ވަނީ ވެކްމޯއިން މާލެ ސަރަހައްދުގައި ފޯރުކޮށްދޭ ޚިދުމަތް ދެމެހެއްޓެނިވި އުސޫލަކުން ކުރިއަށް ގެންދިއުމަށްޓަކައި އެންވަޔަރަމަންޓް މިނިސްޓްރީ އާއި އިކޮނޮމިކް ކައުންސިލާއި އެކު މަޝްވަރާތަކެއް ކޮށްފައިވާ ކަމަށެވެ.

އެ މަޝްވަރާތަކަށް ފަހު ކުނި މެނޭޖްކުރާ ގާނޫނާއި ޔުޓްލިޓީ ރެގިއުލޭޓަރީ އޮތޯރިޓީގެ ގާނޫނުގައިވާ ގޮތުގެމަތުން ވެމްކޯއިން މާލެ ސަރަހައްދުގައި ފޯރުކޮށްދޭ ޚިދުމަތްތަކުގެ އަގުތަކަށް މި މަހުން ފެށިގެން ބަދަލު ގެނައުމަށް ޔުޓިލިޓީ ރެގިއުލޭޓަރީ އޮތޯރިޓީއިން ވަނީ ފާސްކޮށްފައި ކަމަށެވެ.

Advertisement

މިމަހުގެ 20 ގެ ފަހުން ކުނި އުކައިދޭނެ އަގުތަކަކީ ގޭބީސީތަކުން މަހަކު 150 ރުފިޔާ، ވިޔަފާރިތަކަށާއި ކޮމާޝަލް ތަންތަނަށް ލީޓަރަކަށް 27 ރުފިޔާ ކަމަށެވެ. 

ކޯލް އެންޑް ޕިކަޕް ސާވިސްއަށް ޓަނަކަށް 330 ރުފިޔާ، ޓްރާންސްފާ ސްޓޭޝަނަށް ގެންނަ ކުންޏަށް ޓަނަކަށް 1060 ރުފިޔާ، ދައުލަތުގެ އިދާރާތަކާއި ސަރުކާރު ހިއްސާވާ ކުންފުނިތަކަށް ޓަނަކަށް 2660ރ، ދައުލަތުގެ އިދާރާތަކާއި ސަރުކާރު ހިއްސާވާ ކުންފުނިތަކަށް ލީޓަރަކަށް 1.27 ރުފިޔާ އަދި ޕްރައިވެޓް ކޮމާޝަލް ކަލެކްޓާސްއަށް ޓަނަކަށް 2260 ރުފިޔާ އެވެ.

ކުނި މެނޭޖްކުރުމާއި ބެހޭ ގަވައިދަށް ގެނެވުނު ފަސްވަނަ އިސްލާހާ އެއްގޮތަށް ވަކިނުކޮށް ޓްރާންސްފާ ސްޓޭޝަނަށް ގެންނަ ކުންޏަށް ކޮންމެ ފަހަރަކު އިތުރަށް 100 ރުފިޔާ ނަގާނެ ކަމަށް ވެމްކޯއިން ބުނެފައިވެއެވެ.